Sulaman Koto Gadang
Sulaman Koto Gadang adolah teknik karajinan tangan manghias kain jo banang nan dikarajoan sacaro tradisional dek masarakaik Koto Gadang, di Kecamatan IV Koto, Kabupaten Agam, Sumatra Barat. Sulaman ko dihasiakan dari pangatahuan masarakaik Koto Gadang dalam mambantuak jalinan banang di ateh kain nan diwariskan sacaro turun-tamurun. Pangarajoannyo samo sakali indak manggunokan teknologi masin, malainkan manggunokan paralatan sadarhana jo bagantuang pado katarampilan tangan.[1]
Sulaman Koto Gadang banyak dibuek untuak hiasan salendang, baju kuruang, jo paralatan adat. Kabanyakan motif sulam adolah bungo jo daun. Hasia karajinan sulam alah manjadi bagian kalangkapan pakaian adaik padusi Koto Gadang. Panggunoan kain sulam arek kaitannyo jo adaik. Kain basulam bawarna cerah jo sulaman nan rapek digunokan untuak kabutuahan panikahan. Adopun kain bawarna tuo jo sulaman nan jarang dipakai dek padusi nan alah bakaluarga jo baumua lanjuik.[2] Walaupun pado maso kini ko muncua banyak macam salendang, salendang basulam masih manjadi pilihan utamo masarakaik Koto Gadang untuak dipakai saat mahadiri bamacam-macam pahelatan.[3]
Di antaro teknik sulaman Koto Gadang nan masih digunokan saat ko yakni teknik sulaman suji caia jo kapalo samek. Sulam suji caia mancaliakkan pamainan gradasi warna banang nan saliang manyatu sahinggo manghasiakan bantuak bungo nan nampak hiduik.[4] Adopun sulam kapalo samek karano dalam pambuatannyo banang dikaikkan jo dijujuik sampai ujuang samek sahinggo manghasiakan bantuak bulek di ateh kain.[5]
Pangatahuan jo katarampilan mambuek sulaman Koto Gadang diwarihkan sacaro turun-tamurun, umumnyo dari ibu ka anak padusi. Saat kini, masih banyak ditamukan padusi Koto Gadang nan manakuni sulaman sarato bahkan manjadikannyo sabagai mato pancarian tambahan. Nan unik di sulaman Koto Gadang talatak dari proses pambuatan, motif, jo detail pangarajoan. Dek karano itu, sulaman ko mamiliki nilai jua nan relatif tinggi, hinggo mancapai jutaan rupiah per halainyo.[6][7] Namun, rumiknyo pangarajoan mambuek sulaman Koto Gadang bisa mambutuahkan wakatu panyalasaian duo bulan.[8]
Sijarah
[suntiang | suntiang sumber]Katerampilan manyulam alah bakembang di Koto Gadang satidaknyo sajak abad ka-16.[9] Hampia satiok rumah tanggo di Koto Gadang, tarutamo nan mamiliki anak padusi, pandai manyulam. Pangatahuan manyulam diwarisi sacaro turun tamurun dari urang tuo ka anak. Dalam pandangan adaik, anak padusi dipandang tahormat jikok paralatan nan dipakai katiko manikah, takah salendang, adolah hasia sulaman surang. Salendang basulam Koto Gadang marupokan bagian kalangkokkan pakaian adaik.[10][11] Dek karano itu, satiok rumah tanggo di Koto Gadang mampunyoi sakurang-kurangnyo sahalai salendang.[12]
Pado awalnyo, salendang basulam Koto Gadang hanyo dipakai dek urang Koto Gadang jo tabu apobilo dipakai dek urang di luar Koto Gadang. Bahkan, katarampilan manyulam indak diajakan kapado urang nan indak asli Koto Gadang. Sulaman Koto Gadang mulai tanamo sajak badirinyo Karajinan Amai Setia pado 1911. Didirikan dek Roehana Koeddoes, sikolah tu mangajarkan bamacam-macam katarampilan rumah tanggo untuak padusi, tamasuak manyulam, baiak untuak padusi Koto Gadang maupun dari lua Koto Gadang. Lamo kalamoan, salendang basulam Koto Gadang dikenal dek urang jo bahkan banyak pesanan ka selendang tu. Salah saurang kawan Roehana nan baprofesi sabagai saudagar, Hadisah mamasarkan hasia sulaman Koto Gadang ka bini pajabaik-pajabaik Balando untuak dipakai atau dikirimkan ka kolega mereka di lua Minangkabau, yakni Eropa.[13][2] Samantaro itu, rekan Roehana nan lain, Rukbeny mamperkenalkan salendang basulam Koto Gadang ka lua daerah Sumatra Barat.[14]
Sajak Karajinan Amai Setia badiri, kagiatan manyulam manjadi pakarajoan nan disanangi padusi Koto Gadang. Salain dapek manghasiakan uang, pakerjaan manyulam bagi padusi dianggap sabagai pakarajoan nan mulia.[13] Padusi dapek bakarajo di dalam rumah sambia manguruih kaluarga. Saat kini, sulaman Koto Gadang manjadi produk nan diincar padusi Paris jo Balando. Meski indak takah abaik ka-19, padusi Koto Gadang masih manghasiakan kain basulam aneka motif jo caro pangarajoan.[2]
Panyabutan sulaman kadang disamokan jo bordir karano mamiliki kasamoan. Pabedaannyo talatak di hasia jo cara pangarajoannyo. Manuruik Ernatip, paneliti Balai Palestarian Sijarah jo Nilai Tradisional (BPSNT) Padang, panyabutan bordir di Minangkabau identik jo sabuah kain nan mamiliki hiasan nan dibuek dek teknologi masin, sadangkan apabilo hiasan dikarajoan jo katerampilan tangan mako labiah tanamo jo sabutan sulaman.[13] Baiak sulaman maupun bordir masih tetap eksis dalam masarakaik Minangkabau sabagai salah ciek warisan masa lampau.[7]
Paralatan jo bahan
[suntiang | suntiang sumber]Teknologi pambuatan sulaman Koto Gadang masih manggunokan teknologi tradisional.[15] Paralatan utamo untuak manyulam tanamo jo pamedangan. Ukurannyo 200 x 60 cm. Pamedangan tabuek dari kayu pado bagian karangkanyo. Kaampek kayu dirangkaikan manjadi ampek parsegi panjang jo paku. Tinggi pamedangan yaitu kiro-kiro 30 cm mangikuti ukuran standar nan mamudahkan bagi panyulam untuak duduak basimpuah ataupun maluruihkan kakinyo di bawah pamedangan katiko manyulam.[16][17]
Untuak manyulam kain nan baukuran ketek, takah saputangan, bungo baju, jo saruang banta mako digunokan alaik banama ram.[18] Ram babantuak bundar jo diameter kiro-kiro 20 cm sampai 50 cm. Ram tabuek dari duo buah basi ataupun kayu nan dibantuak malingka jo manggunokan alaik pangunci.[19]
Paralatan utamo dalam manyulam barikuiknyo yakni kelos. Kelos bafungsi untuak mangguluang banang. Kelos tabuek dari batang kulik manih jo panjang kiro-kiro 15 cm sampai 20 cm. Jumlah kelos bagantuang pado banyak warna banang nan ka digunokan.[20]
Adapun alaik bantu dalam mambuat sulaman yakni karton manila atau karateh minyak untuak mambuek pola, karateh karbon untuak mamindahkan pola, jarum jahit untuak mambuek aneka tusukan pado kain, jo guntiang untuak mamutuih banang. Kasederhaan paralatan mambuek proses pambuatan sulaman Koto Gadang manjadi lamo jo rumik sarato mambutuahkan kapiawaian atau keahlian dari panyulam karano samato-mato mangandalkan pakarajoan tangan jo indak masin.[16][21]
Samantaro itu, bahan-bahan nan digunokan untuak manyulam yakni kain jo banang. Kain nan digunokan yaitu kasado jinih kain takah katun, linen, sutra, atau wol.[16] Ukuran kain nan standar adolah duo meter untuak panjang jo lebar nan bavariasi dari 50 cm hinggo 75 cm, tapi ukurannyo gadang nan standar adolah 50 cm.[22] Adapun banang sulam dapek barupo banang mauline jo banang katun.[23]
Rujuakan
[suntiang | suntiang sumber]- ↑ Ernatip 2012, hlm. 74.
- ↑ a b c Kompas.com 27 September 2013.
- ↑ Ernatip 2012, hlm. 134.
- ↑ Ernatip 2012, hlm. 112.
- ↑ Ernatip 2012, hlm. 114.
- ↑ Kemenperin.go.id 18 Juni 2013.
- ↑ a b Ernatip 2012, hlm. 76.
- ↑ Metrotvnews.com 16 Juni 2017.
- ↑ Ernatip 2012, hlm. 92.
- ↑ Ernatip 2012, hlm. 90.
- ↑ Ernatip 2012, hlm. 131.
- ↑ Ernatip 2012, hlm. 124.
- ↑ a b c Ernatip 2012, hlm. 75.
- ↑ Ernatip 2012, hlm. 132.
- ↑ Ernatip 2012, hlm. 79.
- ↑ a b c Doni Rahman 2015, hlm. 12.
- ↑ Ernatip 2012, hlm. 94.
- ↑ Ernatip 2012, hlm. 93.
- ↑ Ernatip 2012, hlm. 97.
- ↑ Ernatip 2012, hlm. 101.
- ↑ Ernatip 2012, hlm. 107.
- ↑ Doni Rahman 2015, hlm. 8.
- ↑ Doni Rahman 2015, hlm. 6.
Daptar pustaka
[suntiang | suntiang sumber]- Ernatip (2012). "Sulaman sebagai Manifestasi Teknologi Pakaian Tradisional: Kasus Nagari Kota Gadang, Kecamatan IV Koto, Kabupaten Agam, Sumatera Barat". Bunga Rampai Budaya Sumatera Barat, Budaya Masyarakat Minangkabau: Seni, Teknologi Tradisional, dan Hubungan Antar Budaya. Jakarta: Kementerian Pendidikan dan Kebudayaan Republik Indonesia. http://repositori.kemdikbud.go.id/10876/1/bunga%20rampai%20budaya%20sumatera%20barat.pdf.
- Ranelis; Washinton, Rahmad (2016). Rendo Bangku Koto Gadang. Padang Panjang: ISI Padang Panjang. https://books.google.co.id/books?id=Nr1sDwAAQBAJ&printsec=frontcover&hl=id&source=gbs_ge_summary_r&cad=0#v=onepage&q&f=false.
- Doni Rahman (2015). "Ragam Hias Suji Cair pada Sulaman Selendang Koto Gadang Kabupaten Agam Sumatera Barat (Studi Kasus di Yayasan Amai Setia)". Journal Home Economic and Tourism. 9 (2).
- "Diklat Sulam Rendo Rajut Minang BDI Padang Bekerja Sama dengan UPTD Kerajinan Industri Kota Bukittinggi". Kemenprin.go.id. Kementerian Pertahanan Republik Indonesia. 18 Juni 2013. Diarsipkan dari versi asli tanggal 2021-05-22. Diakses tanggal 2021-05-22.
- "Melihat Proses Pembuatan Kain Sulam Koto Gadang". Metrotvnews.com. MetroTV. 16 Juni 2017. Diarsipkan dari versi asli tanggal 2019-04-17. Diakses tanggal 2021-05-22.
- "Jejak Perempuan Koto Gadang". Kompas.com. 27 September 2013.
- Sri Mindayani (2017). "Pengaruh Sikap Kerja terhadap Keluhan Muskuloskeletal pada Perajin Sulaman Tangan di Nagari Koto Gadang Sumatera Barat" (PDF). [pranala nonaktif permanen]
- Evieta Fadjar (26 November 2012). "Merawat Budaya Melalui Selendang Sulam Suji Cair". Tempo.co.[pranala nonaktif permanen]
- Adityawarman (8 April 2011). "Museum Nasional Gelar Pameran Khas Koto Gadang". Antaranews.com. LKBN Antara.
- "Sulam Terpanjang di Dunia Mendapatkan MURI". Tempo.co. 5 Oktober 2012.[pranala nonaktif permanen]
- Christoporus Wahyu Haryo P. (4 Oktober 2012). "Sulam Sumbar Terpanjang di Dunia". Kompas.com.