Baburu alek
Baburu alek atau baburu gadang adolah caro baburu nan diadoan sacaro basamo-samo dan dapek diikuti dek ka sado urang nan candu baburu kandiak. Baburu alek diadoan untuak manangkok kandiak jo anjiang nan alah dilatiah baburu. Baburu gadang diadoan pado Ari Akaik sajo, biasonyo ado tiok nagari di Minangkabau. Salah satu nagari nan acok maadoan baburu alek adolah Nagari Batu Hampa, Kabupaten Pesisir Selatan. Baburu alek alah acok diadoan pado maso dahulunyo sabagai bantuak panyaluran candu buru jo mambantu masyarakaik paladang supayo tanaman nan ado di ladang indak digaduah dek kandiak. Baburu alek dipimpin dek katua buru nan diimbau dek urang banyak jo muncak buru. Muncak Buru ko urang nan punyo kapandaian dalam baburu. Baburu alek diadoan pado Ari Akaik partamo atau kaduo satiok bulannyo.[1]
Dalam kagiatan baburu alek diikuti dek urang nan candu baburu sabanyak 100 hinggo 150 urang labiah. Urang-urang nan sato baburu ko barasa dari babagai daerah di Sumatera Barat. Alek baburu dimulai pado pukua 08.30 inggo pukua 16.00 Wib. Sabalun dibaok ka lokasi buru, anjiang-anjiang pamburu kandiak diagiah babagai makanan nan bagizi bia anjiang-anjiang ko kuek badannyo untuak baburu.[1]
Saari sabalun ka baburu, urang banyak nan ado di sakitar kampuang diimbau untuak tibo ka lokasi buru. Salain itu, urang kampuang dilarang untuak malapehan taranaknyo di ladang atau di sakitar lokasi buru. Mukasuiknyo supayo taranak tadi indak tamakan dek anjiang nan sadang baburu. Untuak urang nan ka baburu, buliah bebas mamiliah lokasi tampek baburunyo sasuai jo tampek arah larinyo kandiak.[1]
Baburu alek beda jo buru salek. Pado baburu alek anjiang nan dibaok adolah anjiang jantan nan alah baumua 2,5 taun inggo 3 taun labiah. Tiok-tiok anjiang ko diagiah namo sasuai jo bantuak sarato rono bulunyo, misalnyo lupak, samuik, sikumbang, bacang merah, koreang, baliang murai, dan baliang merah.[1]
