Mangampo

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Daun Gombia Nan Sadang Dirabuih
Gatah Gombia
Pancetakan gombia
Gombia nan dijamua
Kampan

Mangampo adolah proses panen gombia nan dilakuan dek masyarakat Nagari Harau,Lima Puluh Kota. Gombia diolah dengan caro mangendapan daun gombia nan alah dikampo jo ditirihan sampai manyurupoi pasta padek. Masyarakat nagari Harau biasonyo pai mangampo pado hari Senin sampai hari Sabtu dan dijua kapado tokeh gombia. Salamo proses mangampo, pangampo ado nan hanyo pai pagi pulang sanjo dan ado juo nan lalok di ladang.

Tampek istirahat para pangampo atau tampek proses mangampo itu surang dinamoan kampan bagi masyarakat Harau.

Proses Mangampo[suntiang | suntiang sumber]

Proses pengolahan daun gombia masih manggunoan alat sederhana nan maliputi parabuihan daun, pangampoan daun, pangandokan, panirihan andokan, pambakuan, pancetakan, jo pangariangan.

Parabuihan[suntiang | suntiang sumber]

Parabuihan daun dilakuan dalam duo tahap, yaitu parabuihan nan dilakuan sacaro batahap antaro 30 sampai 60 menit. Pado tahap partamo, daun gombia basah atau segar dirabuih jo aia barasiah. Parabuihan partamo iko manyababan jumlah aia di dalam dandang (kuali) parabuihan bakurang. Salanjuiknyo ka dalam dandang ditambahan aia baru, sampai bateh wakatu parabuihan partamo dan dimulai baliak proses parabuihan (tahap kaduo). Satalah parabuihan tahap kaduo, daun diangkek jo ditirihan, siap itu dipres jo alat kampo sederhana.[1]

Daun nan alah dipres dibuang jo cairan gatah nan kalua dari alat kampo ditampuang jo dimasuakan baliak ka dalam dandang nan barisi aia rabuihan. Kamudian aia rabuihan tasabuik didinginan sampai tabantuak endapan sampurna. Salanjuiknyo endapan gombia tasabuik dipisahkan.

Daun gombia nan alah dirabuih dimasuakan ka dalam karuang, kamudian dilatakan di antaro duo buah kayu. Kaduo kayu tasabuik disatukan dengan manggunoan basi nan salah satu ujuangnyo barupo kait. Bagian ujuang nan lain barupo ulir bafungsi sabagai pangunci dengan caro mamuta skrup nan talatak pado kayu bagian bawah. Kayu pado bagian ateh akan manakan daun nan siap dirabuih sajalan samo putaran skrup pangunci.

Cairan gatah gombia dari proses parabuihan daun tahap partamo dan tahap kaduo disariang jo dipindahan ka dalam wadah pangandokan (palangkah). Supayo pangandokan balangsuang dengan sampurna, gatah tasabuik ditambahan dengan bahan campuran (pemancing) supayo gombia nan masih encer capek manjadi baku.

Pancampuran[suntiang | suntiang sumber]

Bahan campuran iko juga dibuek dari daun gombia rabusan tahap partamo, dengan mancampua daun sabanyak 100-200 gram dan ditambah aia rabuihan sabanyak 1 liter. Kamudian daun itu dirameh-rameh sahinggo kalua cairan gatah gombia bawarna putiah, lalu cairan tasabuik disariang sahinggo pacahan daun-daun nan haluih indak ikuik masuk ka dalam cairan nan akan diandokan.

Cairan nan alah disariang dimasuakan ka dalam babarapo wadah pangandokan nan alah barisi gatah gombia samulo sacaro marato. Proses pangandokan balangsuang salamo labiah kurang 12 jam dan salanjuiknyo dilakukan panirihan andokan. Panirihan andokan gombia dilakukan dengan caro mamasuakan adokan gombia ka dalam karuang goni, kamudian karuang tasabuik digantuang pado bagian nan lataknyo tinggi. Panirihan tasabuik balangsuang salamo 12 jam.

Pancetakan[suntiang | suntiang sumber]

Pencetakan gombia manggunoan sayak (batok kelapa) nan barukuran diameter bakisa antaro 9-12 cm dan taba antaro 2-3 cm. Andokan gombia dimasuakan ka dalam cetakan, kamudian dilatakan di ateh pancetakan dengan posisi manalungkuik (bagian ateh manghadok ka bawah). Pancetakan dilakuan di tanah nan rato jo dilapisi abu pambakaran, kamudian diateh abu pambakaran dilapisi kain, dengan tujuan agar cairan nan masih ado ikuik taserap ka dalam abu pambakaran.

Gombia nan alah dicetak, disusun di ateh rak pangariang nan tabuek dari anyaman buluah, salanjuiknyo dijamua atau dilatakan di ateh tungku pamasakan. Pangariangan gombia balangsuang salamo kurang labiah 3 hari tatapi apabilo turun hujan pangariangan dilakukan dengan caro maangekannyo di ateh tungku parabuihan nan mamakan waktu kurang labiah 5 hari.[2]

Rujuakan[suntiang | suntiang sumber]


  1. Fernando,Satria Zeni. 2013. NAGARI HARAU (Skripsi). Universitas Andalas
  2. Fernando,Satria Zeni. 2013. NAGARI HARAU (Skripsi). Universitas Andalas