Ikan depik
Ikan depik (Rasbora tawarensis) marupoan sajinih ikan aia tawa nan hiduik di Danau Laut Tawar, Dataran Tinggi Gayo, Takengon, Kabupaten Aceh Tengah, Provinsi Aceh.[1][2] Ikan depik adolah ikan endemik nan basifaik pelagis.[3]
Ikan depik sajinih jo ikan bilih yang ada di Danau Singkarak, Provinsi Sumatera Barat.[1] Ikan ko baukuran ketek dengan panjang tujuah sampai lapan sentimeter.[1][2]
Pado maso batalua, ikan depik akan bamigrasi manuju sumber mato aia untuak malatakan miliaran taluanyo di babatuan. Salanjuiknyo, ikan ko akan baliak ka habitaik aslinyo, yaitu di bawah karang di bagian salatan danau.[2]
Satalah talua tu manateh, urang akan sada ikan depik tanyato mirip jo ikan teri. Tubuahnyo bawarna perak dengan leba kurang labiah dua sentimeter.[2] Di bagian pungguangnyo ado warna hitam.[4]
Parik ikan ko nyaris indak mangandung kotoran. Hal iko karano makanannyo hanyo barupo jinih hydrilla nan hiduik di dasa danau.[2]
Ikan ko manjadi primadona di sajumlah pasa tradisional di daerah dataran tinggi wilayah tengah Aceh.[4] Ikan depik segar ataupun nan kariang mudah dijumpai di pasa-pasa tradisional bahkan di pinggia jalan di daerah yang dakek jo Danau Laut Tawar.[1]
Ikan ko jiko diolah jadi makanan rasonyo lamak, gurih, dan indak babau anyia.[1] Ikan ko hargonyo amaik maha. Pado 2018 se, harganyo s dapek mancapai Rp80-90 ribu per kilo. Samantaro, pado 2021, hargonyo alah naiak jadi Rp100-130 ribu per kilo.[5]
Jiko basobok di pasa tradisional di lua wilayah Aceh Tengah, mako hargo ikan endemik ko bisa labiah maha lai. Itu karena ikan ko hanyo bakambang di Danau Laut Tawar, sarato paralu biaya transportasi lho untuak mambawoknyo ka lua daerah.[4]
Ikan depik biaso ditangkok nalayan satampek manggunoan babagai alaik samisal jariang, didisen (parangkok ikan depik tradisional di pinggia Danau Laut Tawar), cangkol (jariang angkek nan dikaikan jo ampek bilah bambu), dan sabagainyo.[1]
Adapun musim nan elok untuak manjariang ikan depik adolah pado bulan Agustus hinggo akhir tahun. Sabagai informasi, nalayan dapek tahu musim baburu ikan depik dari parubahan iklim nan ditandai jo angin yang taraso labiah dingin sarato adonyo rinai ketek.[2]
Ikan depik dapek diolah manjadi babagai jinih makanan. Salah satunyo nan paliang disukoi dek masyarakaik satampek adolah ikan depik pangek atau dimasak kariang. Ikan depik pangek marupoan kuliner favorit masyarakaik Takengon sarato cocok pulo di lidah wisatawan dari lua Aceh.[2]
Bumbu untuak masak ikan pangek ko cukuik sadarhana yaitu lado merah, tomaik, kunyik, bawang merah, sampai babagai macam rampah. Bumbu-bumbu ko dihaluih an sacaro basamo-samo, siap tu dibaluik an ka ika depik tu.[2]
Sabalum diabuih, tambah an empan atau andaliman dan daun degarang atau daun mint untuak manambah aroma. Siap tu, tambah an pulo garam jo jaruak nipih sacukuiknyo. Lalu, abuih ikan nan alah dibumbui tu salamo 30 menit atau sampai aianyo kariang. Mako, tahdianglah ikan depik pangek tu.[2]
Salain ikan depik pangek, ikan ko bisa pulo dengan babagai caro. Ado ikan depik dedah dengan proses mamasaknyo dikukuih, ikan depik goreng, dan sabagainyo.[2]
Meski baitu, populasi ikan ko di Danau Laut Tawar alah manurun. Iko badampak pulo pado turunnyo produksi ikan ko. Pado 2017, manuruik data Dinas Perikanan Kabupaten Aceh Tengah, produksi ikan depik mangalami panurunan nan drastis manjadi15,4 ton. Padohal, pado 1988, tacatat produksi ikan nan acok ditangkok nalayan ko mancapai 455 ton.[4]
Memang, ikan ko tamasuak hewan endemik nan tarancam punah. Iko diduga disebabkan karano adonyo parubahan signifikan pado ekosistem danan yang mambuek ikan depik ndak mampu lai baadaptasi.[6]
Parabuhan tu kemungkinan gadang barupo panyusutan debit aia, pandangkalan danau sahinggo manyebab an bakurangnyo volume aia, sarato parubahan kualitas aia karano ado pencemaran. Hal penting lainnyo adolah pemanasan global yang ikuik pulo manyebab an maningkeknyo suhu di kawasan danau.[6]
Salain tu, samakin bakurangnyo populasi ikan depik di danau Laut Tawar apo lai kalau indak disebab an dek panangkapan sacaro balabihan.[6]
Untuak mangatasi agar ikan ketek ko indak punah, dibutuah an karajo samo saluruah pihak, baiak dari masyarakait maupun dari pamerintah. Masyarakaik harus maningkek an kasadarnnyo agar ndak manangkok ikan ko sacara balabihan, dan sabagainyo.[5]
Samantaro, dari pihak pamerintah paralu panerapan hukum sarato mambuek samacam regulasi yang jaleh yang maatur tantang apo se nan harus dikarajoan untuak mancagah ikan ko punah.[5]
Bia ikan endemik dapek taruih batahan sarato populasinyo maningkek balik, paralu pulo dilaksana an konservasi sumber dayo ikan nan ado di perairan daraik. Prinsip konservasi, ko sabana e alah dijalehan dalam Undang-Undang Nomor 31 Tahun 2004 tantang Parikanan. Dalam UU tu diatua tantang konservasi sumber dayo ikan nan dilakukan lewat konservasi ekosistem, konservasi jenis, sarato konservasi genetik.[7]
Rujukan[suntiang | suntiang sumber]
- ↑ a b c d e f "Ikan Depik, Salah Satu Ikan Endemik Makanan Khas Danau Laut Tawar". www.djkn.kemenkeu.go.id. Diakses tanggal 2022-05-24.
- ↑ a b c d e f g h i j https://pesonaindonesia.kompas.com/read/2019/09/09/172300327/nikmatnya-ikan-depik-ikan-endemik-dari-aceh
- ↑ "Kinerja pertumbuhan dan kelangsungan hidup benih ikan depik (rasbora t - ETD Universitas Samudra". etd.unsam.ac.id. Diarsipkan dari versi asli tanggal 2022-07-08. Diakses tanggal 2022-05-24.
- ↑ a b c d Agency, ANTARA News. "Ikan depik jadi primadona di dataran tinggi Aceh - ANTARA News Aceh". Antara News. Diakses tanggal 2022-05-24.
- ↑ a b c lintasgayo.co (2021-04-23). "Depik Menuju Fase Kepunahan?". LINTAS GAYO (dalam bahasa Indonesia). Diakses tanggal 2022-05-24.
- ↑ a b c "Ikan Depik yang Tidak Lagi Bahagia di Danau Lut Tawar". Mongabay.co.id (dalam bahasa Inggris). 2021-12-14. Diakses tanggal 2022-05-24.
- ↑ "Ikan Air Tawar Mendesak untuk Dilindungi Populasinya, Kenapa?". Mongabay.co.id (dalam bahasa Inggris). 2017-12-07. Diakses tanggal 2022-05-24.