Tambo
Tambo barasal dari baso Sansekerta, Tambay nan aratinyo Bamulo. Tambo dalam tradisi masyarakaik Minangkabau marupokan suatu warih turun-tamurun nan disampaikan sacaro lisan[1]. Panulisan tambo ko, partamo kali basobok dalam bantuak tulisan Arab. Salanjuiknyo panulisan dalam bantuak Latin dikana baru pado awal abaik ka 20, nan isinyo adolah mambandingkannyo jo babarapo bukti sajarah nan bakaitan[2]. Walaupun basipaik mitologi, legenda jo imajinasi bacampua aduak dalam tambo ko, dek bak itu dari tambo tu masih dapek manolong panaliti untuak mangana Budayo Minangkabau itu sandiri[3].
Tambo di Minangkabau biasonyo tabagi ateh duo bagian:[4]:
- Tambo alam, nan mancaritokan asa usua ninisk moyang sarato tantang karajaan Minangkabau.
- Tambo adaik, nan mangisahkan adaik jo sistem sarato undang-undang tantang pamarintahan Minangkabau di maso lalu.
Dalam panyampaian kisah tambo ko, indak pakai sistematika tatantu, kisahnyo kadang disasuaikan bagi kaparluan jo kaadaan. Jadi tambo ko marupokan karya sastra nan manjadi punyo basamo, sahinggo isi kisahnyo dapek barubah-rubah manuruik kasanangan pandanganyo[4].
Tambo Alam Minangkabau
[suntiang | suntiang sumber]Dari mano titiak palito, dari telong nan batali, dari mano asa-asua niniak moyang kito, dari ateh puncak gunuang marapi.
(Tambo Alam Minangkabau)
Dalam Tambo Alam Minangkabau, dikabakan carito balayianyo anak-anak bujang laluhua moyang Aleksander nan Aguang (Rajo Iskandar Zulkarnain) tigo basudaro basamo Nabi Nuh katiko banjir satenggi langik,[5] nan paliang tuo banamo Maharajo Alif, nan tangah Maharajo Dipang, nan bungsu banamo Maharajo Dirajo, dakek pulau Sailan tajatuah mahkota (mangkuto) ameh ka lauik. Kasado ândai silam alah diparintahkan maambiak jo mancari nyo. Tapi usaho itu indak ado hasil karano mahkota tu dibauik ula bidai di dasa lauik. Cati Bilang Pandai maimbau pandai ameh untuak mambuek mangkuto palasu. Dek pandai ameh manggunokan camin taruih, dapeklah inyo mambuek mangkuto nan samo. Dek Cati, untuak manyimpan rahasia, dibunuahlah si pandai ameh tu. Katiko Sri Majarajo Dirajo tajago, diambiak baliau mangkuto tu dan dipakai.
Duo urang kakak baradiak nan lain tajago jo mancaliak si bungsu manguasai mangkuto. Batangka katigo badunsanak tu. Akhianyo, urang-urang tu bapisah. Sri Maharajo Alif ka Baraik manjadi rajo di Banua Ruhum. Sri Maharajo Dipang ka Timur mamarintah Cino jo Japang. Dan Sri Maharajo Dirajo taruih balayia ka selatan. Salain mambao pamaisurinyo, Maharajo Dirajo juo mambawo Harimau Champo, Kuciang Siam, Kambiang Utan dan Anjiang Mualim.
Salapeh balayia sampailah urang-urang tu di suatu tampek nan banamo Lagundi nan baselo, sataruihnyo sampai ka Gunuang Marapi, nan samulo sagadang talua itiak, lalu mayentak naiak, sadangkan lauik mayentak turun. Sudah tu ditagak an lah nagari nan banamo Pariangan.
Tambo Adaik Minangkabau
[suntiang | suntiang sumber]Adaik bagi Urang Minangkabau adolah "Kain dipakai usang, adaik dipakai baru", mukasuiknyo pakaian jiko dipakai taruih akan usang, tapi adaik dipakai taruih manaruih sanantiaso tagok. Dek itu adaik tatok indak barubah.
Adaik dalam masarakaik Minangkabau ado ampek kategori:
- "Adaik nan sabana adaik, adaik nan usali, indak lapuak dek hujan indak lakang dek paneh, dicabuik indak mati diasak indak layua."
- "Adaik istiadaik, marupokan kabiasoan nan balaku di tangah masyarakaik."
- "Adaik nan diadaikkan, marupoan undang-undang sarato hukum nan balaku."
- "Adaik nan taradaik, marupokan suatu konsensus atau mupakaik basamo dari masyarakaik."
Caliak juo
[suntiang | suntiang sumber]Rujuakan
[suntiang | suntiang sumber]- ↑ Sangguno Diradjo, Dt. (1954), Tambo Alam Minangkabau, Balai Pustaka.
- ↑ Batuah A. Dt., Madjoindo A, Dt., (1957), Tambo Minangkabau, Jakarta: Balai Pustaka.
- ↑ Djamaris E., (1980), Tambo Minangkabau: tinjauan struktural, Seminar Internasional mengenai Kesusastraan, Kemasyarakatan dan Kebudayaan Minangkabau, Bukittinggi.
- ↑ Mansoer, M.D., (1970), Sedjarah Minangkabau, Jakarta: Bhratara.
