Tato Mentawai

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Mambuek tato Mentawai

Tato Mentawai atau ti'ti' adolah jinih tato nan dibuek dek urang Mentawai di Kapulauan Mentawai, Sumatera Barat. Proses mambuek tato disabuik muti'ti'. Tato ko unik dek karano dapek mamanuahi sadoalah badan, tagantuang tujuan tiok tato nan dibuek. Tato dapek dipakai baiak dek laki-laki atau padusi jo pola nan babeda. Tato dipakai juo sabagai sarana kommunikasi sarato identitas untuak urang Mentawai inggo muncua anggapan kalau indak batato mangko inyo urang Malayu, bukan Mentawai asali.[1][2]

Budayo manato atau marajah tubuah di kalangan urang Mentawai kini lah mulai ditinggakan, utamonyo dek urang-urang mudo. Stigma negatif acok malakek pado urang nan marajah diri. Apolai pado pamukiman nan dakek ka kota atau dakek lingkungan polisi, urang mudonyo takuik untuak mamakai Tato Mentawai dek dilarang.[3]

Proses manato dilakukan dalam tahapan-tahapan tatantu jo jeda salamo babulan-bulan. Hal iko dilakukan untuak mangurangi raso sakik dari proses manato. Urang nan ditato (siputi'ti') dek sipasati'ti' (panato) minimal alah barumua akia balih (kiro-kiro 15 taun).[4]

Proses manato[suntiang | suntiang sumber]

Proses manato dimulai jo upacara adaik nan dilakukan dek sikerei nan batujuan untuak mamintak salamaik ka roh-roh atau panguaso alam untuak siputi'ti' jo sipasati'ti' salamo proses manato. Upacara adaik untuak mamintak salamaik ko disabuik panaki. Sasudah panaki dilakukan, manato pun dapek dimulai.[5]

Proses manato diawali jo mambuek pola. Pola dibuek di bagian tubuah nan dikandaki mamakai tulang daun karambia batinta itam. Tinta itam itu didapek dari campuran babarapo jinih tabu jo jelaga dari minyak lampu togok nan sabalunnyo dicampua dalam tampuruang karambia. Salanjuiknyo pola tasabuik disasuaikan jo kandak siputi'ti'. Pola tato Mentawai umumnyo babantuak garih-garih, kadang ado pulo pola binatang.[6][2]

Sasudah pola dibuek, barulah sipasati'ti' mambuek tato permanen. Tato permanen dibuek jo manokok-nokokan jarum sacaro capek maikuti pola nan dituju. Jarum nan dipakai bisa jarum kuningan atau nan diambiak dari batang pohon waru (dalam baso Mentawai disabuik batang tobek) nan disambuang ka gagang tanduak ruso. Gagang tanduak ruso ko dipacik di tangan kida, ditokok jo kayu panokok di tangan suok.[6][2]

Salamo proses manato balansuang, siputi'ti' dapek marasoan sakik nan taramek sangek, kadang dapek mambuek tangih. Urang di sakitar, nan manonton biasonyo turuik pulo bakomentar sarato mambandiang-bandiangan tato nan dipunyoi untuak manyumangati siputi'ti' ataupun sipasati'ti' supayo mandapek hasia nan rancak. Dalam prosesnyo, dapek pulo manitiak darah inggo tacampua antaro tinta itam jo darah pado tatonyo.[6]

Sudah tato dibuek, bagian tubuah nan ditato tadi dibarasiahan. Kudian diusok jo daun paku, nan tujuannyo untuak maadang radang nan parah. Biasonyo pola nan tadi ditato ka nampak sabagai bintiak-bintiak biru nan mambangkak. Dalam saari, biasonyo paradangannyo alah ilang.[6]

Rujuakan[suntiang | suntiang sumber]

  1. Schefold, hlm. 323.
  2. a b c Hernawati, hlm. 30.
  3. Schefold, hlm. 324.
  4. Schefold, hlm. 327.
  5. Hernawati, hlm. 34.
  6. a b c d Schefold, hlm. 327-328.

Daftar pustaka[suntiang | suntiang sumber]

  • Schefold, Reimar (2014). Aku dan Orang Sikuddei, Menjaga Jiwa di Rimba Mentawai. Buku Kompas. ISBN 978-979-709-850-6. 
  • Hernawati, Tarida (2015). Upacara Adat Mentawai. Padang: Yayasan Citra Mandiri Mentawai (YCMM). ISBN 978-979-98602-9-3.