Musajik Jamiak Birugo

Musajik Jamik Birugo

Musajik Jamiak Birugo adolah musajik nan talatak di Jalan Sudirman, Birugo, Bukiktinggi. Musajik iko dibangun pado 1956, nan palatakan batu partamonyo dilakukan dek Inyiak Ibrahim Musa Parabek.

Sijarah

Musajik iko dibangun sabagai pangganti musajik nan tagak sabalunnyo di lokasi nan samo. Musajik lamo tabuek dari kayu pado dindiang jo tiangnyo, sadangkan atoknyo tabuek dari ijuk. Musajik iko marupoan tampek diadoannyo musyawarah ulama pado 26 sampai 27 Mei 1968 nan malahiakan Majelis Ulama Sumatera Barat, majelis ulama daerah partamo di Indonesia. Baitu pulo musyawarah kaduo pado 18 sampai 19 Mei 1974, nan mangukuahkan baliak Buya Mansoer Datuak Palimo Kayo subagai Katua Majelis Ulama Sumatera Barat. Majelis Ulama Sumatera Barat baru bagabuang jo Majelis Ulama Indonesia (MUI) sasudah MUI dibantuak dek Pamarentah Suharto pado 26 Juli 1975.

Bangunan

Musajik iko tagak di ateh tanah wakaf salueh 3.202 meter persegi. Bangunannyo babantuak persegi jo denah selueh 1.800 meter persegi. Lokasinyo di pusek kota jo di tapi jalan manjadikan musajik iko acok dijadian tampek patamuan atau musyawarah dulunyo.

Interior musajik iko didominasi warna cokelat. Di laman musajik, ado garabang nan babantuak gonjong jo sabuah rangkiang. Tagak pulo bangunan babantuak kubuih nan marupoan miniatur Kakbah dek karano musajik iko manjadi tampek manasik di bawah naungan Kelompok Bimbingan Ibadah Haji (KBIH) Musajik Jamik Birugo. Urang nan sarato sampai 2018 bajumlah 363 jamaah se-Kota Bukitktinggi. Samantaro di balakang musajik ado bangunan nan digunoan anak-anak mangaji TPA jo MDA.