Tabuik

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Tabuik di kota Solok (tahun 1910-1920)
Tabuik di Pekanbaru pado tahun 2011

Tabuik (bahaso Indonesia: Tabut) adolah parayoan lokal dalam rangko mamparingati Asyura, gugurnyo Imam Husain, cucu Nabi Muhammad, nan dilakukan dek masyarakaik Minangkabau di daerah pantai Sumatera Barat, kusuihnyo di Koto Pariaman. Festival iko tamasuak manampilkan baliak Pertempuran Karbala, jo mamainkan drum tassa jo dhol. Tabuik marupoan istilah untuak usungan janazah nan dibaok salamo prosesi upacaro tasabuik. Walaupun awal mulonyo marupoan upacaro Syi'ah, akan tatapi panduduak tabanyak di Pariaman jo daerah lain nan mangarajokan upacaro sarupo, kabanyakan panganuik Sunni. Di Bangkulu dikenal pulo jo namo Tabot.

Tabuik diturunkan ke laut di Pantai Pariaman, Sumatera Barat, Indonesia

Upacara malabuahkan tabuik ka lauik dilakukan satiok taun di Pariaman pado 10 Muharram sajak 1831.[1] Upacara iko dipakanalkan di daerah iko dek Pasukan Tamil Muslim Syi'ah dari India, nan ditampekkan di siko lalu kamudian bamukim pado maso kakuasaan Inggrih di Sumatera bagian baraik.[1].

Tugu tabuik di Pariaman

Tahapan[suntiang | suntiang sumber]

Ritual pambuatan tabuik dimulai jo pangambilan tanah dari sungai pado tanggal 1 Muharram. Tanah tu dilatakkan dalam pariuk tanah kamudian dibungkuih jo kain putiah, kamudian disimpan dalam lalaga nan ado di halaman rumah tabuik. Lalaga adolah tampek barukuran 3x3 meter nan dipagari jo parupuak, sajinih batuang ketek. Tanah nan dibungkuih jo kain putiah adolah parumpamaan kuburan Husain. Tampek ko ka diagiah atok jo kain putiah babantuak kubah. Tanah tu ka dibiakan disitu sampai dimasukkan ka dalam tabuik pado tanggal Muharram.

Pado tanggal 5 Muharram dilakukan proses manabang batang pisang jo caro sakali tabeh pado malam hari. Iko malambangkan parumpamoan kabaranian putra Imam Husain nan manuntuik kamatian bapaknyo. Prosesi dilanjuikkan pado tanggal 7 jo 8 muharram nan disabuik Maatam jo Maarak sorban. Maatam marupokan personifikasi mambawo jari-jari Husain nan baserakan ditabeh pasukan Raja Yazid. Sadangkan Maarak Sorban malambangkan diaraknyo bakeh sorban untuak manyiarkan kabaranian Husain mamarangi musuah.

Pado tanggal 10 Muharram pagi, diadokan prosesi Tabuik naiak pangkek, yaitu pamasangan bagian ateh tabuik. Kamudian Tabuik diarak hinggo akhianyo dibuang ka lauik.[2]

Festival Tabuik[suntiang | suntiang sumber]

Festival Tabuik marupokan bagian dari caro masarakaik marayokan tradisi Tabuik sacara tahunan. Katiko upacara adaik iko alah diakui dek pamarintah sabagai bagian baharago dari kahidupan babangso, makonyo festival Tabuik pun manjadi bagian dari bangsa Indonesia. Festival Tabuik alah balangsuang sajak puluhan tahun, disabuikkan bahsonyo festival iko alah balangsuang sajak abaik ka-19 Masehi. Festival Tabuik iko kini indak hanyo manjadi bagian dari adaik masarakaik satampek samato malainkan manjadi ciek dari banyak bagian dari komoditas pariwisata daerah. Fetival Tabuik dilaksanakan dalam ciek rangkaian untuak manghormati atau sabagai hari parayoan paringatan maningganyo cucu Nabi Muhammad SAW, nan banama Hussein bin Ali. Paringatan iko salalu dilaksanakan pado tanggal 10 Muharram sasuai jo hari maningganyo cucu nabi Muhammad SAW Hussein Bin Ali nan maningga dalam parang di Padang Karbala.[3]

Festival Tabuik pun marujuak kapado panggunoan bahasa arab ‘tabut’ nan bararti peti kayu. Namo tu mangacu kapado legenda paska kamatian cucu nabi, muncuanyo makhluk saikua kudo basayok jo kepa manusia. Makhluk itu disabuik Buraq. Dalam legenda itu dikisahkan bahsonyo peti kayu nan dibaok dek kudo bakapalo manusia itu berisi potongan jenazah Hussein. Badasarkan legenda itulah, dalam festival Tabuik salalu muncua makhluk tiruan buraq untuak mangusung peti kayu tabut di ateh pungguangnyo. Ritual iko baru muncua kiro-kiro tahun 1826-1828 Masehi. Tabuik pado tahun-tahun tu gadang bana pangaruah dari Timur Tengah nan dibaok dek katurunan India panganut Syiah. Kamudian pado tahun 1910 tajadi parubahan bantuak parayoan guno manyasuaikan jo adaik istiadaik masarakaik Minangkabau. Dek karano itu, festival Tabuik manjadi nan tajadi kini ko.

Festival Tabuik awalnyo hanyo ado satu yaitu tabuik pasa. Parubahan itu tajadi kiro-kiro tahun 1915 katiko ado sagolongan masarakaik mangajukan supayo tawujud tabuik dalam bantuak lain. tajadilah kasapakatan tabuik di buat di duo daerah, ciek di daerah Pasa sahinggo disabuik jo tabuik Pasa sarato Tabuik Subarang nan dilaksanakan di sabarang Sungai Pariaman.[3]

Tabuik Pasa barado di sisi selatan sungai nan mambalah kota sampai ka tapian Pantai Gandoriah. Wilayah Pasa dianggap sabagai asa muasa tradisi Tabuik dibantuak. Sadangkan Tabuik Subarang nan talatak di sabarang utara Sungai Pariaman disabuik sabagai kampuang Jao karano panduduak di situ marupokan pandatang dari Jao. Dalam sabuah riwayaik nan batarik tahun 1916 jo kiro-kiro tahun 1930an disabuikkan bahsonyo Tabuik Subarang dalam tata caro palaksanaannyo indak mangikuti tata cara Tabuik nan dilaksanakan di wilayah Pasa. Maskipun baitu, acara tatap balangsuang karano mamiliki ciek tujuan nan samo yaitu mamuliakan arwah cucu Nabi Muhammad SAW, Hussein Bin Ali. Festival Tabuik mulai masuak ka dalam kalender pariwisata tahunan Kabupaten Pariaman mulai tahun 1982. Dek karanonyo, palaksanaan Festival Tabuik di duo wilayah tu dipromosikan juo ka lua daerah untuak mandatangkan turis domestik jo asiang. Tujuannyo supayo palaksanaan festival indak hanyo sakadar untuak tradisi jo upacara adaik, malainkan supayo nilai adaik ko manjadi tanamo sacaro labiah lueh. Pantai Gandoriah manjadi titik pusek acara festival Tabuik. Titik puncak acara festival ko barupo arak-arakan tabuik sampai ka pantai jo dilarung. Kameriahan acara jo tata upacara iko manarik perhatian masyarakat luas, jo kini manjadi ciek dari banyak agenda wisata budayo tahunan Kabupaten Pariaman.[3]

Prosesi Upacara jo Makna[suntiang | suntiang sumber]

Dalam satiok upacara adaik di Indonesia, pasti ado makna di baliak satiok rangkaian upacaranyo. Rangkaian upacara Tabuik mamiliki prosesi atau ritual nan disabuik jo Maarak Jari-jari. Makna dari ritual iko parnah dijalehkan dek tokoh tuo Tabuik Nagari Subarang Nasrun Jon. Makna dari ritual Maarak Jari-Jari iolah pangumpamoan jasad cucu Nabi Muhammad SAW nan maningga dek tabunuah. Dalam prosesi tu diadoan replika atau bantuak tiruan jari-jari manusia nan dimasuakkan ka dalam panja atau wajah. Tiruan iko kamudian diarak ka saluruah wilayah kota. Upacara iko dilanjuikkan jo upacara patamuan atau prosesi nan disabuik jo ritual Basalisiah. Acara iko marupoan patamuan kaduo balah pihak antaro palaksana Tabuik.[4]

Jadi, dalam palaksanaan ritual Tabuik ko ado duo balah pihak, misalkan pihak selatan jo utara dari satu wilayah. Kaduonyo ka saliang bataruang katiko Basalisiah balangsung. Kaduo kubu ka saliang manyarang, mereka malemparan gandang tasa sampai tajadi bentrokan. Tradisi iko sabagai pangingek parang nan parnah tajadi jo manewaskan Hussein bin Ali cucu Nabi Muhammad SAW. Dalam palaksanaan Basiliah sakileh saolah-olah masarakaik saliang mandendam karano tajadi bentrokan. Sasungguhnyo indak takah itu, karano palaksanaannyo hanyolah bagian dari upacara untuak manggambarkan carito kamatian Hussein. Sabalum Ritual Maarak Jari-jari dilaksanakan, sahari sabalumnyo dilaksanakan Prosesi ritual maradai. Prosesi iko barisikan kagiatan masarakaik dalam mamintak sumbangan. Dalam ritual iko masarakaik Tabuik ka malibaikkan masarakaik untuak mambarikan sumbangan saikhlasnyo. Sumbangan nan didapekkan kamudian digunakan untuak palaksanaan acara sampai salasai.[4]

Alat Musik Gandang Tabuik[suntiang | suntiang sumber]

Dalam satiok upacara adaik salalu ado alat pangiriang untuak mangiringi tiok ritual. Hal nan samo jo ado di dalam upacara adaik Tabuik. Alat nan digunokan untuak mangiringi upacara adaik iko adolah alat musik gandang tasa atau tanamo sacara lueh sabagai gandang tabuik. Alat upacara iko digunakan untuak mangiringi acara nan balangsuang sajak tanggal 1 sampai 10 Muharram. Satiok kali acara dimulai, gandang tabuik atau gandang tasa ka ditabuah sacaro taruih manaruih. Ado formasi khusus salamo gandang ditabuah, formasinya tadiri dari 7 urang panabuah jo formasinyo balapih-lapih karano gandang harus dibunyikan. Jika ciek alah panek, ka digantikan sacaro taruih-manaruih dek urang lain. Formasi iko manimbuakan suara riuh. Katukan gandang disasuaikan jo prosesi upacara. Misalnyo, jika ritual paparangan sadang balangsuang maka gandang ka ditabuah saolah-olah bana-bana tajadi paparangan gadang di sakitara mereka. Gandang iko indak hanyo marefleksikan samangaik jo kabaranian Husein tapi mangantarkan mereka manuju medan parang dek indak pernah manyarah.[5]

Bantuak jo Ukuran Gandang Tabuik[suntiang | suntiang sumber]

Bantuak gandang tabuik mamiliki duo muko nan bisa ditabuah. Muko gandang tabuik atau gandang tasa dibuek dari kulik kambiang. Tinggi gandang kiro-kiro 54 centimeter jo diameter mancapai 46 centimeter. Bantuaknyo bana-bana mirip jo bedug, bisa lo dikecekan mirip jo gandang biaso, nan mambedakannyo iolah hiasan di sakitar gandang nan bawarna-warni, jo katiko ditabuah suaronyo sangaik nyariang. Caro mamainkan gandang jo pola ritmis sarato cinderung monoton. Variasi pamainannyo muncua katiko ado parubahan ritual jo lagu nan dibaokannyo. Babarapo lagu wajib dalam palaksanaan upacara tabuik iolah Oyak Tabuik, Katidiang Sompong, jo Kareta Mandaki. Nyanyian lagu-lagu tu diiringi jo tabuahan gandang iko, salamo itu lo tetua adaik ka mamimpin upacara. Gandang tabuik bisa ditabuah sademikian rupo katiko mangiringi upacara Maatam, katiko di mano urang padusi maratoi kamatian Husein jo para laki-laki nan gugua dalam parang. Bunyi nan tadanga dari tabuahan gandang ko bisa taraso sangaik manyedihkan hinggo mambarikan kesan sadiah nan sangek mandalam. Dapek dikatokan gandang tasa adolah perkusi nan kayo irama, panabuhnyo harus pandai mamainkan gandang ko supayo bisa manimbuakan irama nan bavariasi. Kabaradoan alaik musik ko sangaik pantiang untuak palaksanaan upacara karano marupokan instrumen pantiang untuak mangiringi jalannyo upacara. Dek manggunokan alat iko, upacara bisa bajalan labiah hikmat.[5]

Rujuakan[suntiang | suntiang sumber]

  1. a b Bachyul Jb, Syofiardi (2006-03-01). "'Tabuik' festival: From a religious event to tourism". The Jakarta Post. 
  2. Rita dkk, Nariswari (2013). Atraksi Budaya Nusantara. Jakarta: Pusat Data dan Analisis Tempo. pp. 3. 
  3. a b c https://www.indonesiakaya.com/jelajah-indonesia/detail/festival-tabuik-perhelatan-akbar-masyarakat-pariaman
  4. a b https://travel.tempo.co/read/1127726/asyura-makna-bentrokan-di-balik-pesta-budaya-tabuik-pariaman/full&view=ok
  5. a b Elian, Novi; Dalmeda, M. A. (2017-08-21). "MAKNA TRADISI TABUIK OLEH MASYARAKAT KOTA PARIAMAN (STUDI DESKRIPTIF INTERAKSIONISME SIMBOLIK)". Jurnal Antropologi: Isu-Isu Sosial Budaya (dalam bahasa Indonesia). 18 (2): 135–150. doi:10.25077/jantro.v18.n2.p135-150.2016. ISSN 2355-5963. 

Pautan lua[suntiang | suntiang sumber]