Manombang

Manombang atau manambang adolah tradisi masyarakaik di Kampuang Subarang Aia, Nagari Balai Panjang, Kecamatan Sago Halaban, Kabupaten Limopuluah Koto. Manombang adolah mangabek atau manambang kabau nan ka didabiah. Duo hari sabalun didabiah, kabau tu alah dikabek dan ditutuik matonyo sainggo kabau manjadi indak tanang.

Manombang indak diadokan di sumbarang wakatu, tapi hanyo di wakatu ka masuak puaso. Uniknyo, sabalun didabiah, kabau tu diarak kaliliang kampuang labiah daulu. Kabau diagiah hiasan di tanduak jo di badannyo. Kabau nan alah panik karano matonyo lah ditungkuih sajak patang tu kamari mamburansang kutiko dibaok bajalan. Urang-urang nan manonton sapanjang jalan basorak-sorak mampagilo kabau. Samakin kabau manggilo, samakin sanang ati urang banyak, samakin meriah pulo acara manyambuik bulan puaso tu. Nan jaleh, manombang indak babahayo untuak urang banyak do karano ado dukun nan manjagonyo.

Biasonyo, manombang diadokan sanjo hari. Manombang salasai katiko ari mulai galok. Kabau nan ditambang dibaok baliak ka tambangannyo dek dukun kabau. Kabau didabiah bisuak paginyo. Biasonyo, mambali kabau nan didabiah tu dipokok-i dek urang-urang nan bapitih. Urang-urang tu disabuik sato sakaki atau sato saparampek kabau. Sasudah kabau didabiah, urang banyak buliah sato mambali. Sadonyo pitih hasia panjualan dagiang kabau tu dikumpuakan, alah tu dibagikan baliak ka urang barampek nan mamodali mambali kabau. Sarupo itulah badoncek manyiapkan dagiang ka dirandang untuak masuak puaso caro urang awak di Subarang Aia.