Alergi talua
 | Artikel ko maagiah informasi dasa tantang topik kasihatan. Informasi dalam artikel ko buliah digunoan anyo untuak panjalehan ilmiah, bukan untuak diagnosis diri dan indak dapek manggantian diagnosis medis. Paratian: Informasi dalam artikel ko bukanlah resep atau nasihaik medis. Wikipedia bukan pangganti dotor. Kok Sanak paralu bantuan atau ka barubek bakonsultasilah jo tanago kasihatan profesional. |
| Alergi talua | |
|---|---|
 | |
| Talua ayam | |
| Spesialisasi | Imunologi |
| Tipe | Reaksi alergi |
| Panagahan | Mailakan konsumsi talua |
| Frekuensi | ~1.5% (developed world)[1][2] |
Alergi talua adolah kondisi sensitif balabiahan dari patahanan tubuah (hipersensitivitas imun) dek adonyo protein-protein dalam talua, baiak talua ayam, itiak, atau talua unggeh lainnyo, nan sabananyo indak babahayo untuak tubuah.[3][4] Gejalanyo dapek muncua capek (rapid onset) atau muncua lambek (gradual). Kaluahan nan umum disampaikan dek pandarito ko adolah galigato jo punyo riwayaik kaluahan nan sarupo sabalunnyo. Kondisi parah bisa sampai sasak angok ataupun maalami syok anafilaksis.[3]
Alergi talua marupokan jinih alergi makanan tabanyak kaduo sasudah alergi susu jawi. Di Eropa pandarito alergi talua nan alah dipareso ado 0,2-0,3%, sadangkan di Australia ado 8,9% anak.[5][6]
Alergi talua marupokan alergi nan biaso didarito anak-anak. Sairiang patambahan umuanyo, kaluahan alergi dek talua ko dapek mailang. Hanyo saketek urang sajo nan masih batahan alergi taluanyo katiko lah gadang, biasonyo dek lah punyo baragam gejala atau reaksi nan barek dari alerginyo.[3]
Panyabab
[suntiang | suntiang sumber]Alergi talua dapek muncua gejala dek tamakan talua, baiak talua ayam, itiak, atau unggeh lainnyo. Alergi ko indak hanyo dari produk olahan utamo talua (talua goreng, talua abuih, mayonais, dsb.), tapi juo pado olahan nan saketek kanduangan taluanyo ataupun vaksin nan manggunokan talua sabagai media pambuatannyo. Bagian talua nan mambuek alergi adolah bagian putiahnyo dek banyak protein pamicu alergi nan ado di sinan daripado dalam kuniang talua.[3]
Pado putiah talua ado 23 glikoprotein, nan di antaronyo ado 5 protein nan paliang utamo manjadi alergen (panyabab alergi) yaitu ovomukoid, ovalbumin, ovotransferin, jo lisosim. Samantaro pado kuniang talua ado alergen babantuak albumin serum nan disabuik alfa-livetin.[5]
Vaksin
[suntiang | suntiang sumber]Babarapo vaksin jo imunisasi dibuek jo manggunokan talua sabagai medianyo. Vaksin influenza mampunyoi kandungan ovalbumin (OVA) mancapai 42 ug/mL dan sajauah ko baru ado 11 laporan takaik reaksi anafilaksis pado urang nan punyo alergi talua di antaro 48 juta urang nan alah divaksin. Vaksin influenza masih direkomendasikan pado urang nan mampunyoi reaksi alergi nan ringan jo pamantauan kiro-kiro 15 minik sasudah vaksin diagiah.[5] Samantaro pado urang nan punyo riwayaik reaksi alergi barek untuak indak diagiah vaksin influenza.[7]
Vaksin campak, nan tagabuang dalam vaksin MMR (measles, mumps, and rubella vaccine), disarankan untuak tatap diagiah pado urang nan punyo alergi talua. Kanduang OVA dalam vaksinnyo sabanyak 0,5-1 ug/mL, labiah randah daripado vaksin influenza. Pado urang jo alergi talua vaksin musti diagiah di rumah sakik atau klinik jo fasilitas pananganan alergi nan langkok.[5][3]
Vaksin damam kuning (yellow fever) manggunokan juo talua sabagai media tumbuahnyo. Vaksin damam kuniang musti diagiah pado urang nan ka pai raun ka nagara-nagara tatantu nan endemik damam kuniang. Dek itu, vaksin damam kuniang disarankan untuak tatap diagiah jo dosis nan labiah randah daripado urang nan normal.[5]
Epidemiologi
[suntiang | suntiang sumber]Alergi talua marupokan alergi makanan tabanyak kaduo sasudah alergi susu. Alergi talua sarupo jo alergi susu, labiah banyak takanai pado anak-anak daripado urang gadang sainggo angko kajadiaannyo samakin bakurang sairiang batambahnyo umua. Pada sabuah panalitian disabuikan baso di Amerika Utara jo Eropa prevalensi alergi talua pado anak umua dibawah limo taun kiro-kiro 1,8-2%.[2] Adopulo nan manyabuik 0,5-2,5%.[1][6]Di Australia mancapai 16,5%.[8] Di Indonesia studi epidemiologi takaik alergi makanan khususnyo talua alun baitu dikambangkan. Manuruik data kunjuangan pasien dermatitis atopi di Rumah Sakik Cipto Mangunkusumo, Jakarta, ado 31% pasien alergi putiah talua jo 21,4% alergi kuniang talua.[9]
Mamasuaki umua sikolah, anak-anak nan sangkek keteknyo alergi talua mulai toleran pado talua jo kiro-kiro sapartigonyo sajo nan masih alergi.[1][6] Alergi talua nan dapek batahan inggo dewasa biasonyo dek maso keteknyo alah maalami reaksi alergi nan cukuik barek sarato mampunyoi kadar IgE tinggi dalam darah.[6]
Alergi talua dipangaruahi dek baragam faktor sarupo faktor internal individu, baiak dek faktor katurunan, riwayaik dalam kaluarga, umua, jo etnis, kudian dek lingkuangan, sarato kacukupan vitamin D. Di Australia, anak katurunan Asia labiah barisiko. Di Selandia Baru, anak katurunan urang Pasifik Barat labiah galik kanai. Samantaro di Amerika Serikat, labiah condong anak turunan kulik itam nan kanai. Faktor lain nan mampangaruahi kini adolah gaya iduik masyarakaik, masyarakaik di kampuang alah mulai maikuti gaya iduik pakotaan (pola makanan barubah) sainggo barisiko pulo takanai alergi makanan.[6]
Patofisiologi
[suntiang | suntiang sumber]Alergi talua dapek muncua sacaro capek atau pun lambek, bagantuang pado respon tubuah tiok urang. Indak sado urang dapek takanai alergi talua, bagantuang pado genetik tiok urang. Proses manjadi alergi jo talua alah dimulai sajak partamo kali tapapar jo komponen talua. Maso nan partamo kali ko disabuik sabagai maso sensitisasi. Sensitisasi talua pado anak, bisa wakatu dalam kanduangan (hubuangan darah antaro ibu nan mamakan talua sainggo komponennyo dapek masuak ka darah janin) atau wakatu sasudah lahia malalui aia susu ibu dari ibu nan mamakan talua.[10][6][1]
Pado maso sensitisasi alun ado kaluahan nan muncua di badan. Nan tajadi dalam tubuah sangkek ko adolah proses pambantuakan antibodi IgE (imunoglobulin E). Mulonyo protein talua nan manjadi alergen diidentifikasi dek sel nan banamo sel panyaji antigen (Antigen-Presenting Cell; APC). Kudian sel panyaji antigen ko maekspresikan hasia tamuannyo ka sel T panolong (T helper;Th). Sel Th ko alah tasensitisasi atau tau jo alergen tasabuik inggo mangaluakan sitokin nan tadiri dari IL-4 (Interleukin 4) jo IL-13. Sitokin ko baikatan jo sel B nan masih naif (alun punyo karajo imun apopun). Sel B tasabuik barubah manjadi sel plasma nan mahasiakan antibodi IgE spesifik protein-protein alergen talua tasabuik.[11]
Katiko alergen dari talua masuak baliak ka tubuah, sel-sel imun nan alah tasensitisasi lansuang bareaksi capek. IgE nan alah tabantuak baikatan jo sel-sel imun sarupo sel mast (di jaringan) atau sel basofil (di darah). Antibodi IgE mangikek antaro alergen jo sel mast/basofil. Sel Mast/basofil ka mangaluakan isinyo (degranulasi) barupo histamin jo mediator inflamasi kimiawi lainnyo (sitokin, interleukin, leukotrien, jo prostaglandin). Histamin turuik sato dalam reaksi alergi jo mambuek pambuluah darah maleba (vasodilatasi) sainggo mambuek sel-sel darah putih dari darah masuak ka jaringan nan takanai alergen. Histamin juo turuik dalam maransang sel sakitar untuak mamproduksi mukus. Dek histamin jo mediator kimiawi ko lah tubuah bisa galigato, sambok, iduang basalemo, mato gata, inggo sasak angok. Pado kondisi barek dapek tajadi syok anafilaksis.[11]
Pado reaksi lambeknyo, sitokin nan dihasiakan sel mast/basofil maundang tibonyo eosinofil, neutrofil, jo sel darah putiah lainnyo untuak malawan alergen. Reaksi lambek balansuang dalam duo inggo 24 jam.[12][13]
Gejala klinis
[suntiang | suntiang sumber]
Gejala klinis nan muncua pado urang nan alergi talua dapek baragam dari kondisi ringan inggo barek. Gejala nan paliang acok muncua adolah gata-gata di badan lalu muncua bangkak-bangkak nan agak sirah atau biaso disabuik galigato. Kadang dapek dijuo disaratoi sambok-sambok (angioderma) di bagian badan tatantu. Pado kondisi alergi nan indak diparantaroi IgE atau reaksi nan labiah lambek dapek muncua kaluahan kulik barupo panyakik dermatitis atopi nan punyo tampilan lokasi kaluahan nan babeda manuruik umua. Dapek pulo kaluahan nan muncua barupo sasak angok atau asma. Anak nan takanai dermatitis atopi juo punyo kacondongan untuak manjadi pandarito asma di kudian ari. Kondisi paliang barek dari alergi talua adolah syok anafilaksis nan dapek takanai sacaro sistemik atau kasadoalahan badan, dimulai dari sasak angok parah hinggo aliran jo takanan darah nan lamah.[9]
Diagnosis
[suntiang | suntiang sumber]
Panagakan diagnosis alergi talua saroman jo panagakkan diagnosis alergi atau atopi lainnyo. Uji lakek (patch test) marupokan pangujian nan dilakukan jo malakek-lakekan samacam koyo (patch) nan alah diagiah alergen-alergen tatantu nan kudian dipantau pakambangannyo. Pado anak nan positif alergi ka tampak kuliknyo barubah sirah. Uji lain nan sarupo yaitu uji cukit jo caro mamasuakan sajumlah ketek alergi ka subkutan (lapisan kulik) lalu dipantau reaksinyo apokah ka manjadi sirah atau indak. Kok inyo sirah mako positif alergi.[1]
Salain itu adopulo pamaresoan jo uji tantangan makanan (Oral Food Challenge; OFC). Pado pamaresoan ko pasien dicubo untuak makan makanan nan ado kandungan alergennyo. Pamaresoan ko dianggap sabagai baku ameh (baku emas; gold standard) panagakkan diagnosis dek dapek lansuang dikataui. Uji OFC ko hanyo disarankan pado fasilitas kasihatan nan langkok. Pamaresoan jo uji ko labiah acok dipakai di Amerika Utara jo Eropa.[5][6]
Pamaresoan eliminasi dapek dilakukan untuak managakkan diagnosis. Pamaresoan jinih ko disarankan dek dotor untuak ibu nan mauruih makan anaknyo. Ibu dimintak untuak mancataik apo nan dimakan anaknyo jo indak mancampua antaro baragam makan (dipilah ciek-ciek) . Satiok salasai makan dipantau kondisi fisiknyo sabalun buliah diganti jo makanan lain.[9]
Pananganan
[suntiang | suntiang sumber]Langkah utamo untuak maadang muncuanyo alergi talua adolah dek mailakan makan talua atau olahannyo. Walau baitu, katiko urang indak sangajo tamakan talua, dapek diagiah ubek untuak manyanangan badan dari reaksi alergi nan muncua. Ubek antialergi nan diagiah antaronyo ubek adrenalin, kortikosteroid, atau antihistamin. Salain ubek-ubek antialergi, dapek pulo ditangani jo terapi imun (immunotheraphy). Namun, terapi imun indak disarankan untuak pananganan taruih manaruih dek efek toleransi ubek nan mungkin dapek muncua.[9]
Prognosis
[suntiang | suntiang sumber]Alergi talua tamasuak jinih alergi nan dapek ilang sairiang batambahnyo umua. Bebeda jo alergi makanan lauik nan condong batahan saumua iduik. Hal iko takaik pulo jo kadar IgE nan samakin bakurang di kudian ari. Dari panalitian, mayoritas anak nan alergi talua mulai dapek manoleransi talua katiko umua sikolah, sabagian lain ilang pado maso manjalang gadang. Hanyo sabagian ketek sajo nan batahan inggo gadang (dewasa).[6]
Rujuakan
[suntiang | suntiang sumber]- ↑ a b c d e Caubet JC, Wang J (2011). "Current understanding of egg allergy". Pediatr. Clin. North Am. 58 (2): 427–43, xi. doi:10.1016/j.pcl.2011.02.014. PMC 3069662
. PMID 21453811.
- ↑ a b Hen's Egg Allergy. Chemical Immunology and Allergy. 101. 4 Nopember 2015. 124–30. doi:. ISBN 978-3-318-02340-4.
- ↑ a b c d e Munawwarah, L. 2017. lmunisasi campak pada anak alergi telur. Majalah Kedokteran Nusantara The Journal Of Medical School, 50(1), 45-48.
- ↑ Sherwood, Lauralee. (2012). Human physiology : From Cells to Systems. Wadsworth Publishing Co Inc. ISBN 978-1-133-10893-1. OCLC 768823974. http://worldcat.org/oclc/768823974.
- ↑ a b c d e f Caubet, J. C., & Wang, J. (2011). Current understanding of egg allergy. Pediatric clinics of North America, 58(2), 427–xi. doi:10.1016/j.pcl.2011.02.014
- ↑ a b c d e f g h Loh, W., & Tang, M. (2018). The Epidemiology of Food Allergy in the Global Context. International journal of environmental research and public health, 15(9), 2043. doi:10.3390/ijerph15092043
- ↑ Grohskopf LA, Sokolow LZ, Broder KR, et al. Prevention and Control of Seasonal Influenza with Vaccines: Recommendations of the Advisory Committee on Immunization Practices — United States, 2017–18 Influenza Season. MMWR Recomm Rep 2017;66(No. RR-2):1–20. DOI: http://dx.doi.org/10.15585/mmwr.rr6602a1
- ↑ Osborne, N. J., Koplin, J. J., Martin, P. E., Gurrin, L. C., Lowe, A. J., Matheson, M. C., ... & Allen, K. J. (2011). Prevalence of challenge-proven IgE-mediated food allergy using population-based sampling and predetermined challenge criteria in infants. Journal of Allergy and Clinical Immunology, 127(3), 668-676.
- ↑ a b c d Munasir, Z., & Muktiarti, D. (2013). The management of food allergy in Indonesia. Asia Pacific allergy, 3(1), 23–28. doi:10.5415/apallergy.2013.3.1.23
- ↑ Food Reactions. Allergies Archived 2010-04-16 di Wayback Machine.. Foodreactions.org. Kent, England. 2005. Accessed 27 Apr 2010.
- ↑ a b Janeway, Charles; Paul Travers; Mark Walport; Mark Shlomchik (2001). Immunobiology; Fifth Edition. New York and London: Garland Science. pp. e–book. ISBN 978-0-8153-4101-7. https://www.ncbi.nlm.nih.gov/books/bv.fcgi?call=bv.View..ShowTOC&rid=imm.TOC&depth=10.
- ↑ Holt PG, Sly PD (2007). "Th2 cytokines in the asthma late-phase response". Lancet. 370 (9596): 1396–8. doi:10.1016/S0140-6736(07)61587-6. PMID 17950849.
- ↑ Grimbaldeston MA, Metz M, Yu M, Tsai M, Galli SJ (2006). "Effector and potential immunoregulatory roles of mast cells in IgE-associated acquired immune responses". Curr. Opin. Immunol. 18 (6): 751–60. doi:10.1016/j.coi.2006.09.011. PMID 17011762.
Pautan lua
[suntiang | suntiang sumber]| Klasifikasi |
|---|