Zinédine Zidane

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Zinédine Yazid Zidane (IPA: [ˌzineˈdin jaziːd ziˈdan]; bahasa Arab: زين الدين زيدان, Zainuddin Zidan lahia 23 Juni 1972; umua 47 tahun) nan takana jo popular jo imbauan Zizou adolah saurang bakeh pamain sipak bola Parancih katurunan Aljazair. Posisinyo adolah galandang panyarang. Mamulai karier sabagai pamain di klub AS Cannes, inyo kamudian bamain di Bordeaux, Juventus dan tarakhir Real Madrid. Inyo pansiun dari sipak bola klub pado taun 2006 jo pansiun dari Tim nasional Parancih satalah Piala Dunio 2006. Inyo juo sampek mamagang rekor sabagai pamain tamaha di dunio katiko dipindahan dari Juventus ka Real Madrid pado musim 2001-2002 jo nilai 46 juta poundsterling sabalum dipacahkan dek pamain Real Madrid lainnyo Cristiano Ronaldo dan Gareth Bale.

Sabagai pamain sipak bola kaleh dunio, Zidane alah manganyam banyak prestasi, di antaranyo duo gala Serie-A basamo Juventus, ciek gala Liga Champions jo ciek gala La Liga basamo Real Madrid. Zidane juo bahasil manganta Parancih manjadi juaro dunio Piala Dunio 1998 jo juaro Piala Eropa 2000. Basamo sahabaiknyo Ronaldo, Zidane manjadi pamain sipak bola nan mampu maraih gala Pamain Teabaik Dunio FIFA sabanyak tigo kali. Inyo juo parnah maraih Ballon d'Or pado taun 1998.

Anaknyo kini mangikuikan jajak Zidane sabagai pamain sipak bola. Kaampek anaknyo bamain untuak Akademi Real Madrid. Enzo (24 Maret 1995), Theo (18 Mai 2002) jo Elyaz (26 Desember 2005) baposisi sabagai galandang. Sadangkan Luca (13 Mai 1998) baposisi sabagai panjago gawang.

Pado tanggal 4 Januari 2016, dalam konferensi pers nan dilakuan jo Florentino Pérez, Zidane didaulaik manjadi palatih Real Madrid manggantikan Rafael Benítez.

Pado 29 Mei 2016, Inyo mambaok Real Madrid maraih trofi ka sabaleh Liga Champions atau juo disabuik La Undécima

Pajalanan karier[suntiang | suntiang sumber]

Zidane dilahiakan di Marseille dan digadangan di La Castellane. Walaupun lahia di Marseille, Zizou alun parnah bamain untuak Olympique de Marseille. Urang tuo Zidane baagamo Islam, jo mareka baimigrasi dari Aljazair ka Parancih pado taun 1954.

Karier Zidane dimulai pado usio 14 tahun, anak dari imigran Aljazair iko taliek jo saurang pancari bakaik banamo Jean Varraud dan kamudian ditawaan tampek di Akademi AS Cannes. Aslinyo inyo hanyo mandapaikan kasampatan batahan di Cannes salamo anam pakan sajo, sabalum akhirnyo bakaik ancaknyo mambuek Zidane mampu mangamankan kontrak patamonyo salama ampek tahun. Zidane kamudian bamain di level professional patamo pado usio 17 taun pado taun 1991. Inyo kamudian mancetak gol patamonyo pado tanggal 8 Februari 1991, nan kamudian mambueknyo mandapaikan hadiah oto dari presiden klub. Zidane kamudian bahasil manganta Cannes masuak kompetisi Piala UEFA di akhia musim 1991—92.

Zidane kamudian dipindahan ka Girondins de Bordeaux pado taun 1992-93, dan kamudian menganta klub tasabuik manjuarai Piala Intertoto taun 1995 jo juara kaduo Piala UEFA taun 1995-96. Rakannyo di Bordeaux adolah Bixente Lizarazu jo Christophe Dugarry, nan kamudian kalak akan manjadi trio kuek di timnas Parancih pado Piala Dunio 1998. Pado taun 1995, palatih Blackburn Rovers Ray Harford sampek manawakan kontrak pado Zidane dan Dugarry, namun Zidane manolak tawaran dari klub Inggrih tasabuik.

Pado taun 2001 Zizou dipindahan dari klub Italio, Juventus F.C. ka Real Madrid jo kontrak salamo 4 tahun. Biaya pindah nyo sagadang €66 juta, mambuek inyo manjadi pamain sipak bola jo transfer tamaha di dunio. Inyo mancetak gol kamanangan 2-1 malawan klub Jarman, Bayer Leverkusen pado 2001-2002 Final Champions League di Glasgow di Hampden Park. Taun barikuiknyo di Piala Dunio 2002 inyo hanyo tampia sakali mambela Parancih kareno kanai cedera. Dalam turnamen tasabuik, Parancih indak bahasil mancetak satu golpun jo tapuruak di dasa grup pado babak patamo sehinggo gagal luluih ka babak barikuiknyo.

Tahun 2004 satalah Piala Eropa 2004 salasai, Zidane pansiun dari sipak bola internasional, namun katiko Parancih mangalami kasulikan untuak maluluihkan diri ka Piala Dunio 2006, Zidane mangumumkan pado Agustus 2005 bahwa inyo akan kambali bamain di tim nasional. Parancih akhirnyo luluih, tatapi Zidane nan baru malalui musim nan dipanuhi cedera di Madrid, mamutuihkan bahwa inyo akan mundua satalah Piala Dunia tasabuik salasai.

Pado tanggal 25 April 2006, Zizou sacaro rasmi mangumumkan kaputuihannyo untuak mundua dari klub jo tim nasional sipak bola Parancih satalah Piala Dunio 2006.

Pado tanggal 7 Mei 2006 Zizou mamainkan patandiangan tarakhir sabagai tuan rumah untuak Real Madrid di Stadion Santiago Bernabéu. Pamain Real Madrid mamakai baju kaus khusuo nan batando "ZIDANE 2001 - 2006" tatulih di bawah logo klub. Mode nan dapek didugo, pandukuang Real Madrid maagiah inyo sambuikan nan hangek jo mandukuang Zizou sapanjang patandiangan. Patandiangan iko malawan Villarreal CF dan, sayangnyo untuak Zizou, hasil tabaik nan diparoleh Real Madrid adolah seri 3–3. Zizou mancetak gol keduo untuak Real Madrid tanpo parayaan gadang - gadangan. Zizou manuka baju kausnyo jo Juan Roman Riquelme, pamain Villarreal CF dan galandang Argentina. Pado akhia patandiangan, pandukuang Real Madrid mangucapkan salamaik jalan untuak Zizou jo maagiah inyo tapuak tangan panjang, nan mambueknyo menitiakkan aia mato.

Rujuakan[suntiang | suntiang sumber]