Pandidikan Kajuruan Padusi

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Pandidikan Kajuruan Padusi atau Meisjes Volk Onderwijs iyolah sikolah kajuruan nan didirian di maso Panjajahan Balando. Meisjes Volk Onderwijs khusus manarimo anak padusi sajo. Syaratnyo adolah nan alah tamat Sikolah Desa (Volksschool) tigo taun, aratinyo alah pandai manulih jo mambaco. Palajaran nan diagiah di sikolah ko adolah mamasak, manjaik, manyulam, marendo, jo marajuik. Guru nan maaja biasonyo adolah guru padusi pulo nan alah lulus Kweekschool (Pandidikan Kaguruan). Guru ‘ko pasiah babahaso Balando sainggo muriknyo pun diaja pulo dasar-dasar bahaso Balando. Guru padusi ‘tu dipanggia Encik atau Ibu. Indak hanyo pamarentah Balando sajo nan mandirikan sikolah katiko itu. Ado pulo sikolah kajuruan khusus untuak anak padusi nan didirikan dek pihak swasta. Sikolah ‘tu namonyo Huishoudschool (Sikolah Rumah Tangga) nan lamo barajanyo tigo taun.[1]

Meisjes Volk Onderwijs untuak anak padusi di Minangkabau pun banyak pulo didirikan dek Balando. Di Pasisia Salatan misalnyo, ado Meisjes Volk Onderwijs di Kambang. Banyak murik lulusan sikolah ‘tu nan pandai masak-mamasak jo jaik-manjaik dan pandai pulo babahaso Balando ciek jo duo. Rato-rato murik-murik Meisjes Volk Onderwijs di Kambang lahia sakitar tahun 1920-an.

Sijarah[suntiang | suntiang sumber]

Sajarah didirikannyo sikolah khusus anak-anak padusi ko indak lapeh dari sajarah Indonesia sacaro kasaluruhan.Nagari awak nan kayo rayo ko taruih-manaruih diisok dek panjajah Balando. Sagalo hasia bumi Indonesia dibaok ka Nagari Balando. Disisokan saketek bana untuak kaparaluan urang pribumi. Akibatnyo, rakyat Indonesia sangaik miskin, sangaik sansaro. Keadaan ko ruponyo bapangaruah pulo kapado importir Balando nan datang badagang ka Indonesia. Importir ‘tu indak dapek manjua dagangannyo dek karano kamampuan mambali urang Indonesia nan sangaik randah, sadangkan industri di Nagari Bulando sadang maju bana.[2]

Importir sangaik mainginkan Indonesia manjadi pasa industri untuak Bulando. Kalau sagalo barang nan dibao dari Bulando laku di Indonesia, panggaleh asiang ‘tu dapek pulo baliak mambali barang matah jo harago sangaik murah dari Indonesia. Barang matah diolahnyo di nagarinyo. Kalaulah manjadi barang industri, ‘nyo bao ‘lo ka Indonesia baliak untuak dijua jo harago nan maha. Untuak maatasi keadaan sarupo itu, Pamarentah Balando di Indonesia harus mampaelok-i parekonomian rakyat Indonesia nan alah rusak parah ‘tu.

Sarantak jo kaadaan ekonomi rakyat Indonesia nan rusak parah ‘tu, di Nagari Balando tabik pulo tulisan nan bajudul “Utang Kahormatan” nan ditulih dek Van Devender di majalah De Gids di taun 1899. Van Deventer manulis baraso kauntuangan sangaik banyak nan alah didapek dari Indonesia ‘tu samustinyo dibayiakan baliak ka Indonesia dari kas Nagari Balando. Pandapek Deventer ‘ko dipandang sabagai ide baru nan kudian dikenal jo Etische Politiek atau Politik Etis atau Politik Baleh Budi. Devender manyarankan Politik Etis untuak kepentingan rakyaik Indonesia nan tabagi dalam tigo sektor, iyolah perbaikan irigasi, pelaksanaan transmigrasi, jo peningkatan edukasi (mandirikan sikolah-sikolah).

Sajak balakunyo Politik Etis, banyak kamajuan nan tajadi dalam dunia Pandidikan. Sikolah-Sikolah Dasar (pandidikan dasar) samakin dipabanyak. Sikolah nan baorientasi ka Barat untuak urang Cino jo Bumiputra (pribumi) didirian pulo. Badiri pulo sikolah manangah MULO (Meer Uit gebreid Lager School) jo AMS (Algemene Middelbare School) sainggo tabukak pulo jalan dek anak pribumi untuak malanjuikkan ka paguruan tinggi kedokteran sarupo STOVIA (School tot Opleiding van Inlandsche Artsen) jo NIAS (Nederlansche Indische Artsen School).

Rujuakan[suntiang | suntiang sumber]

  1. Kartodirjo, Sartono (1999). Pengantar Sejarah Indonesia Baru Jilid 2: Sejarah Pergerakan Nasional: dari Kolonialisme sampai Nasionalisme. Jakarta: Gramedia Pustaka Utama. 
  2. Perjalanan Pendidikan di Tanah Air (Tahun 1800—1945. Jakarta: Rineka Cipta. 16 Pebruari 2005.