Lukman Harun

Lukman Harun
Berkas:Lukman Harun.jpg
Lahia	6 Mei 1934 Limbanang, Suliki, Limo Puluah Koto, Hindia Balando
Maningga	8 April 1999 (umua 64) Jakarta
Kabangsaan	Indonesia
Alma mater	Universitas Nasional, Jakarta
Karojo	Panggiat Islam
Dikana dek	Tokoh Muhammadiyah
Pasangan	Maimunah Malik
Urang tuo	Zaid (apak), Kamsiah (mande)

Lukman Harun (lahia di Limbanang, Suliki, Limo Puluah Koto, Hindia Balando , 6 Mei 1934 – maningga di Jakarta, 8 April 1999 pado umua 64 taun) adolah surang tokoh Muhammadiyah sarato panggiat Islam internasional. Lukman pernah manjabat sabagai Sekretaris Jenderal Asian Conference on Religion and Peace (ACRP).

Latar balakang

Lukman Harun adolah surang putra Minangkabau, anak ka limo di antaro tujuah basudaro dari pasangan Zaid (apak) jo Kamsiah (mande). Apaknyo adolah surang nan fasiah babahaso Arab sarato punyo pangatauan agamo nan cukuik laweh. Lukman manyalasaian pandidikannyo di Fakultas Ekonomi Universitas Nasional.

Kahidupan

Lukman adolah surang organisatoris ulung. Katiko mahasiswa Lukman giat di kapanguruihan Himpunan Mahasiswa Islam sarato manjadi Katua Pamuda Muhammadiyah. Di pangujuang maso Orde Lamo, Lukman adolah panggiat nan cukuik vokal mangganyang Partai Kominih Indonesia. Lukman mamulai kariernyo sabagai pagawai di Kantua Pusek Pabandaharoan Nagaro Departemen Kauangan. Sasusah itu Lukman bakarajo sabagai Pangatur Tata Usaho di Pusek Jawatan Patanian Rakyat Departemen Patanian. Karano giat di organisasi Lukman ditunjuak manjadi anggota DPR-GR, nan banyak manyuaroan kapantiangan politik kalangan muslim. Pado taun 1971, Lukman baranti sabagai anggota DPR-GR karano di-recall.

Kudian Lukman bagabuang ka Partai Muslimin Indonesia sarato manjabat sabagai sekjen. Lukman babarapo kali manjadi kandidat kuaik Katua DPP Muhammadiyah. Tarakhia jabatannyo sabagai Katua Hubuangan Lua Nagari/Juru Bicara Muhammadiyah.

Kaluarga

Lukman manikah jo surang padusi asa Maninjau, Agam, nan banamo Maimunah Malik sarato alah dikaruniai surang putra jo tigo urang putri.

Pandidikan

• Sakola Dasar, Limbanang (1941)
• SMP Muhammadiyah, Payokumbuah (1947)
• SMA Muhammadiyah, Jakarta (1951)
• Fakultas Sosial Politik Universitas Nasional (UNAS), Jakarta

Karier

• Pagawai di kantua Pusek Pabandaharoan Nagaro Departemen Kauangan (1952-1954)
• Pangatur Tata Usaho di Pusek Jawatan Patanian Rakyat Departemen Patanian (1954-1959)
• Panata Agraria di Direktorat Jenderal Agraria Departemen Dalam Nagari (1959)

Organisasi

• Himpunan Mahasiswa Islam (HMI)
• Katua Dewan Mahasiswa UNAS (1960-1962)
• Wakil Sekjen Majelis Mahasiswa Indonesia (MMI)
• Federasi Dewan Mahasiswa
• Senat Mahasiswa Saluruih Indonesia
• Katua Pimpinan Pusek Pamuda Muhammadiyah (1957-1960)
• World Assembly of Youth (WAY)
• Katua Pangarah Massa Kasatuan Aksi Pangganyangan Gestapu/PKI (KAP Gestapu/PKI)
• Majelis Ulama Indonesia (MUI)
• Yayasan Haji Karim Oei, yayasan nan didirian untuak dakwah di kalangan etnis Tionghoa
• Katua Panitia Pambebasan Palestina jo Masjidil Aqsha
• Ikatan Cendekiawan Muslim Indonesia (ICMI)
• Anggota Badan Eksekutif Asian Conference on Religion and Peace (ACRP)
• Kaluarga Mahasiswa Minangkabau (KMM)

Pautan lua

• Wakil Ketua MPR RI Resmikan ICM Lukman Harun Archived 2021-01-26 di Wayback Machine. MinangkabauNews, 13 Juli 2011. Diakses 10 Mei 2013.
• ICM Haji Lukman Harun BPICM Haji Lukman Harun, 10 September 2011. Diakses 10 Mei 2013.