Tapai sipuluik itam

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Tapai sipuluik itam dimakan jo lamang (lamang tapai)

Tapai sipuluik Itam adolah tapai nan dibuek dari puluik itam. Ado pulo tapai nan dibuek dari ubi kayu, namonyo tapai ubi. Tapai Sipuluik Itam biasonyo dimakan jo lamang sainggo tasabuik bana dek urang Minangkabau “Lamang Tapai”. Makanan ko indak dibuek tiok hari. Cuma di hari-hari istimewa sajo adonyo, misalnyo di hari baralek, hari rayo, jo hari-hari mandoa.

Caro mambuek[suntiang | suntiang sumber]

Mambuek Tapai Sipuluik Itam ko indak sarik do. Bahannyo hanyo sakilo puluik itam jo sakapiang ragi sajo. Takaran banyak puluik itam jo ragi bisa disasuaikan. Ragi gunonyo untuak maubah sipuluik manjadi tapai. Alat-alat nan digunokan adolah daun pisang atau daun kaladi, niru atau sejenisnya nan babantuak laweh, jo panci basaok/batutuik.

Sarupo iko caro mambueknyo. Basuah puluik itam, uwokkan/kukuih sampai masak, kaka/ratokan di ateh niru supayo dingin. Kalau alah dingin, tabuakan/serakkan ragi nan alah dialuihkan di ateh nasi puluik itam. Bungkuih jo daun pisang atau daun kaladi nasi puluik itam nan alah bacampua jo ragi tadi. Bungkusan daun ‘tu masuakkan ka dalam panci nan ado saok/tutuik. Labiah rancak kalau panci ‘tu dibungkuih ‘lo jo kain. Tunggu sampai 3 hari-3 malam. Jan sampai manyimpannyo dalam kulkas. Proses fermentasi atau pamasaman nasi puluik manjadi tapai mamaralukan hawo nan paneh.

Kalau ‘lah lapeh 3 hari-tigo malam, bungkusan nasi puluik ‘lah bisa dibukak. Biasonyo, nasi puluik ‘lah barubah manjadi tapai si (nasi) puluik itam. Inyo ‘lah bakuah, mani-mani masam, dan mambuek tabik salero. Salain jo lamang, Tapai Sipuluik Itam bisa juo dicampua jo es, kue-kue, atau jo jus buah-buahan.