Laila Sari
| Laila Sari | |
|---|---|
,_p40.jpg) Laila Sari pado taun 1955 | |
| Background information | |
| Namo asli | Nur Laila Sari Jahrotuljannah |
| Lahia | 4 November 1935 Padang Pandjang, Sumatra, Hindia Balando |
| Maningga | 20 November 2017 (umua 82) Jakarta, Indonesia |
| Genre musik |
|
| Karajo |
|
Hajjah Laila Sari (lahia Nur Laila Sari Jahrotuljannah; lahia 4 November 1935 – maningga 20 November 2017 pado umua 82 taun[lower-alpha 1]) adolah saurang komedian, bintang film, jo panyanyi Indonesia. Inyo dijuluaki "nenek-nenek lincah" (neli) karano panampilannyo nan energik di ateh pangguang.[1]
Biografi[suntiang | suntiang sumber]
Laila Sari lahie jo namo Nurlaila Sari Jahrotuljannah di Padang Panjang, Sumatera Barat, pado tanggal 4 November 1935. Apaknyo maningga dunia katiko inyo baumua duo taun, sataun kamudian inyiaknyo mambao amaknyo nan baprofesi sabagai penyanyi untuak pindah ka Jawa. Di sinan, inyo digadangan di lingkuangan Muslim nan taat.[2]
Laila tingga basamo amak jo apak tirinyo nan baru pado umua sambilan taun. Satalah amaknyo baranti banyanyi karano alasan agamo, inyo mulai sato manyanyi untuak mandapekan pitih.[1][3] Inyo mulai banyanyi partamo kali di pesta panikahan di Pontianak, Kalimantan, basamo urang tuonyo.[1]
Laila taruih banyanyi di acara patunjukan, maskipun inyo idak pernah marilis album di sapanjang kariernyo. Inyo ecok tampil di muko tantara, jo Presiden Soekarno suko maundangnyo untuak banyanyi pado parayaan Hari Kamerdekaan di Istano Negara. Katiko namo inyo mulai dikana di nusantara, inyo manyadari bahwasonyo banyak laki-laki mulai mandakek ka inyo. Dalam sabuah wawancara pado taun 2010 jo The Jakarta Globe, Laila manganang ado kalanyo para laki-laki tu bacakak demi dirinyo. Pado taun 1955, inyo bamain dalam film partamonyo. Tigo taun kamudian, inyo dilarang tampil di Bekasi jo Karawang, Jawa Barat, karano panitia takuik inyo akan maambiak laki urang tu.[1]
Pado taun 1960, Laila manikah jo saurang laki-laki blasteran Balando banamo Boertje (atau Murdadi Iskandar), nan umuanyo limo puluah taun labiah gaek dari inyo. Karano Laila idak subur lai, kaduonyo maadopsi saurang anak. Laila taruih malanjuikkan kariernyo sabagai bintang film, tamasuak mamerankan kakasiah Slamet Rahardjo dalam film Wadjah Seorang Laki-Laki pado taun 1971, nan disutradaroi dek Teguh Karya.[1]
Pado taun 1993, Boertje tasarang stroke, akibeknyo Laila mulai mangurangi kagiatan banyanyi jo barakting untuak marawek Boertje jo amaknyo nan sadang sakik. Untuak mambiayai pangubatannyo, inyo manjua oto jo rumah nan barado di Cengkareng, Jakarta Barat.[4] Lakinyo maningga dunia pado taun 1998, saminggu satalah amak Laila maningga.[1] Satalah babarapo kali ditawaran untuak naiak haji ka Makah, Laila akhianyo manarimo tawaran dari artis Desy Ratnasari jo kaluarganyo, nan barangkek pado taun 2000. Desy manangguang sadoalah biaya nan dikaluaan salamo naiak haji, sadangkan Laila ikuik mambintangi babarapo iklan untuak mandapekan pitih tambahan bagi kaluarganyo.[5]
Samanjak itu, Laila ecok mamainkan peran pandukuang di sinetron. Inyo juo ecok maabihan wakatu mahibur para lansia di panti jompo.[1] Pado taun 2005, inyo dianugerahi pangharagoan prestasi saumua hiduik dek Inspiring Women Awards di Jakarta.[3] Taun-taun barikuiknyo, Laila tingga jo kaluarganyo, tamasuak ciciknyo, di Tangkiwood, Jakarta Barat, kaluarganyo hiduik dalam kamiskinan.[2]
Laila Sari maningga dunia tanggal 20 November 2017 pado umua 82 taun. Panyabek maningganyo adolah kalelahan, karano inyo masih bakarajo sampai panghujuang hayatnyo. Janazahnyo dikubuan di TPU Karet Bivak, Jakarta, sa liang lahat jo lakinyo, nan maningga pado taun 1998.[6]
Gaya[suntiang | suntiang sumber]
Sajak tampil di televisi, Laila ecok mamakai pakaian nan sederhana. Katiko banyanyi, inyo manggunoan garak bibia nan balabiahan jo mamakai kain (sarupo saruang), kameja langan panjang, jo jilbab. Katiko tampil di acara varietas, inyo ecok mamakai abuak palasu bawarna carah jo pakaian anak-anak.[1]
Filmografi[suntiang | suntiang sumber]
Sapanjang kariernyo, Laila alah mambintangi labiah dari 20 film.[1]
- Dinamika (1955)
- Peristiwa 10 November (1956)
- Singa Betina dari Marunda (1971)
- Wadjah Seorang Laki-Laki (1971)
- Warung Pojok (1977)
- Pulau Putri (1977)
- Inem Nyonya Besar (1977)
- Tuan Besar (1977)
- Sinyo Adi (1977)
- Kembang Semusim (1980)
- Juara Cilik (1980)
- Ketika Cinta Harus Memilih (1981)
- Halimun (1982)
- Ke Ujung Dunia (1983)
- Tante Garang (1983)
- Kelainan Cinta (1983)
- Perempuan Kedua (1990)
- Lupus IV (1990)
- Amrin Membolos (1996)
- Anda Puas, Saya Loyo (2008)
- Cinlok (2008)
- Anak Ajaib (2008)
- Hantu Tanah Kusir (2010)
Catatan[suntiang | suntiang sumber]
- ↑ Satalah manikah, Laila manyabuikan inyo lahia taun 1940 untuak managehan bahwasonyo lakinyo labiah gaek dari inyo. Mardiyati 2010, A Flower in the Eve.
Rujuakan[suntiang | suntiang sumber]
Catatan kaki
Daftar pustaka
- "Bagi Laila Sari Usianya Tidak Jadi Masalah". KapanLagi.com (dalam bahasa Indonesia). 12 Mei 2005. Diarsipkan dari versi asli tanggal 23 Agustus 2011. Diakses tanggal 9 Januari 2024.
- Batubara, Herianto (15 November 2011). "Laila Sari, Artis Tiga Zaman yang Kini Hidup Memprihatinkan". detik.com (dalam bahasa Indonesia). Diarsipkan dari versi asli tanggal 22 Desember 2011. Diakses tanggal 9 Januari 2024.
- Batubara, Herianto (15 November 2011). "Laila Sari Berjuang Menghadapi Dua Cobaan Berat Sekaligus". detik.com (dalam bahasa Indonesia). Diarsipkan dari versi asli tanggal 3 Maret 2016. Diakses tanggal 9 Januari 2024.
- Batubara, Herianto (15 November 2011). "Laila Sari Dapat 'Hadiah' Naik Haji Setelah Lulus Cobaan Berat". detik.com (dalam bahasa Indonesia). Diarsipkan dari versi asli tanggal 22 Desember 2011. Diakses tanggal 9 Januari 2024.
- Mardiyati, Ade (23 Juli 2010). "A Flower in The Eve of Her Bloom". Jakarta Globe. Diarsipkan dari versi asli tanggal 5 Februari 2012. Diakses tanggal 9 Januari 2024.
- Waskito, Catur (25 Mei 2019). "Mengenang Laila Sari Yang Meninggal Dunia Diduga Karena Kelelahan Kerja". Tribun News. Diakses tanggal 9 Januari 2024.
