Nona Gaprindashvili

Wikipedia Minangkabau - Lubuak aka tapian ilimu
Nona Gaprindashvili

Nona Gaprindashvili di Bad Kissingen, 1982
Informasi paribadi
Asa nagara Uni Soviet
Georgia
Rekor batandiang
Gala Grandmaster
Juaro Dunia Padusi 1962–78
Paringkek tatinggi 2495 (Juli 1987)

Nona Gaprindashvili[1][2] (Georgia: ნონა გაფრინდაშვილი, lahia 3 Mai 1941) adolah surang pamain catua tanamo asa nagara Georgia. Baliau marupoan padusi patamo nan maraiah norma Grandmaster untuak kategori laki-laki,[3] pamacik limo kali gala juaro Kajuaroan Catua Dunia Padusi, dan dikana ateh dominasinyo pado catua dunia padusi tarutamo antaro 1962 inggo 1980-an.[4]

Maso mudo[suntiang | suntiang sumber]

Nona Gaprindashvili laia di kota Zugdidi di wilayah barat Georgia (maso tu tamasuak wilayah Uni Soviet), sabagai satu-satunyo anak padusi dari anam basudaro.[5] Nona jo sudaro-sudaronyo baraja main catua pado apaknyo, dan mareka acok maadoan kompetisi di rumahnyo.[5]

Katiko baumua 12 taun, Nona ikuik kompetisi catua di kota Batumi dan pamainannyo baasia manariak paratian Karseladze, surang palatiah catua Georgia.[5] Maikuiki saran palatiah ko, kaluarganyo pindah ka Tbilisi supayo Nona dapek bakonsentrasi baraja catua.[5] Duo taun kudian, Nona maraiah tampek kaduo dalam Kajuaroan Georgia, dan sajak 1952 ampia salalu manang dalam babagai turnamen catua nan diikuikinyo.[5]

Karir[suntiang | suntiang sumber]

Nona Gaprindashvili masih duduak di bangku sikola kutiko pado taun 1956 baasia manang dalam tigo turnamen pantiang; iyolah Kajuaroan Tbilisi, Kajuaroan Georgia, jo Semifinal Kajuaroan USSR.[1] Taun 1960 Nona luluih kualifikasi Turnamen Kandidat Padusi, nan kudian dimanangannyo dan mambueknyo barhak jadi panantang dalam Kajuaroan Catua Dunia Padusi malawan Elisaveta Bykova.[1]

Pado 1962, Nona mangalahan Elisaveta Bykova untuak mariah gala tatinggi dalam Kajuaroan Catua Dunia Padusi ko di Moskwa, dalam umua nan baru 21 taun sajo.[6] Nona mampatahan gala ko ampek kali lai inggo pado 1978, nan mano Maia Chiburdanidze nan asa Georgia pulo kudian baasia marabuiknyo.[6]

Nona bamain mambela Uni Soviet pado Olimpiade Catua sabanyak sabaleh kali (1963, 1966, 1969, 1972, 1974, 1978, 1980, 1982, 1984, 1986, dan 1990), sarato untuak Georgia satu kali (1992, iyolah satalah Uni Soviet pacah).[7] Salamo maikuiki Olimpiade Catua ko, baliau alah mamangan sabanyak 25 madali, di antaronyo tamasuak 11 madali ameh tim jo 9 madali ameh individu.[8]

Pamainan Nona indak kalah rancak dalam turnamen catua kategori laki-laki nan diikuikinyo, antaro lain pado turnamen Lone Pine International taun 1977, di mano baliau baasia juaro basamo jo para grandmaster Yuri Balashov, Oscar Panno, dan Dragutin Sahovic.[2]

Pado 2005, Nona manang dalam Turnamen Catua BDO nan diadoan di Haarlem, Balando, dangan skor 6.5/10 dan performa rating 2510, dalam umuanyo nan alah 64 taun.[9] Ateh sumbangan prestasinyo nan maaruman nagara di tingkek internsional, Nona mandapek pangaragoan Order of Excellence taun 2015 nan disampaian dek Presiden Georgia, Giorgi Margvelashvili.[8]

Rujuakan[suntiang | suntiang sumber]

Catatan kaki[suntiang | suntiang sumber]

  1. a b c The British Chess Magazine, Vol. 89-90. Trubner & Company. 17 Maret 1969. p. 211. https://books.google.co.id/books?hl=id&id=BvwtAQAAIAAJ&dq=nona+terentyevna+gaprindashvili&focus=searchwithinvolume&q=Nona+Terentyevna+Gaprindashvili. 
  2. a b Hooper, David; Whyld, Kenneth (1996). The Oxford Companion to Chess. Ed. 2, berilustrasi, cetak ulang. Oxford University Press. p. 149. ISBN 0192800493, 9780192800497. https://books.google.co.id/books?id=edEZAQAAIAAJ&q=nona+terentyevna+gaprindashvili&dq=nona+terentyevna+gaprindashvili&hl=id&sa=X&ved=0ahUKEwif4tb6ubPOAhUHpY8KHYExBMwQ6AEIIDAB. 
  3. Soltis 1999, hlm. 347.
  4. Soltis 1999, hlm. 194.
  5. a b c d e Polgar, Susan (4 Juli 2010). "Interview with Nona Gaprindashvili". ©2016 www.chessdailynews.com. All Rights Reserved. Chess Daily News. Diakses tanggal 09-08-2016. 
  6. a b Soltis 1999, hlm. 348.
  7. OlimpBase: Women's Chess Olympiads, Nona Gaprindashvili
  8. a b "Order of Excellence to Nona Gaprindashvili". FIDE. Diakses tanggal 29 December 2015. 
  9. http://en.chessbase.com/Home/TabId/211/PostId/4002621

Bahan bacoan[suntiang | suntiang sumber]

Pautan lua[suntiang | suntiang sumber]


Didaului jo:
Elisaveta Bykova
Juaro Catua Dunia Padusi
1962–1978
Digantian dek:
Maia Chiburdanidze