Monumen Pertempuran Partamo

Monumen Pertempuran Partamo nan talatak di Taman Rimbo Kaluang, Padang.

Monumen Pertempuran Partamo dibangun pado taun 1987 untuak mangana kajadian panyarangan markas jo gudang sanjato sekutu di Rimbo Kaluang pado tanggal 21 Februari 1946. Monumen ko dibangun di tampek nan kini manjadi Taman Rimbo Kaluang, Padang.

Sijarah

Sabalun tanggal 11 Oktober 1945, Rimbo Kaluang alah dimasuaki pajuang namua indak tajadi panembakan. Kadatangan pasukan sakutu nan mandarek di Taluak Bayua tanggal 13 Oktober 1945 untuak pamulangan Pasukan Japang jo sanjatonyo. BPPI (Balai Panarangan Pamudo Indonesia) di Pasa Gadang manunjuak Syofyan Ibrahim jo Munir Latif barangkek ka Rimbo Kaluang untuak batamu jo Okamato, surang opsir Japang nan panah basamo di Gyu Gun. Okamato maaku batangguang jawek ateh bara buah kandaraan jo sanjato. Inyo basadio manyarah asa lai dapek manjamin iduiknyo jo anak buahnyo salamaik. Tantara Japang sadar kalau malawan pun indak ado gunonyo.

Sajak dibantuaknyo Dewan Pajuangan Padang Lua Kota atau Padang Area tanggal 5 Februari 1946 markas pun bapindah dari Lubuak Lintah, Kalumbuak dan Limau Manih. Mayor Ahmad Husein ditunjuak sabagai komandan untuak Padang Area Timur. Karano acok kadatangan sekutu, Ahmad Husen mamutuihkan untuak mamindahan markas Resimen Kuranji ka Kampuang Kuranji. Kampuang Kuranji dilinduangi sabalah selatan jo barat dek Batang Kuranji. Sabalah timur ado hutan labek jo binatang lia sarupo harimau, sabalah utara ado jalan ketek nan payah dilalui.

Sasaran Ahmad Husein adolah gudang sekutu di Rimbo Kaluang. Pado jam sapuluah malam tajadi panyarangan dari bara buah titiak, karano gudang sanjato di kawal dek ciek kompi pasukan. Ahmad Husein mangaluakan tembakan sainggo pasukan sekutu bakalebuik. Ahmad Husein jo pasukannyo barasil masuak ka dalam gudang, mambaok banyak sanjato nan ado di dalam gudang sekutu.

Dek kahebatan Ahmad Husein, tantara sekutu maagiah namo Ahmad Husein jo pasukannyo "The Tiger of Kuranji". Dek lah kalah, tantara sekutu mamindahan gudangnyo ka Belantoeng (Jalan Sudirman kini). Monumen tugu bakeh gudang sekutu kini talatak di Simpang Jalan Raden Saleh jo Khatib Sulaiman, tapeknyo dibalakang SPBU lampu sirah kini. Rancangan bangunan dibuek dek Drs. Amril M.Y. Dt. Garang, nan juo guru jo siswa SMSR Padang.