Lompat ke isi

Motinggo Busye

Wikipedia Minangkabau - Lubuak aka tapian ilimu
Motinggo Boesje
Lahia
Bustami Djalid

21 November 1937
Bendera Balando Kupang Kota, Bandar Lampung
Maningga18 Juni 1999 (umua 61)
Jakarta, Indonesia
KabangsaanIndonesia
Namo lainMatinko Bungo
Saidi Maharajo
KarojoSaniman, sutradaro
Dikana dekSastrawan
Urang tuoDjalid Sutan Raja Alam
Rabiah Jakub

Motinggo Boesje (ER, EYD: Motinggo Busye, namo lahia: Bustami Djalid) (lahia di Kupang Kota, 21 November 1937 – maningga di Jakarta, 18 Juni 1999 pado umua 61 taun) adolah saurang sastrawan, sutradaro, jo palukih Indonesia.

Lata balakang

[suntiang | suntiang sumber]

Motinggo lahia dari pasangan badarah Minangkabau. Amaknyo barasa dari Matua, sadangkan abaknyo dari Sicincin, Padang Pariaman. Salapeh manikah, kaduonyo pai marantau ka Kota Bandar Lampung. Di sinan, abaknyo bakarajo sabagai pagawai Koninklijke Paketvaart Maatschappij di Kupang Kota, sadangkan amaknyo maaja ilmu agamo jo bahaso Arab. Katiko baumua 12 taun, kaduo urang tuonyo maningga. Sapaningga urang tuonyo, Motinggo diasuak dek neneknyo di Bukittinggi sampai inyo tamek SLA-C.[1]

Namo jo gala

[suntiang | suntiang sumber]

Namo Motinggo adolah namo pena, nan barasa dari kato bahaso Minang, "mantiko", nan aratinyo mada, tangka, suko maeboh, panggaduah, jo tak tau malu. Manuruik Motinggo, kato "mantiko" dalam namonyo indak baarti nagatif, karano inyo manambahan kato "bungo" di balakang namonyo, sahinggo manjadi "mantiko bungo" (MB). Dari inisial ikolah akhirnyo bakambang namo Motinggo Boesje. Salain namo pena jo namo paragiahan urang tuonyo, Motinggo punyo gala Minangkabau juo di kampuangnyo, yaitu Saidi Maharajo.[1]

Pandidikan jo karajo

[suntiang | suntiang sumber]

Salapeh tamaik SMA di Bukittinggi, Motinggo malanjuikan sakolahnyo ka Fakultas Hukum Universitas Gadjah Mada, tapi ndak salasai. Taun 1952, inyo sato maisi acaro sandiwara di radio RRI studio Bukittinggi. Inyo sampek jadi radaktur kapalo Penerbitan Nusantara (1961-1964) jo Katua II Koperasi Seniman Indonesia.[2]

Kariernyo di dunia tulih manulih barawal katiko Tomoyuki Yamashita nan mangunjuangi rumahnyo maagiah masin ketik. Masin ketik iko akhianyo manjadi kawannyo untuak mancurahan ide-idenyo. Sajak rajin mambaco buku-buku Balai Pustaka, minatnyo untuk tajun ka dunia sastra mulai tumbuah. Dramanyo nan bajudul Malam Jahanam (1958) mandapek hadiah partamo dalam sayembara panulisan drama dari Departemen Pendidikan dan Kebudayaan bagian kasenian pado taun 1958. Cerpennyo nan bajudul "Nasihat Buat Anakku", mandapek hadiah majalah Sastra pado taun 1962.[2]

Motinggo marambah dunia film sajak taun 1960, katiko caritonyo nan bajudul "Si Pendek dan Sri Panggung" diangkek manjadi film, nan disutradaroi dek Alam Suawidjaja jo inyo manjadi pambantu sutradaranyo.[3]

Salain di dunia satra, drama, jo film, Motinggo manyukoi pulo sani lukih. Inyo baraja malukih basamo Delsy Syamsumar, nan diaja dek palukih Wakidi. Inyo sato mandirian Himpunan Seniman Muda Indonesia Sumatera Utara jo manjadi pamimpin majalah kebudayaan organisasi itu. Pado taun 1954, sabuah pameran lukisan di Padang mamamerkan 15 lukisan karya inyo.[4]

Sapanjang iduiknyo, Motinggo alah manulih labiah dari 200 karya sastra, nan sampai kini masiah tasimpan di Perpustakaan Kongres di Washington, D. C.. Di taman kota Seoul, Korea Salatan, namonyo tapahat di antaro 1.000 sastrawan dunia lainnyo. Karya-karyanyo acok ditarjamahan ka bahaso asiang, antaro lain bahaso Ceko, Inggris, Balando, Prancih, Jerman, Korea, Japang, jo Mandarin.[5]

Karya

[suntiang | suntiang sumber]

karya tulih

[suntiang | suntiang sumber]
  • Malam Jahanam (1961).
  • Tidak Menyerah (1963).
  • Hari Ini Tak Ada Cinta (1963).
  • Perempuan Itu Bernama Barabah (1963).
  • Dosa Kita Semua (1963).
  • Tiada Belas Kasihan (1963).
  • Sejuta Matahari (1963).
  • Penerobosan di Bawah Laut (1964).
  • Titian Dosa di Atasnya (1964).
  • Cross Mama (1966).
  • Tante Maryati (1967).
  • Sri Ayati (1968).
  • Retno Lestari (1968).
  • Dia Musuh Keluarga (1968).
  • Sanu, Infita Kembar (1985).
  • Madu Prahara (1985).
  • Dosa Kita Semua (1986).
  • Tujuh Manusia Harimau (1987).
  • Dua Tengkorak Kepala (1999).
  • Fatimah Chen Chen (1999).

Drama

[suntiang | suntiang sumber]
  • Malam Jahanam (1961).
  • Badai Sampai Sore (1962).
  • Nyonya dan Nyonya (1963).
  • Malam Pengantin di Bukit Kera (1963).

Legenda

[suntiang | suntiang sumber]
  • Buang Tonjam (1963).
  • Ahim-Ha (1963).
  • Batu Serampok (1963).

Film

[suntiang | suntiang sumber]
  • Biarkan Musim Berganti (1971).
  • Tjintaku Djauh Dipulau (1971).
  • Takkan Kulepaskan (1972).
  • Si Rano (1973).
  • Sebelum Usia 17 (1974).
  • One Way Ticket (1976).
  • Sejuta Duka Ibu (1977).
  • Raja Singa (1978).

Rujuakan

[suntiang | suntiang sumber]
  1. ↑ a b Motinggo Boesje - Ensiklopedia Sastra Indonesia. Archived 2024-01-02 di Wayback Machine. ensiklopedia.kemdikbud.go.id Diakses 03 Januari 2024.
  2. ↑ a b Motinggo Busye: Sensualitas dalam Sastra. kumparan.com Diakses 03 Januari 2024.
  3. ↑ Si Pendek dan Sri Panggung (1960). ofdb.de. Diakses 3 Januari 2024]
  4. ↑ Lukisan Motinggo Busye Disobek-Sobek. Borobudurwriters.co.id. Diakses 3 Januari 2024
  5. ↑ Sinematek Indonesia & Badan Penelitian dan Pengembangan, Penerangan, Departemen Penerangan RI. (1979). Apa Siapa Orang Film Indonesia 1926-1978. hlm. 319

Pautan lua

[suntiang | suntiang sumber]
Diambiak dari "https://min.wikipedia.org/w/index.php?title=Motinggo_Busye&oldid=3154775"