Struktur sosial

Struktur sosial adolah suatu tingkatan dalam masyarakaik. Sala ciek jinih contoh konkret dari struktur sosial adolah sistem kasta. Manuruik Abdul Syani, struktur sosial dapek diartian sabagai suatu tatanan sosial nan ado pado masyarakaik nan marupoan juo jariangan dari unsua-unsua sosial nan pokok. Proses pambantukan struktur sosial dipangaruahi dek babarapo hal, sarupo; partamo, panamuan-panamuan baru dalam hal ilimu pangatahuan jo teknologi. Kaduo, hubuangan-hubuangan sosial nan basipaik kolektif sarupo nan tajadi di parusahaan, birokrasi, sistem matrimonial, jo lain-lain, dan katigo adonyo doktrin-doktrin paham tatantu, sarupo humanisme, liberalisme, demokrasi, kapitalisme, dan lain sebagainya. Sacaro konseptual, konsep struktur sosial manggunoan duo pandekatan sosiologis yaitunyo; nan partamo pandekatan fungsionalisme; manjalehan struktur sosial sabagai pola-pola atau susunan nan dapek diliek dalam kahidupan sahari-hari. Kaduo, pandekatan realisme; manjalehan bahwasanyo struktur sosial marupoan prinsip-prinsip nan mandasari susunan sosial, nan mungkin indak taliek.

Unsur-unsur struktur sosial

Manuruik Charles P. Loomis, struktur sosial tasusun ateh sapuluah unsur pantiang yaitunyo:

• Unsur pangatahuan jo kayakinan nan dipunyoi dek para anggota masyarakaik nan bafungsi sabagai alaik analisis dari anggota masyarakaik.
• Unsur parasaan solidaritas dari anggota-anggota masyarakaik
• Unsur tujuan jo cito-cito nan samo dari warga masyarakaik.
• Unsur nilai-nilai jo norma-norma sosial nan dijadian sabagai patokan sarato padoman dek anggota masyarakaik dalam batingkah laku.
• Unsur kaduduakan jo paranan sosial nan mangarahan pola-pola tindakan atau parilaku warga masyarakaik
• Unsur kakuasaan, barupo kamampuan mamarintah dari anggota masyarakaik nan mamegang kakuasaan, sahinggo sistem sosial dapek balanjuik
• Unsur tingkatan dalam sistem sosial nan ditantuan dek status jo paranan anggota masyarakaik.
• Unsur sistem sanksi nan barisikan ganjaran jo hukuman dalam sistem sosial, sahinggo norma tetap tapaliharo
• Unsur sarana atau alaik-alaik palengkapan sistem sosial, sarupo pranata sosial jo lembago
• Unsur sistem katagangan, konflik, jo panyimpangan nan manyaratoi adonyo pabedaan kamampuan jo parsepsi warga masyarakaik.

Fungsi struktur sosial

Manuruik Mayor Polak struktur sosial bafungsi sabagai panakan kamungkinan palanggaran tahadok norma, nilai, jo paraturan kalompok atau masyarakaik. Misalnyo pambantuakan lembago pangadilan, kapolisian, lembago adat, lembago pendidikan, lembago agamo, jo lain-lain. Strukur sosial manjadi dasa untuak mananamkan suatu disiplin sosial kalompok atau masyarakaik karano struktur sosial barasa dari kalompok atau masyarakaik itu sandiri. Dalam proses tasabuik, individu atau kelompok akan mandapek pangatahuan jo kasadaran tentang sikap, kabiasaan, jo kapacayoan kalompok atau masyarakaiknyo. Individu mangatahui jo mamahami pabuatan apo nan dianjuaan dek kalompoknyo sarato pabuatan apo nan dilarang dek kalompoknyo.

Klasifikasi struktur sosial

Stratifikasi sosial

Stratifikasi sosial marupoan tingkatan antar masyarakaik nan mampunyoi pabedaan nilai sarato biasonyo dapek taliek jaleh pabedaan tingkatannyo. Stratifikasi Sosial iko tabagi pulo manjadi 3 jinih yaitunyo stratifikasi sosial tatuik, stratifikasi sosial tabukak, jo stratifikasi sosial campuaran. Salain itu pabedaan tajadinyo stratifikasi sosial iko tajadi karano mamparatian babarapo hal yaitunyo tingkek kakayoan, latar balakang pandidikan, jo kakuasaan nan di pacik.

Diferensiasi sosial

Diferensiasi sosial adolah pambagian golongan-golongan di masyarakaik nan biasonyo mampunyoi nilai satara atau samo. Manuruik Soerjono Soekanto, diferensiasi sosial adolah variasi pakerjaan, prestise, jo kakuasaan kalompok dalam masyarakaik nan dikaikan jo interaksi atau akibaik umum dari proses interaksi sosial nan lain. Adonyo diferensiasi sosial ditandoi dek 3 ciri, yaitunyo: ciri fisik, ciri budaya, jo ciri sosial. Diferensiasi sosial mampunyoi babarap jinih, yaitunyo: diferensiasi ras jo etnisitas, diferensiasi suku, diferensiasi klan, diferensiasi agamo, diferensiasi okupasi, diferensasi primordial.