Bungker Japang Padang Basi
Bungker Japang Padang basi adolah sabuah komplek patahanan Japang pado maso Japang manjajah Indonesia nan barado di Kota Padang. Komplek patahanan iko tapeknyo balokasi di Kalurahan Padang Basi, Kecamatan Lubuk kilangan, Kota Padang, Sumatera Barat.[1] Bangunan patahanan Japang di kawasan iko di dominasi dek bangunan bungker, yaitunyo samacam bangunan patahanan babantuak boks atau kotak nan sabagian bangunannyo tapandam di dalam tanah.[2] Bangunan iko manjadi bukti bahwasanyo adonyo panduduakan Japang di wilayah Sumatera Barat nan balangsuang pado era parang dunia ka duo, tahun 1942 hinggo 1945. Pado maso kini, lahan dari kawasan patahanan Japang di era panjajahan iko manjadi kapunyoan dek Sakolah Polisi Negara (SPN) Padang Basi di bawah naungan Polda Sumatera Barat.[3][4]
Lokasi[suntiang | suntiang sumber]
Bangunan bungker iko balokasi di Kalurahan Padang Basi, Kecamatan Lubuak kilangan, Padang, Sumatera Barat. Lokasinyo bajarak labiah kurang 13 km dari pusek Kota Padang. Banguna-bangunan iko barado di lahan nan cukuik data walaupun topografi kawasan lubuak kilangan iko barado di ateh katinggian. Babarapo dari bangunan bungker taseba di babagai tampek diantaronyo tadapek di kawasan pamukiman panduduak, kawasan bumi pakemahan padang basi, jo di komplek perumnas padang basi. Sacaro kasaluruahan tadapek limo bungker jo ciek bangunan babantuak lubang atau terowongan do kawasan iko.[5]
| No | Bungker Japang Padang Basi | Ketinggian (mdpl) |
|---|---|---|
| 1 | Bungker Japang I | 153 mdpl |
| 2 | Bungker Japang II | 141 mdpl |
| 3 | Bungker Japang III | 139 mdpl |
| 4 | Bungker Japang IV | 141 mdpl |
| 5 | Bungker Japang V | 146 mdpl |
| 6 | Lubang atau Terowongan | 147 mdpl |
Sijarah[suntiang | suntiang sumber]
Kawasan Patahanan Japang di Padang Basi iko marupoaan salah ciek bukti bangunan patahanan pado maso panduduakan Japang di wilayah Sumatera Barat pado era Parang Dunia II, khususnyo sakitaran tahun 1942-1945. Bangunan-bangunan patahanan Japang di daerah Padang Basi iko dibangun dalam rantang partangahan tahun 1943-1945.[6] Pambangunan bungker Japang di Padang Basi iko marupoan sabuah upayo mampakuek patahanan Japang di pantai baraik Sumatera. Bungker sarato lubang Japang iko dibangun swk tanago pribumi atau romusha takadang juo dek anggota Gyugun dibawah pangawasan tentara Japang. Sasudah Japang manyarah, bangunan iko dipakirokan juo pernah digunoan pado maso agresi militer Balanda I dan II.[7][8]
Bangunan[suntiang | suntiang sumber]
Bungker Japang Padang Basi I[suntiang | suntiang sumber]
Bungker Japang Padang Basi I marupoan salah ciek bangunan patahanan tentara Japang nan tadapek di Kawasan Padang Basi. Bungker Japang iko babantuak samacam bangunan patahanan nan manyarupoi boks atau kotak nan sabagian dari bangunannyo tapandam di dalam tanah. Latak bangunan barado pado sisi baraik nan marupoan patahanan paliang mungko atau paliang lua pado kawasan iko.[4] Pintu masuak bangunan iko barado pado sisi salatan, sadangkan lubang atau suduik tembak bungker tadapat pado sisi salatan ado 2 buah, di sisi timua 1 buah jo di sisi baraik 1 buah. Sadangkan pado sisi baraik nan mangarah ka jalan utamo indak tadapek lubang tembak maupun lubang intai atau spy holl.[9] Bangunan iko sacaro umum babantuak kotak ampek pasegi panjang baukuaran panjang 8 m x lebar 5,4 m jo tinggi 3,69 m. Taba bangunan iko iolah rato-rato 1 m nan dirancang khusus untuak manahan sarangan jo pamboman dari udaro. Sisi Utara Pado bangunan iko indak tadapek lubang tembak maupun lubang intai. Sisi Salatan Pado sisi iko tadapek sabuah pintu masuak nan tadapek di sisi baraik bangunan, nan baukuran leba 65 cm jo tinggi 1,22 m. Salanjuiknyo pado bagian tangah tadapek 1 buah lubang tembak nan baukuaran leba 86 cm jo tinggi 54 cm pado bagian lua jo bagian dalam leba 34 cm jo tinggi 41 cm. Salain itu pado sisi timua tadapek pulo 1 buah lubang tembak nan baukuaran leba 78 cm, tinggi 30 cm pado bagian lua jo bagian dalam lebar 27 cm, tinggi 26 cm. Sabagai catatan pado masiang-masiang lubang Japang dilengkapi jo lubang tembak mangarucuik atau manyampik pado bagian tangah nan difungsian untuak mancagah atau manyulikan musuah untuak manembak panghuni bungker. Salain itu, pado masiang-masiang lubang tembak iko tadapek lubang intai nan punyo diameter 12 cm. Pado sisi baraik nan dakek pintu masuak bangunan, tadapek sabuah pintu masuak tarowongan baukuaran leba 73 cm dan tinggi 1,27 m. Pintu masuak tarowongan iko tadapek pado bagian lua pillbox tapeknyo pado sisi baraik pintu masuak.[9]
Bungker Japang Padang Basi II[suntiang | suntiang sumber]
Bangunan iko samo jo bungker nan partamo yaitunyo marupoan bangunan patahanan nan babantuak kotak nan sabagian bangunannyo di timbun kadalam tanah. Bungker Japang Padang Basi II iko barada di sisi timua dari bunker nan partamo. Sacaro kasaluruahan objek talatak pado bagian tangah dalam lingkuik kawasan nan paliang mungko dari patahanan Jepang di Padang Basi.[4] Bangunan badenah saparampek lingkaran sarato jo arah nan mahadok ka arah utara. Bangunan baukuran panjang 3,6 m, lebar 3,4 m jo tinggi 1,6 m. Pintu masuak lubang tadapek pado sisi salatan jo leba nan masih tasiso 63 cm jo tinggi 75 cm. Lubang tembak pillbox mangarah ka suduik baraik lauik atau ka arah bungker I. Lubang tembak iko baukuaran leba 64 cm, tinggi 33 cm pado bagian lua jo leba 34 cm, tinggi 26 cm pado bagian dalamnyo.[9]
Bungker Japang Padang Basi III[suntiang | suntiang sumber]
Bungker Padang Basi III talatak pado sisi paliang timua dalam lingkuik kawasan patahanan Japang di Padang Basi. Bangunan iko manghadok ka arah utara.[4] Sacaro kasaluruahan bangunan badenah bujua sangka nan punyo ukuaran panjang 4,4 m x lebar 4,7 m x tinggi 2,75 meter. Pado sisi salatan tadapek pintu masuak nan baukuaran leba 67 cm jo tinggi nan masih tasiso 1,2 m. Kamudian, tadapek lubang tembak pado pillbox mangarah ka suduik utara jo ka arah timua. Ukuaran bungker iko baukuran leba 90 cm jo tinggi 40 cm pado bagian lua sarato leba 33 cm jo tinggi 40 cm pado bagian dalam. Sadangkan lubang tembak pado suduik timua baukuaran leba 1 m, tinggi 46 cm pado bagian lua jo leba 32 cm, tinggi 39 cm pado bagian dalam. Katabalan bangunan rato-rato 97 cm nan dirancang khusus untuak palinduangan dari pangeboman.[9]
Bungker Japang Padang Basi IV[suntiang | suntiang sumber]
Bangunan iko babantuak bulek jo punyo diameter 2,75 m, tinggi nan masih tasiso 1 m jo katabalan bangunan 60 cm. Bangunan babahan semen atau beton nan di bagian luaanyo dipasang jo batu turab atau batu aia[4]. Lubang pangintai atau lubang tembak tadapek pado sisi utara dengan leba 63 cm, tinggi 20 cm pado bagian lua jo leba 33 cm, tinggi 24 cm pado bagian dalam. Pintu masuak barado pado sisi salatan. Pintu masuak iko tahubuang jo 2 (dua) buah tarowongan babahan coran semen nan tadapek di sakitaran tarowongan. Pintu masuak tarowongan partamo bajarak labiah kurang 35 m arah salatan lubang. Pintu masuak babantuak satangah lingkaran nan punyo panjang 1,66 m jo leba 1,55 m nan posisinyo sajaja jo pamukaan tanah. Pintu masuak kaduo bajarak 3,8 m arah baraik lubang. Pintu masuak sisi baraik iko mempunyoi kamiripan nan hampia samo jo pintu masuak tarowongan arah salatan dengan ukuaran panjang 1,75 m jo leba 1,27 meter.[9]
Bungker Japang Padang Basi V[suntiang | suntiang sumber]
Bungker Japang Padang Basi V barado di sisi salatan bungker Japang Padang Basi IV nan hanyo bajarak 50 meter. Bangunan iko punyo arah hadok ka sisi utara dengan pintu masuak bangunan barado pado sisi salatan.[4] Bangunan iko babantuak bulek dengan diameter 4, 25 m, tinggi 2 m jo taba dindiang 67 cm. Pintu dari bangunan iko mampunyoi ukuran tinggi 97 cm jo leba 75 cm. Pado sisi utara tadapek sabuah lubang tembak nan baukuaran leba 1 m, tinggi 38 cm pado bagian lua jo leba 43 cm, tinggi 30 cm pado bagian dalam.[9]
Tarowongan Japang Padang Basi[suntiang | suntiang sumber]
Tarowongan nan tadapek pado kawasan Padang Basi iko marupoan salah ciek dari bangunan pandukuang pillbox-pillbox nan tadapek di areal iko. Bangunan iko dibangun pado maso Japang, gunnyo sabagai patahanan daerah sakitar Indaruang jo Padang Basi pado pariode tahun 1943-1945.[4] Sakitar pado tahun 1990 tarowongan iko masih dapek ditembus pado kaduo sisinyo. Namun karano faktor kasalamatan, akhianyo pintu tarowongan iko ditutuik atau ditimbun. Pado maso kiniko kondisi tarowongan alah indak bisa dijalajahi mangingek kaduo pintu nan alah ditimbun jo tanah. Manuruik tatalataknyo, kaduo pintu tarowongan iko manghubuangkan antaro garih mungko atau sisi utara jo garih patahanan di sisi salatan. Pintu partamo tadapek pado sisi utara nan dipakiroan marupoan garih mungko. Bangunan babantuak satangah lingkaran nan punyo diameter 1,62 m jo taba dindiangnyo 58 cm. Pintu tarowongan kaduo talatak pado sisi salatan nan bantuak jo ukurannyo relatif samo. Dipakiroan tarowongan iko barado di ateh bangunan SKB wilayah 2 Kota Padang kiniko.[9]
Rujuakan[suntiang | suntiang sumber]
- ↑ "Pemerintah Kota Padang". padang.go.id. Diakses tanggal 2020-08-16.
- ↑ "Arti kata bungker - Kamus Besar Bahasa Indonesia (KBBI) Online". kbbi.web.id. Diakses tanggal 2020-08-16.
- ↑ Fauzi, Rahmat (2020-03-02). "220 Siswa Diktuk Bintara di SPN Polda Sumbar Dilantik menjadi Anggota Polri". Tribratanews Sumbar (dalam bahasa Inggris). Diarsipkan dari versi asli tanggal 2020-11-26. Diakses tanggal 2020-08-16.
- ↑ a b c d e f g bpcbsumbar (2017-09-29). "Bangunan Pertahanan Jepang di Sumatera Barat". Balai Pelestarian Cagar Budaya Sumatera Barat (dalam bahasa Inggris). Diarsipkan dari versi asli tanggal 2022-03-17. Diakses tanggal 2020-08-16.
- ↑ Sagita, Ikeriye. "Peninggalan jepang di Minangkabau" (dalam bahasa Inggris).
- ↑ Kahin, Audrey Richey (2005). Dari Pemberontakan ke Integrasi: Sumatra Barat dan Politik Indonesia, 1926–1998. Yayasan Obor Indonesia. ISBN 979-461-519-6.
- ↑ Okezone (2015-03-18). "Pendudukan Jepang di Padang & Peran Soekarno : Okezone News". Diakses tanggal 2020-08-16.
- ↑ Maeda, Hiroshi (1987). Maeda Memilih Republik. ITB Bandung. pp. 108. ISBN 979-8001-16-8.
- ↑ a b c d e f g Syarif, Marjohan, Dodi Chandra (2018). Cagar Budaya tak Bergerak Kota Padang. Balai Pelestarian Cagar Budaya Sumatera Barat. pp. 125.