Museum Fatahillah
Koordinat: 6°08′07″S 106°48′48″E / 6.135230°S 106.813301°E
| Museum Sijarah Jakarta | |
|---|---|
| Museum Fatahillah | |
 Foto panorama Museum Sijarah Jakarta diliek dari Taman Fatahillah | |
| Lokasi | Jalan Taman Fatahillah 1, Jakarta Barat, DKI Jakarta, Indonesia |
| Koordinat | 6°08′07″S 106°48′48″E / 6.135199°S 106.813300°E |
| Jinih | Museum Sejarah |
| Pamiliak | Dinas Pariwisata dan Kebudayaan Provinsi DKI Jakarta |
| Angkutan umum | Templat:Rint Templat:Rint Halte Museum Sijarah Jakarta |
| Situs web | jakarta-tourism.go.id/article/detail/museum-fatahillah |
Museum Fatahillah mampunyoi namo rasmi Museum Sijarah Jakarta adolah sabuah museum nan talatak di Jalan Taman Fatahillah Nomor 1, Jakarta Barat, Daerah Khusus Ibukota Jakarta, Indonesia jo luweh labiah dari 1.300 meter persegi.
Bangunan iko dulunyo iolah Balai Kota Batavia (bahaso Balando: Stadhuis van Batavia) nan dibangun pado taun 1707-1710 ateh kandak parentah Gubernur Jenderal Joan van Hoorn. Bangunan iko manyarupoi Istana Dam di Amsterdam, tabagi manjadi bangunan utamo jo duo sayok di bagian timur jo baraik sarato bangunan sandiang nan digunoan sabagai kantua, ruang pangadilan, jo ruang-ruang bawah tanah nan dipakai sabagai panjaro. Pado tanggal 30 Maret 1974, bangunan iko kudiannyo dirasmikan dek bapak Ali Sadikin sabagai Museum Sijarah Jakarta.[1]
Sijarah
[suntiang | suntiang sumber]Sijarah gedung
[suntiang | suntiang sumber]Pado awal mulonyo bana, balai kota partamo di Batavia dibangun pado taun 1620 di tapi timur Kali Gadang. Bangunan iko hanyo batahan salamo anam taun sabalum akhirnyo dibongka untuk manahan sarangan dari pasukan Sultan Agung pado taun 1626.[2] Sabagai gantinyo, dibangunlah baliak balai kota tasabuik ateh parentah Gubernur-Jenderal Jan Pieterszoon Coen pado taun 1627. Lokasinyo barado di daerah Nieuwe Markt (kini Taman Fatahillah).[3] Manuruik catatan sijarah, balai kota kaduo iko hanyo batingkek ciek jo pambangunan tingkek kaduo dilakuan kudian. Taun 1648 kondisi balai kota sangaik buruak. Tanah di kota Batavia nan sangaik labil jo bareknyo bangunan mambuek palahan-lahan turun dari pamukaan tanah.
Akhirnyo pado taun 1707, ateh parentah Gubernur-Jenderal Joan van Hoorn, bangunan iko dibongka dan dibuek ulang manggunoan pondasi nan samo. Parasmian Balai Kota katigo dilakuan dek Gubernur-Jenderal Abraham van Riebeeck pado tanggal 10 Juli 1710, duo taun sabalum bangunan iko salasai sacaro kasadoalahnyo.[3] Salamo duo abaik, balai kota Batavia iko digunoan sabagai kantua administrasi kota Batavia. Salain tuh juo digunoan sabagai tampek College van Schepenen (Dewan Kotapraja) jo Raad van Justite (Dewan Pangadilan). Awalnyo sidang Dewan Pangadilan dilakuan di dalam Kastil Batavia. Namun dipindahan ka sayok timur balai kota jo kudian dipindahan ka gedung pangadilan nan baru pado taun 1870.[3]
Balai kota Batavia juo punyo ruang tahanan nan pado maso VOC dijadian panjaro utamo di kota Batavia. Sabuah bangunan batingkek ciek pernah badiri di balakang balai kota sabagai panjaro. Panjaro tasabuik dikhusuihan kapado para tahanan nan mampu mambayia kamar tahanan inyo surang. Namun babeda jo panjaro nan barado di bawah gedung utamo. Hampia indak ado ventilasi jo minimnyo cahayo panarangan hinggo akhirnyo banyak tahanan nan maningga sabalum diadili di Dewan Pangadilan. Sabagian gadang dari mereka ko maningga karano kanai kolera, tifus jo kakurangan oksigen. Panjaro di balai kota pun ditutuik pado taun 1846 jo dipindahan ka sabalah timur Molenvliet Oost. Babarapo tahanan nan parnah manampati panjaro balai kota adolah bekas Gubernur Jenderal Balando di Sri Lanka Petrus Vuyst, Untung Suropati jo Pangeran Dipenogoro.[3]
Di akhir abaik ka-19, kota Batavia mulai maluweh ka wilayah salatan. Sahinggo kadudukan kota Batavia ditingkekan manjadi Gemeente Batavia. Akibek paluasan kota Batavia, aktivitas balai kota Batavia dipindahan pado taun 1913 ka Tanah Abang West (kiniko manjadi jalan Abdul Muis No. 35, Jakarta Pusek) dan dipindahan baliak ka Koningsplein Zuid pado taun 1919 (kini Jl. Medang Merdeka Selatan No. 8-9, Jakarta Pusek) sampai kiniko.[4] Bakeh bangunan balai kota kudian dijadian Kantua Pamarentah Jawa Barat hinggo taun 1942. Salamo maso panduduakan Japang, bangunan iko dipakai untuak kantua pangumpua logistik Dai Nippon. Sasudah Indonesia merdeka, bangunan iko baliak digunoan sabagai Katua Pamarentah Provinsi Jawa Barat disampiang ditempati markas Komando Militer Kota I hinggo taun 1961. Sasudah itu digunoan sabagai Kantua Pamarentah Provinsi DKI Djakarta. Pado taun 1970, bangunan bakeh balai kota Batavia iko ditetapkan sabagai bangunan Cagar Budaya.[5] Sasudah itu Gubernur DKI Jakarta pado maso itu Ali Sadikin marenovasi sadoalah bangunan iko jo dirasmikan pado tanggal 30 Maret 1974 sabagai Museum Sijarah Jakarta.
Sarupo umumyo di Eropa, balai kota dilangkoki jo lapangan nan dinamoan Stadhuisplein. Manuruik sabuah lukisan nan dibuek dek Johannes Rach, di tangah lapangan tuh ado sabuah aia mancua nan marupokan ciek-cieknyo sumber aia untuak masyarakaik satampek. Aia tuh barasa dari Pancoran Glodok nan dihubuangan jo pipa manuju Stadhuiplein. Tetapi aia mancua tasabuik hilang pado abaik ka-19. Pado taun 1972, diadoan paggalian ka lapangan tasabuik jo ditamuan pondasi aia mancua langkok jo pipa-pipanyo. Mako jo bukti sijarah itu dapek dibangun baliak sasuai gambar Johannes Rach, kudian tabantuaklah aia mancua di tangah Taman Fatahillah untuak manganang panglima Fatahillah pandiri kota Jayakarta.
Sijarah museum
[suntiang | suntiang sumber]Pado taun 1937, Yayasan Oud Batavia mangajuan rancana untuak mandirin sabuah museum manganai sijarah Batavia, yayasan tasabuik kudian mambali gudang parusahaan Geo Wehry & Co nan talatak di sabalah timur Kali Gadang tapeknyo di Jl. Pindu Gadang Utara No. 27 (kini Museum Wayang) jo mambangunnyo baliak sabagai Museum Oud Batavia. Museum Batavia lamo iko dibukak untuak umum pado taun 1939.
Pado maso kamerdekaan museum iko barubah manjadi Museum Djakarta Lamo di bawah naungan LKI (Lembaga Kebudayaan Indonesia) jo salanjuiknyo pado taun 1968 "Museum Djakarta Lamo" diserahan kapado PEMDA DKI Jakarta. Gubernur DKI Jakarta pado kutiko itu, Ali Sadikin marasmian gedung iko manjadi Museum Sijarah Jakarta sajak taun 1999 batekad manjadian museum iko indak ajo sabagai tampek untuak marawat, mamameran benda nan barasa dari periode Batavia, tapi juo harus bisa manjadi tampek untuak sadoalah urang antah itu bangsa Indonesia ataupun asing, anak-anak, urang gadang bahkan panyandang cacaik untuak manambah pangetahuan jo pangalaman sarato dapek dinikmati sabagai tampek rekreasi. Untuak itu Museum Sijarah Jakarta barusaho manyadioan informasi manganai pajalanan panjang sijarah kota Jakarta, sijak maso parasejarah hinggo maso kini dalam bantu nan labiah rekreatif. Salain itu, malalui tata pamernyo Museum Sijarah Jakarta barusaho manggambaran "Jakarta Sabagai Pusat Partamuan Budaya" dari babagai kalompok suku elok itu dari dalam maupun dari lua Indonesia jo sijarah kota Jakarta seutuhnya. Museum Sijarah Jakarta juo salalu barusaho manyalanggaroan kagiatan nan rekreatif sahinggo dapek marangsang pangunjuang untuak tatarik kapado Jakarta jo maningkekan kasadaran akan pantiangnyo warisan budaya.
Koleksi
[suntiang | suntiang sumber]Objek-objek nan dapek ditamui di museum iko antaro lain pajalanan sijarah Jakarta, replika paninggalan maso Tarumanegara jo Pajajaran, hasil panggalian arkeologi di Jakarta, parabot antik mulai dari abaik ka-17 hinggo 19, nan marupokan papaduan dari gaya Eropa, Cino, jo Indonesia. Ado juo keramik, gerabah, jo batu prasasti. Koleksi-koleksi iko tadapek di babagai ruang, sarupo Ruang Prasejarah Jakarta, Ruang Tarumanegara, Ruang Jayakarta, Ruang Fatahillah, Ruang Sultan Agung, jo Ruang Batavia.
Tadapek juo babagai koleksi kebudayaan Betawi, numismatik, jo becak. Bahkan kini ko dilatakan pulo patuang Dewa Hermes (manuruik mitologi Yunani, marupokan dewa kabaruntuangan jo palinduangan bagi kaum padagang) nan tadinyo talatak di parampatan Harmon jo meriam Si Jagur nan dianggok punyo kakuatan magis. Salain itu, di Museum Fatahillah ko tadapek bekas panjaro bawah tanah nan dulu digunoan pado zaman panjajahan Balando.
Rujuakan
[suntiang | suntiang sumber]- ↑ "Museum Sejarah Jakarta - Sistem Registrasi Nasional Museum"[pranala nonaktif permanen]. Sistem Registrasi Nasional Museum Kemdikbud. Diakses tanggal 2024-06-03.
- ↑ Schets van de verlegging der Rivier van Batavia in 1632.
- ↑ a b c d A. Heuken SJ. Tempat-tempat Bersejarah di Jakarta. Cipta Loka Caraka, 2015. ISBN 974-602-70395-7-5
- ↑ "Gedung Balai Kota". Diarsipkan dari versi asli tanggal 2016-11-07. Diakses tanggal 2017-01-27.
- ↑ "Jakarta History Museum". Indonesia Tourism. IndonesiaWebPromotion. Diakses tanggal 2024-08-20.