Silek Langkah Tigo

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Silek langkah tigo acok disabuik jo langkah garak langkah kareh sacaro teknik. Karakter silek aliran iko condong mamakai garakan praktis dalam sabuah pataruangan. Langkah tigo marupokan kajian dasar nan maliputi kasado pamahaman leluhur Minangkabau sarupo nan diisyaraikkan dalam tambo jo tigo namo tokoh utamo, yaitu Maharajo Alif, Maharajo Dipang, jo Maharajo Dirajo. Kasadonyo maisyaraikkan dasar sagalo sasuatu di Minangkabau. Tigo tokoh utamo tasabuik maisyaraikkan kajadian alam nan tadiri dari zat, sifaik jo wujuik sabagaimano hasia panalitian ilmuan tantang kajadian alam nan dikenal jo teori Big Bang. Dalam teori Big Bang tadapaik tigo jinih materi nan mamungkinkan yaitu materi galok dingin, galok angek, jo materi barionik.[1]

Badasarkan pangatahuan umum, langkah tigo maisyaraikkan tigo kapandaian nan harus dipunyoi dek pandeka silek, yaitu kapandaian intelektual, kapandaian emosional, jo kapandaian spiritual. Pandeka paralu mampunyoi katigonyo supayo dapek mamahami hakikek silek jo bela diri nan sajati sahinggo dapek manciptokan garak langkah silek sampurna nan dikontrol dek tigo kacardasan dalam diri manusia.

Kok disusuri dari wilayah utamo Minangkabau, nan tadiri dari luhak nan tigo. Tigo luhak bahubuangan jo kapandaian emosional tadi. Luhak Tanah Data diistilahkan sabagai Luhak nan Tuo sabagai isyaraik rongga di ateh badan manusia nan ado dikapalo. Luhak Agam maisyaraikan rongga tangah badan manusia, yaitu dado. Luhak Limopuluah Kota maisyaraikkan rongga bawah badan manusia, yaitu paruik.

Dalam konteks silek, langkah tigo mangecek tantang tigo pamahaman, diantaronyo pamahaman kabatinan hakikek kahidupan, pamahaman kasaimbangan sabagai dasat kabanaran, sarato pamahaman garak langkah sabagai dasar kataraturan. Katigo pamahaman tasabuik, tabantuaklah silek nan diarokkan dapek malahiakan pandeka nan sabananyo, yaitu urang-urang nan kayo jo ilimu pangatauan nan tanamo jo istilah cadiak pandai.[1]

Rujuakan[suntiang | suntiang sumber]

  1. a b Ensiklopedia Silek Minangkabau. Padang: Dinas Kebudayaan Sumatera Barat. 12 Juli 2019. pp. 97-98.