Arsen

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Arsen, arsenik, atau arsenikum adolah unsua kimia dalam tabel periodik nan mamiliki simbol As jo nomor atom 33. Iko adolah bahan metaloid nan takana baracun sarato mamiliki tigo bantuak alotropik; kuniang, itam, jo abu-abu. Arsenik sarato sanyawa arsenik digunoan sabagai pestisida, herbisida, insektisida, jo dalam babagai aloy.[1]

Sifek-sifek Arsenik[suntiang | suntiang sumber]

Arsenik sacaro kimiawi mamiliki karakteristik nan sarupo jo Fosfor, nan acok digunoan sabagai pangganti dalam babagai reaksi biokimia nan baracun juo. Katiko diangekan, arsenik capek taoksidasi manjadi oksida arsenik, nan babaun saparti baun bawang putiah. Arsenik jo babarapo senyawa arsenik dapek juo lansuang tasublimasi, baubah dari padek manjadi gas tanpa manjadi cairan talabiah dahulu. Zat dasa arsenik ditamukan dalam duo bantuak padek nan bawarna kuniang jo metalik, nan mamiliki barek jinih 1,97 jo 5,73.[1]

Pakambangan Arsenik[suntiang | suntiang sumber]

Kato arsenik dipinjam dari bahaso Persia زرنيخ Zarnik nan bararti "orpimen kuniang". Zarnik dipinjam dalam bahaso Yunani sabagai arsenikon. Arsenik dikana jo digunoan di Persia nan di banyak tampek lainnyo sajak zaman dahulu. Bahan iko acok digunoan untuak mambunuah, jo gejala karacunan arsenik sulik dijalehan, sampai ditamukannyo tes Marsh, tes kimia sensitif untuak mantes latak arsenik. Karano acok digunoan dek para panguaso untuak mambunuah lawan-lawannyo jo karano daya bunuahnyo nan luar biasa sarato sulik dideteksi, arsenik disabuik Racun para rajo, jo rajo dari sadoalah racun. Dalam zaman Perunggu, arsenik acok digunoan di perunggu, nan mambuek campuran tersebut labiah kareh. Warangan, nan acok digunoan sabagai bahan pelapis permukaan keris, manganduang bahan utamo arsen. Arsen mambangkikan panampilan pamor keris jo mampajaleh kontras pado pamor. Salain itu, arsen maningkekan juo daya bunuah sanjato tikam itu. Albertus Magnus dipicayoi sabagai urang patamo nan manamukan caro maisolasi elemen iko pado taun 1250. Pado taun 1649 Johan Schroeder mampublikasi 2 caro manyiapkan arsenik.

Alchemical symbol for arsenic

Lambang alkimia untuak arsenik tampak di sabalah.

Pado zaman Ratu Victoria di Britania Raya, arsenik dicampuakan jo cuka sarato jo kapua nan dimakan dek kaum perempuan untuak maningkekan panampilan wajah mereka, bisa mambuek kulik labiah putiah. Arsenik bisa digosokkan juo di muko jo di langan kaum perempuan untuak mamutiahan kulik.[1]

Arsen jo lingkuangan[suntiang | suntiang sumber]

Babarapo tampek di bumi manganduang arsen nan cukuik tinggi sahinggo dapaek marembes ka aia tanah. WHO manatapkan ambang aman tatinggi arsen di aia tanah sagadang 50 ppb (bagian per miliar). Kabanyakan wilayah jo kanduangan arsen nan paliang tinggi adolah daerah aluvial nan marupoan endapan lumpua sungai jo tanah nan kayo bahan organik. Dipakiroan sakitar 57 juta urang maminum aia tanah nan tacampua arsen balabiah, sahinggo bapotensi maracun. Arsenik dalam aia tanah basifek alami, nan dilapehan dari sedimen ka dalam aia tanah karano indak adonyo oksigen pado lapisan di bawah permukaan tanah. Aia tanah iko mulai digunoan satalah sajumlah LSM dari barat manaliti program aia sumua sacaro sarantak pado akhia abad ka-20, tatapi gagal manamukan kabaradoan arsenik dalam aia tanah. Dipakiroan sabagai karacunan massal nan paliang buruak dalam sajarah nan mungkin musibah lingkuangan paliang parah dalam sajarah. Di Banglades tajadi epidemik karacunan massal disebabkan dek arsenik.

Banyak nagara lain di Asia, saparti Vietnam, Kamboja, Indonesia, jo Tibet[2], diduga mamiliki lingkuangan geologi nan sarupo jo kondusif untuak maasilkan aia tanah nan manganduang arsenik dalam kadar nan tinggi. Tanaman nan ditanam di ateh tanah nan manganduang arsenik dapek diserap dek tanaman jo maninggaan residu pado hasia pertanian.[3][4]

Rujuakan[suntiang | suntiang sumber]

  1. a b c Media, Kompas Cyber (2019-09-07). "Mengenal Arsenik, Racun Mematikan yang Membunuh Munir di Udara Halaman all". KOMPAS.com (dalam bahasa Indonesia). Diakses tanggal 2021-04-27. 
  2. "Arsenic Confirmed in Groundwater Supply". The Jakarta Post. 10 Oktober 2008. Diakses tanggal 27 April 2021. 
  3. "FDA Ukur Arsenik Dalam Beras". VOA Indonesia. 7 September 2013. Diakses tanggal 27 April 2021. 
  4. Agustina, Titin (2014). "KONTAMINASI LOGAM BERAT PADA MAKANA DAN DAMPAKNYA PADA KESEHATAN". TEKNOBUGA. 1: 1 – 13.