Bayam

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Amaranthus tricolor adolah jinih bayam nan dapek juo dijadian tanaman hieh salain untuak dimakan.

Bayam (Amaranthus) adolah tumbuahan atau sayuaran ijau nan biaso ditanam untuak dimakan daunnyo. Tumbuahan iko barasa dari benua Amerika namun baitu sayua bayam ko kiniko taseba ka saluruah dunia. Tumbuahan iko dikana sabagai sayuaran sumber zat besi nan pantiang untuak tubuah. Bayam mampunyoi banyak manfaaik untuak kasehatan badan. Sayua bayam ko mambuek badan jauh dari panyakik pabilo rutin dikonsumsi dalam bantuak tumih bayam, salad bayam, jo resep lainnya nan manggunoan bahan sayua bayam. [1][2]

Bantuak[suntiang | suntiang sumber]

Tanaman sayua bayam iko dapek iduik pado iklim nan angek jo cahayo matohari nan kuek. Bayam atau sayua bayam ko labiah tahan tahadok pancahayoan sinar matohari langsuang karano marupoan tumbuahan nan ba jinih C4. Tumbuahan sayua bayam ko punyo batang nan baraia dan indak bakayu. Daun dari sayua bayam ko batangkai, babantuak bulek nan agak lonjong jo agak tipih. Daun bayam ko biasonyo bawarna ijau, sirah , jo ijau kaputiahan. Bungo dari sayua bayam ko tasusun rapek, bagian ateh bakumpua manjadi karangan bungo di ujuang tangkai dan pangka pacabangan. Incek dari bungo bayam ko bawarna itam, ketek jo batekstur kareh.

Kagunoan[suntiang | suntiang sumber]

Bayam ko pado umumnyo dibuek sabagai sayua di kawasan Asia Timua jo Asia Tenggara, sahinggo disabuik juo dalam bahaso Inggirih sabagai Chinese amaranth. Di Indonesia jo Malaysia, bayam acok disalah artian manjadi "spinach" dalam bahaso Inggris (mungkin sabagai akibaik penerjemahan nan ado dalam film kartun Popeye), padohal namo itu mangacu ka jinih sayuaran daun lain atau jinih bayam nan lainnyo. [3][4]

Di tingkek konsumen, tadapek duo macam sayua bayam, yaitunyo bayam patiak jo bayam cabuik. Bayam patiak badaun leba. Batangnyo tumbuah gadang sarato tagok. Batang bayam ko dapek tumbuah hinggo duo meter. Daunnyo nan mudo dapek dimakan tarutamo dijadian sabagai lalapan, misalnyo untuak bahan pecel jo gado-gado. Salain tu dapek pulo dijadian karupuak daun bayam nan caronyo digoreng sasudah diagia atau di campua jo tapuang. Kamudian bayam cabuik. Daun bayam cabuik ko punyo ukuran labiah ketek dan ditanam untuak wakatu singkek, paliang lamo 25 ari. Bayam cabuik ko labiah cocok untuak dibuek sup saroman sayua bayam. Bayam patiak ko biasanyo barasa dari jinih A. hybridus (bayam kakap) jo bayam cabuik tarutamo diambiek dari A. tricolor. Jinih-jinih lainnyo nan dapek dimanfaaikan adolah A. spinosus (bayam duri) jo A. blitum (bayam kotok).[5]

Kanduangan zat basi pado bayam relatif labiah tinggi dari pado sayua-sayua lainnyo. Zat basi ko marupoan payusun sitokrom jo protein nan sangaik mambantu katiko proses fotosintesis sahinggo baguno untuak ubek urang nan kanai panyakik anemia. Babarapo kultivar A. tricolor mampunyoi daun bawarna sirah atau putiah nan dipakai sabagai tanaman hieh. Jinih tanaman hieh lainnyo adolah A. yocaudatus nan punyo tandan bungonyo bawarna sirah panjang manggantuang sarupio ikue. Di tampek asalnyo, bayam dimanfaaikan inceknyo atau incek bayam sabagai sumber karbohidrat. Incek banyam iko kini tanamo sabagai makanan untuak diet karano indak mambuek gapuak badan.[1] Aka tunggang dari batang bayam ko biaso juo dimanfaaikan dek urang sabagai ubek. Salain tu manfaaik dari bayam ko kabanyakan digunoan dek masyarakaik sabagai salah ciek alternatif mamanuahi kabutuahan hiduik sarupo di jua di pasa atau untuak di makan sahari-hari.[5][2][6]

Rujuakan[suntiang | suntiang sumber]

  1. a b Media, Kompas Cyber. "5 Manfaat Bayam bagi Kesehatan, Kuatkan Tulang hingga Jaga Jantung Halaman all". KOMPAS.com (dalam bahasa Indonesia). Diakses tanggal 2020-08-08. 
  2. a b Liputan6.com (2019-03-12). "Manfaat Bayam untuk Kesehatan, Kaya Serat dan Bisa Cegah Kanker". liputan6.com (dalam bahasa Indonesia). Diakses tanggal 2020-08-08. 
  3. (Indonesia) Pusat Bahasa Departemen Pendidikan Republik Indonesia {{cite web |url=https://kbbi.kemdikbud.go.id/entri/horenso |title=Arti kata horenso pada Kamus Besar Bahasa Indonesia dalam jaringan |accessdate=2020-08-08
  4. (Indonesia) Pusat Bahasa Departemen Pendidikan Republik Indonesia "Arti kata bayam jepang pada Kamus Besar Bahasa Indonesia dalam jaringan". Diakses tanggal 2020-08-08. 
  5. a b "Pusat Penelitian dan Pengembangan Hortikultura". hortikultura.litbang.pertanian.go.id. Diakses tanggal 2020-08-08. 
  6. "e-GiGi". ejournal.unsrat.ac.id. Diakses tanggal 2020-08-08. 

Pautan lua[suntiang | suntiang sumber]