Chikungunya

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Chikungunya
2012-01-09 Chikungunya on the right feet at The Philippines.jpeg
Ruam dek chikungunya
Palafalan
Spesialisasi Panyakik infeksi
Gejala Damam, nyeri pasandian[2]
Komplikasi Nyeri pasandian jangko lamo[2]
Awitan 2 sampai 12 ari sasudah tapajan[3]
Durasi Biasonyo kurang dari sapakan[2]
Panyabab Virus Chikungunya tapindah dek gigitan rangik[3]
Diagnosis Pareso darah untuak RNA virus atau antibodi[3]
Kondisi sarupo Damam dengue, damam Zika[3]
Panagahan Pangandalian rangik, manjauahi gigitan[4]
Parawatan Pananganan suportif[3]
Prognosis Risiko kamatian ~ 1 dalam 1.000[4]
Frekuensi > 1 juta (2014)[3]

Chikungunya adolah panyakik mamindah nan disababkan dek virus Chikungunya.[3] Virus ko dapek tapindah ka badan urang nan tagigik dek rangik. Ado duo jinih rangik nan manggigik, yaitu Aedes aegypti jo Aedes albopictus nan juo manyababkan panyakik damam badarah dengue jo damam Zika.[3] Gejala muncua antaro duo inggo 12 ari salapeh tagigik dan batahan salamo sapakan bahkan labiah.[5] Gejala nan umum antaro lain damam jo sakik di pasandian.[2] Dapek dipulo disaratoi jo sakik kapalo, nyeri otot, bangkak pasandian, inggo ruam di kulik. Risiko kamatiannyo kiro-kiro 1 dalam 1.000 kasus. Risiko kaparahan samakin maningkek pado anak ketek, urang gaek, atau nan alah bapanyakik lain.[2][4]

Diagnosis panyakik ko dapek tagak malalui pamaresoan darah untuak mancari RNA virus atau antibodi virus jo pamaresoan Enzyme-Linked Immunosorbent Assay (ELISA).[3] Hal iko diparalukan dek gejala nan muncua ampia sarupo jo DBD atau Zika.[3] Walau baitu, pangubatan khusus atau vaksin untuak panyakik ko alun lai ado.[3] Urang jo Chikungunya cukuik diubek jo pananganan suportif nan batujuan untuak maatasi gejala nan ado sarupo ubek panurun damam, ubek pailang raso sakik, manjago cairan tubuah, sarato baistirahat nan cukuik.[2][3]

Tindakan lain nan paralu untuak managani Chikungunya adolah maambek papindahannyo. Upayo paliang rancak adolah jo mangandalikan populasi rangik sarato manjauahi gigitannyo tarutamo di daerah jo kasus nan acok. Upayo tasabuik dilakukan jo pamakaian kalambu di biliak lalok atau dipan, pamakaian ubek oles (insect repellent), sarato manutuik tampek-tampek nan bapotensi manjadi tampek bakambang biaknyo rangik.[4][3]

Asia jo Afrika adolah wilayah nan paliang banyak kasus Chikungunya. Wabah panah pulo dilaporkan tajadi di Eropa jo Amerika pado mulo taun 2000-an. Pado taun 2014 dilaporkan alah ado sajuta kasus.[6][3] Manuruik sijarahnyo, panyakik ko partamo kali dikataui di Tanzania pado taun 1952.[3] Namo panyakik ko surang barasa dari bahaso Kimakonde, salah satu bahaso satampek di Tanzania, nan aratinyo "manjadi bakaruik".[3]

Tando jo gejala[suntiang | suntiang sumber]

Tando jo gejala chikungunya muncua pado 72% inggo 97% kasus dalam satu inggo duo baleh ari samanjak tagigik rangik. Rato-rato muncua dalam tigo inggo tujuah ari. Gejala nan acok muncua yaitu damam tinggi, sakik di pasandian, inggo ruam-ruam.[7] Dapek pulo muncua gejala lain, cando sakik kapalo, latiah, paruik indak nyaman, sarato konjungtivitis.[8]

Damam pado chikungunya dapek balansuang akut (capek) inggo manjadi kronik (lamo).[9] Fase akut tabagi manjadi duo janjang, janjang partamo balansuang salamo limo inggo tujuah ari partamo dan tajadi viremia. Kudian diikuti janjang kaduo nan disabuik janjang konvalesens atau pamuliahan. Pado janjang kaduo ko, virus indak tasuo lai dalam darah.[7] Biasonyo panyakik ko diawali jo gejala damam tinggi nan dapek batahan salamo sapakan inggo sapuluah ari. Damam bisa mancapai 39 °C (102 °F) dan bisa manjadi damam tapak kudo (maninggi, manurun, lalu maninggi baliak).[10] Pado kondisi IgM alah muncua dalam darah, palahan damam manurun sairiang virus nan bakurang dalam darah. [11]

Sairiang tajadinyo damam, tajadi pulo sakik jo kaku di pasandian. Sakik di pasandian ko balansuang salamo sapakan inggu sabulan, bahkan taunan. Dilaporkan ado 87–98% kasus jo gejala ko sarato biasonyo dikaluahan di labiah dari ciek pasandian nan sakik.[12] Walau baitu, jarang nan sampai mambangkak.[7] Biasonyo pasandian nan sakik talatak di kaduo langan atau tungkai sacaro simetris, sandi-sandi ketek ataupun sandi-sandi gadang dapek pulo sakik. Sakik samakin taraso pado urang jo riwayaik sakik pasandian.[9] Sairiang jo sakik di pasandian, taraso pulo sakik di otot jo ligamen sakaliliangnyo.[7]

Ruam-ruam di badan dapek muncua pado 40–50% kasus. Ruam-ruam nan muncua barupo ruam makulopapular dalam duo inggo limo ari sasudah awitan gejala. Dapek pulo diikuti jo raso indak lamak di paruik, mual, muncua, inggo paruik mancoro.[8][7] Pado labiah dari satangah kasus, aktivitas harian tabateh dek sakik sarato latiah.[7] Pado kasus nan labiah sarik, muncua paradangan di mato.[13]

Pado kondisi nan barek, chikungunya dapek balansuang lamo (kronik). Kaluahan nan diraso adolah sakik di pasandian nan indak kunjuang ilang. Kondisi kronis cando ko partamo kali dikataui salamo wabah pado taun 1979. Faktor prediktor tajadinyo kondisi kronis adolah adonyo panyakik rematik sabalunnyo sarato umua nan alah lanjuik.[14][15][16][17]

Diagnosis[suntiang | suntiang sumber]

Diagnosis chikungunya ditagakkan malalui pamaresoan klinik, epedemiologis, jo laboratorium. Sacaro klinik, damam tinggi nan diikuti jo raso manyakik di pasandian alah maarahkan ka chikungunya. Sacaro epidemiologis, pasien mampunyoi riwayaik bakunjuang ka daerah nan bakasus chikungunya dalam 12 ari tarakhia. Samantaro, sacaro laboratorium tampak panurunan jumlah limfosit dalam darah.[18] Samantaro diagnosis bandiang untuak chikungunya adolah panyakik-panyakik nan mamindah dek rangik, cando damam badarah dengue, malaria, Damam Zika, ataupun infeksi lain cando influenza.[19]

Salain jo tigo caro tadi, panagakan diagnosis dapek pulo jo pamaresoan laboratorium nan labiah spesifik, sarupo isolasi virus, RT-PCR, sarato pareso serologis. Pamaresoan jo isolasi virus paralu wakatu pareso sapakan inggo duo pakan. Samantaro malalui RT-PCR paralu wakatu satu inggo duo ari, sadangkan jo pamaresoan serologis paralu duo inggo tigo ari. Dek lamonyo wakatu untuak pamaresoan, katigo caro ko jarang dipakai walaupun hasianyo labiah akurat.[20]

Ubek[suntiang | suntiang sumber]

Ubek nan kontan maubek chikungunya kini alun lai tasadio. Pananganan panyakik labiah kapado pananganan gejala. Damam jo raso manyakik dipasandian diubek jo ubek antiinflamasi non sterois (AINS) cando ibuprofen ataupun jo ubek analgesik non-aspirin cando parasetamol (asetaminofen).[4] Aspirin diilakkan pamakaiannyo dek dapek maningkekkan risiko padarahan.[21] Samantaro ubek lainnyo nan antiinflamasi dari jinih kortikosteroid indah disarankan diagiah salamo maso akut dek dapek mamicu imunosupresi dan mampabarek panyakik. [9]

Rujuakan[suntiang | suntiang sumber]

  1. "chikungunya". Oxford Learner's Dictionary. Oxford University Press. Diarsipkan dari versi asli tanggal 24 November 2014. Diakses tanggal 22 June 2020. 
  2. a b c d e f "Chikungunya Virus Symptoms, Diagnosis, & Treatment". CDC. 6 April 2016. Diarsipkan dari versi asli tanggal 21 September 2016. Diakses tanggal 22 June 2020. 
  3. a b c d e f g h i j k l m n o p "Chikungunya Fact sheet". WHO. April 2016. Diarsipkan dari versi asli tanggal 27 September 2016. Diakses tanggal 22 Juni 2022. 
  4. a b c d e "Chikungunya virus infection: an overview". The New Microbiologica 36 (3): 211–27. 1 Juli 2013. PMID 23912863. 
  5. "Long-term sequelae of chikungunya virus disease: A systematic review". Travel Medicine and Infectious Disease 15: 8–22. 1 Januari 2017. doi:10.1016/j.tmaid.2017.01.004. PMID 28163198. 
  6. "Chikungunya virus in the Americas--what a vectorborne pathogen can do". The New England Journal of Medicine 371 (10): 887–9. 1 September 2014. doi:10.1056/NEJMp1407698. PMID 25184860. 
  7. a b c d e f "Chikungunya fever: epidemiology, clinical syndrome, pathogenesis and therapy". Antiviral Research 99 (3): 345–70. 1 September 2013. doi:10.1016/j.antiviral.2013.06.009. PMID 23811281. PMC 7114207. https://zenodo.org/record/3414361. 
  8. a b "Changing patterns of chikungunya virus: re-emergence of a zoonotic arbovirus". The Journal of General Virology 88 (Pt 9): 2363–77. 1 September 2007. doi:10.1099/vir.0.82858-0. PMID 17698645. 
  9. a b c "Chikungunya: a re-emerging virus". Lancet 379 (9816): 662–71. 1 Pebruari 2012. doi:10.1016/S0140-6736(11)60281-X. PMID 22100854. 
  10. "Chikungunya virus and the global spread of a mosquito-borne disease". The New England Journal of Medicine 372 (13): 1231–9. 1 Maret 2015. doi:10.1056/NEJMra1406035. PMID 25806915. 
  11. "Chikungunya fever: a re-emerging viral infection". Indian Journal of Medical Microbiology 26 (1): 5–12. 29 September 2008. doi:10.4103/0255-0857.38850. PMID 18227590. http://www.bioline.org.br/abstract?id=mb08002. 
  12. "Dengue and other common causes of acute febrile illness in Asia: an active surveillance study in children". PLOS Neglected Tropical Diseases 7 (7): e2331. 29 September 2013. doi:10.1371/journal.pntd.0002331. PMID 23936565. publikasi akses tabukak - bebas untuak dibukak
  13. "Ocular manifestations associated with chikungunya". Ophthalmology 115 (2): 287–91. 1 Pebruari 2008. doi:10.1016/j.ophtha.2007.03.085. PMID 17631967. 
  14. "Chikungunya virus-associated long-term arthralgia: a 36-month prospective longitudinal study". PLOS Neglected Tropical Diseases 7 (3): e2137. 29 September 2013. doi:10.1371/journal.pntd.0002137. PMID 23556021. publikasi akses tabukak - bebas untuak dibukak
  15. "Predictors of Chikungunya rheumatism: a prognostic survey ancillary to the TELECHIK cohort study". Arthritis Research & Therapy 15 (1): R9. 1 Januari 2013. doi:10.1186/ar4137. PMID 23302155. 
  16. "Long-term chikungunya infection clinical manifestations after an outbreak in Italy: a prognostic cohort study". The Journal of Infection 65 (2): 165–72. 1 Agustus 2012. doi:10.1016/j.jinf.2012.04.005. PMID 22522292. 
  17. "Post-epidemic Chikungunya disease on Reunion Island: course of rheumatic manifestations and associated factors over a 15-month period". PLOS Neglected Tropical Diseases 3 (3): e389. 29 September 2009. doi:10.1371/journal.pntd.0000389. PMID 19274071.  publikasi akses tabukak - bebas untuak dibukak
  18. "Chikungunya Virus Infections". The New England Journal of Medicine 373 (1): 94. 1 Juli 2015. doi:10.1056/NEJMc1505501. PMID 26132958. 
  19. "Chikungunya at the door--déjà vu all over again?". The New England Journal of Medicine 371 (10): 885–7. 1 September 2014. doi:10.1056/NEJMp1408509. PMID 25029435. 
  20. "Laboratory Diagnosis of Chikungunya Fevers". World Health Organization. Diarsipkan dari versi asli tanggal 8 September 2012. Diakses tanggal 20 Juni 2020. 
  21. "Chikungunya—Fact sheet". European Centre for Disease Prevention and Control (ECDC). Diarsipkan dari versi asli tanggal 19 December 2013. Diakses tanggal 22 June 2020. 

Pautan lua[suntiang | suntiang sumber]

Klasifikasi
Sumber lua