Urang Minangkabau di Singapura

Presiden Singapura partamo, Yusof Ishak, adolah salah satu tokoh Minangkabau Singapura nan tanamo.

Urang Minangkabau adolah salah satu etnik nan ado di Singapura. Urang Minang dari Sumatera marantau ka Singapura alah balansuang sajak daulu, sairiang marantaunyo urang Minang ka Malaysia. Rami urang Minang nan marantau ka Singapura barasa dari Pariaman jo Agam, Sumatera Barat. Umumnyo alasan urang Minang marantau ka Singapura dek pai baniago, apolai dek Singapura talatak di Selat Malaka nan manjadi pasa dunia. Galombang rantau urang Minangkabau panah taranti katiko Konfrontasi Indonesia Malaysia 1962 inggo Singapura bapisah dari Malaysia. Urang Minangkabau di Singapura kini alah maadopsi budayo Malayu satampek, sainggo babicaro dalam bahaso Malayu.

Sensus panduduak di Singapura indak mangategorikan Minangkabau sabagai kalompok etnis surang, malainkan diklasifikasikan sabagai Malayu. Adonyo urang Minangkabau di Singapura alah manjadi bagian sijarah sarato kontribusi bagi pakambangan Singapura. Di antaro tokoh Minangkabau nan tanamo di Singapura adolah anggota legislatif Malayu partamo sangkek Kolonial Inggirih di Singapura yaitu Mohammad Eunos Abdullah, Presiden Singapura partamo Yusof Ishak jo panulih lagu Majulah Singapura, lagu kabangsaan Singapura, Zubir Said.

Pautan lua

• "Singapore Talking: Minangkabau".  (Video)