Patantangan antaro Islam jo adaik Minangkabau
Patantangan antaro Islam jo Adaik Minangkabau
Islam pasti marupokan agamo saluruah urang Minang, baitulah aturan dalam adaik Minang, sahinggo urang Minang nan kalua dari Islam sacaro otomatis kalua dari statusnyo sabagai urang Minang, karano suku/status sabagai urang Minang adolah bagian dari adaik, bukan hanyo sakadar takaik hubungan darah dari garih katurunan ibu ataupun ayah. Namun baitu, antaro ajaran Islam jo adaik minangkabau ko banyak hal nan dipatantangkan, bahkan dek urang Minang sandiri, karano mungkin pamahaman adaik Minang nan masih kurang.
Diantaronyo ado masalah warih, Islam ado maatur untuak mawarihan harato urang tuo bukan hanyo ka anak padusi sajo, namun malah labiah banyak ka laki-laki dibandiangkan ka anak padusi. Sadangkan dalam adaik Minang, harato diturunan ka anak padusi. Sabananyo, pusako dibaliakkan ka kamanakan, sadangkan harato pancarian diturunan ka anak.[1]
Namun baitu, walaupun disabuik warih, sabananyo di dalam adaik Minang indaklah maatur warih nan sabana warih nan dimakasuik dalam agamo Islam. Pado dasarnyo, warih adolah harato kapunyoan pribadi urang nan mawarihkan jikok alah maningga taruntuak ka urang nan manjadi pawarih. Ado duo hal nan harus diingek dalam hal iko. Nan partamo, warih hanyolah takaik harato jikok nan mawarihkan alah maningga. Sahinggo harato urang nan alun maningga jikok ado agiah-paragiah indak tamasuak samo sakali ka dalam urusan warih nan dimakasuik dalam agamo Islam. Sadangkan harato adaik nan diagiah ka anak dalam adaik Minang indak salalu jikok ado nan maningga sajo. Nan kaduo, warih adolah urusan harato kapamilikan pribadi. Sahinggo harato nan kapunyoan kaum (harato pusako tinggi), itu indak masuak ka dalam urusan warih nan di atur dalam agamo Islam. Ibaraik harato kapamilikan kantua bupati atau utang ateh namo kantua bupati (daerah), jikok bupati maningga tantunyo harato/utang kapunyoan kabupaten indak diwarihkan ka kaluarga si bupati nan alah maningga tu, karano itu indak harato/utang kapamilikan pribadi si bupati nan alah maningga, namun harato/utang kabupaten. Sadangkan untuak harato pancarian/harato kapunyoan pribadi (harato pusako randah), jikok sampai takaik warih, itu diatur sasuai aturan dalam agamo Islam. Jikok ado nan dalam prakteknyo indak sasuai agamo Islam, itu karano pamahaman masyarakaik sajo nan mungkin alah kurang tantang masalah adaik Minang jo agamo Islam.
Salain masalah warih, di dalam agamo Islam ayah batangguangjawek panuah untuak anaknyo. Sadangkan dalam adaik Minang, mamak sato pulo dalam batangguangjawek untuak kamanakannyo. Sabananyo, ado papatah Minang nan babunyi “anak dipangku, kamanakan dibimbiang.” Anak disakolahan, kamanakan dibantu, sakironyo kalau ayahnyo indak barado. Sasuai istilah, itu artinyo tangguangjawek adaik dari mamak untuak "mambimbiang" kamanakannyo, indak ka mangurangi tangguangjawek ayahnyo (sacaro adaik maupun sacaro agamo) untuak "mamangku" anaknyo.
Salain itu, dalam ajaran Islam, ayah nan batangguangjawek mancari minantu, sadangkan manuruik adaik Minangkabau mamak nan batangguangjawek. Untuak hal nan iko, saroman tadi juo jaweknyo.
Lain halnyo sistem katurunan di dalam agamo islam jaleh-jaleh manunjuakkan kalau sistem katurunan diturunan dari ayah. Sadangkan manuruik adaik Minang, sistem katurunan diturunan dari ibu, iko disabuik sistem matrilineal. Sistem matrilineal ko babeda pandang jo Islam, karano dalam sistem ko anak mandapek suku dari ibu tapi tatap namonyo manyandang bin/binti ayahnyo. Kalau anak mandapek suku dari ibu harusnyo anak manyandang pulo bin/binti ibunyo. Tatapi iko jaleh bana batantangan jo agamo Islam, jadi dalam manyandang bin/binti ko tatap diturunan dari garih katurunan ayah.
Dalam sistem matrilineal ko padusi panantu dalam pawarihan dan garih katurunan pamimpinan jo hak tatuo jo gala bagilia. Sadangkan dalam ajaran Islam yang manganuik sistem patrilineal, kuaso sapanuahnyo di tangan suami. Istri jo anak-anak kahidupannyo talatak di pundak suami.
Nan sabananyo, katurunan sacaro darah atau DNA pastilah dari kaduo urangtuo si anak, bukan dari ayah sajo atau dari ibu sajo. Namun baitu, nan diatur sacaro agamo Islam adolah wali nasab. Dalam adaik Minang, nasab tatap sasuai sakaligus harus sasuai jo aturan Islam. Misalnyo untuak manikahkan anak padusi, indak mamak nan manikahkan anak padusi, tatap pihak nan sasuai garih nasabnyo dalam agamo Islam nan buliah manikahkannyo.
Suku/kaum adolah adaik, nan sasuai jo aturan adaik suatu kaum. Misalnyo, bahkan sabalum Nabi Muhammad SAW lahia, di Arab alah pakai sistem garih katurunan ayah, alah pakai bin/binti juo. Namun untuak urang Minang, pamakaian bin/binti ko mampajaleh pasoalan nasab dan ado dipakai dalam ijab qabul panikahan, bin/binti ko tatap dipakai, dan itu pastilah dan haruslah ayah dari si anak. Dalam adaik Minangkabau-pun, mamak tataplah mamak, ayah tataplah ayah, mamak indaklah ayah, ayah indaklah mamak, sahinggo bin/binti itu indaklah ado masalahnyo, karano itu nan namonyo bin/binti ko pasti ayahnyo.
Nan diatur dalam adaik Minangkabau, suku badasarkan garih katurunan ibu (matrilineal). Banyak juo nabi-nabi dalam ajaran agamo Islam, barasa dari bani/suku/kaum Israil. Bani Israil pun ado mamakai sistem garih katurunan ibu, bahkan sampai kini. Jikok sistem matrilineal itu adolah hal salah, tantunyo nabi-nabi itu akan mangatokan ka kaumnyo untuak maninggakan hal itu. Sakurangnyo, Nabi Muhammad SAW tantunyo akan ado manaruihkan firman atau mangaluakan sabda kalau itu adolah hal nan salah nan alah tajadi salamo ko di bani Israil. Namun kanyataannyo indak ado. Jikok ado nan disalahan tantang bani Israel, indak tantang sistem matrilineal.
Salain itu, ado juo disabuik, jikok tajadi pacaraian, anak ikuik ayahnyo dan tingga jo mande tiri. Sadangkan dalam adaik Minangkabau, anak tatap tingga jo mande kanduangnyo nan kahidupannyo dijamin dek dunsanaknyo. Nan sabananyo, tangguangjawab sarato hak dari si ayah ka anak ataupun dari si anak ka ayahnyo, tataplah sasuai jo agamo Islam. Jikok masalah jaminan kahidupan, jaankan dunsanaknyo sacaro adaik Minangkabau-pun nan sacaro nyato adolah karabatnyo, urang nan bukan karabatnyo pun sacaro agamo Islam sabananyo disuruah untuak mamparatian generasi. Malah, alah elok adaik Minangkabau nan maarahan untuak itu.
Tangguangjawek suami sabagai sumando untuak maninggian harkaik padusi untuak malanjuikan sistem matrilineal.[2] Tanggungjaweknyo untuak anaknyo ado, baitu pulo ado tangguangjaweknyo untuak kamanakannyo sabagai mamak di rumah gaeknyo. Jikok di dalam agamo Islam, tangguangjawek laki-laki untuak kahidupan istri, anak-anaknyo, jo urang gaeknyo. Kalau di adaik Minangkabau, paran laki-laki ko ado duo tambahan. Laki-laki sabagai sumando di rumah istrinyo, kalau di rumah gaeknyo sabagai mamak.
Dari patantangan nan dijalehan sabalumnyo, masyarakaik Minangkabau picayo bahwasanyo antaro Islam jo adaik ko alah tajalin arek. Katantuan adaik Minangkabau mangatoan “adaik basandi syara’, syara’ basandi kitabullah.” Papatah lain mangatoan “syara’ mangato, adaik mamakai.” Iko bararti sagalo nan diatua dek adaik harus basandi dari Al-Qur'an jo Hadist. Jikok ado aturan adaik nan batantangan jo Islam itu harus dicaliak ulang jo dikaji ulang, karano urang minangkabau harus taguah manjalanan agamo Islam sasuai konsep adaik Minangkabau nan paliang utamo jo nan paliang inti saaik kini jo untuak kamukonyo nan ditatapan indak buliah dirubah; adaik basandi syara', syara' basandi kitabullah.