Pohon

Pohon ash biaso (Fraxinus excelsior), pohon gugur badaun leba (angiosperma)

Larch eropa (Larix decidua), pohon konifera nan tamasuak juo tumbuahan peluruh

Pado botani, pohon adolah tumbuahan manaun jo batang nan tumbuah mamanjang, mandukuang cabang dan daun pado sabagian bosegh spesies. Pado babarapo panggunoan, definisi pohon mungkin labiah sompik, biasonyo hanyo mangacu pado tanaman bakayu dangan partumbuahan sekunder, tanaman nan dapek digunoan sabagai kayu, atau tanaman nan tumbuah hinggo katinggian tatantu. Dalam definisi nan labiah loweh, palem, paku, pisang, dan bambu tamasuak juo jinih pohon. Pohon bukanlah kalompok taksonomi tapi mancakuik babagai spesies tumbuahan nan mangambangkan batang dan cabang sabagai caro untuak manjulang tahadok tumbuahan lain demi basaing mandapekán sinar matoari. Pohon candaruang barumua panjang, babarapo pohon dapek hiduik hinggo babarapo ribu taun. Pohon alah tumbuah di Bumi satidaknyo salamo 370 juta taun. Diparkiroan tadapek sakitar tigo triliun pohon gadang di dunia.

Pohon biasonyo punyo banyak cabang sekunder nan ditopang dek batangnyo dari tanah. Batang iko biasonyo manganduang jaringan kayu untuak kakuatan, dan jariangan pambuluah untuak mambao zat nutrisi dari satu bagian pohon ka bagian lain. Pado kabanyakan pohon, pambuluah iko dikaliliangi dek lapisan pepagan (kulik kayu) nan baguno sabagai panghalang dan palinduang. Di bawah tanah, akar bacabang dan manyobar loweh; akar baguno untuak manambekán pohon dan manyorap aia, kalambapan dan nutrisi dari tanah. Di ateh tanah, cabang-cabangnyo tabagi manjadi cabang, rantiang dan pucuak nan labiah ketek. Pucuak biasonyo manghasilkan daun, nan menangkok energi cahayo dan mangubahnyo manjadi gulo malalui fotosintesis, manyadiokan makanan untuak partumbuahan dan pakambangan pohon.

Pohon biasonyo bakambang biak jo biji. Bungo dan buah umum juo ditamui, tapi babarapo pohon, ajak tumbuahan runjung, punyo karucut sarbuk sari dan karucut biji aliah-aliah bungo dan buah. Palem, pisang, dan bambu manghasilkan juo biji, tapi pohon pakis manghasilkan spora.

Pohon mamainkan poran pantiang dalam mangurangi erosi dan manjago iklim. Pohon manghilangkan karbon dioksida dari atmosfer dan manyimpan karbon dalam jumlah bosegh pado jaringannyo. Pohon dan hutan manyadiokan habitat ka banyak spesies hewan dan tumbuahan. Hutan hujan tropis iyolah ciek dari habitat dangan kaánekaragaman hayati paliang banyak di dunia. Pohon manyadiokan kataduahan dan tampek tinggal bagi banyak spesies, kayu untuak konstruksi, bahan baka untuak mamasak dan pamaneh, buah untuak bahan makanan saroto banyak kagunoan lain.

Pautan lua

• Media tantang Pohon di Wikimedia Commons