Kue sapik

Wikipedia Minangkabau - Lubuak aka tapian ilimu
Kue Sapik

Kue Sapik adolah sabuah makanan tradisional babantuak kue kariang nan caro mambueknyo disapik dalam sabuah cetakan sapik. Makanan ko tabuek dari tapuang bareh, talua, gulo pasia, santan, jo bubuak kulik kayu manih. Ado juo nan tabuek dari tapuang bareh itam, sainggo rononyo coklat kaitaman.[1] Sasudah dipanggang dalam cetakan, kue lansuang dilipek sabalun inyo kariang.

Kue ko biaso disuguahkan satiok hari gadang sarupo hari rayo Idul Fitri jo Idul Adha. Kue sapik dek urang Minang alah manjadi makanan wajib nan musti ado satiok hari rayo. Salain di Sumatera Barat, kue sarupo ko ado pulo di daerah lain. Kue ko biaso ditamukan di Indonesia, Singapura, Malaysia,[2] jo Brunei.[3]

Namo, bantuak, jo variasi[suntiang | suntiang sumber]

Namonyo diambiak dari caro mambueknyo dimano adonan ka disapik di antaro duo bilah logam cetakan, nan babantuak pangapik. Panamoan kue ko babeda di tiok daerah. Di daerah Jawa, kue sarupo ko biaso disabuik Kue Sepit jo Kue Semprong (aratinyo tabuang atau guluangan).

Pabedaan antaro kue sapik jo kue semprong adolah dari bantuaknyo sajo. Kue semprong biasonyo babantuak guluangan, sadangkan bantuak kue sapik biasonyo segitigo nan dilipek.[4] Kini lah ado variasi dari kue semprong. Kue semprong tradisional isinyo balubang, namun pado variasi baru diagiah tambahan isi sarupo cokelat atau keju.[5]

Nagara-nagara Malayu lainnyo sarupo Malaysia, Singapura, jo Brunei, biaso manyabuik kue ko Kuih Apit-Apit, Kuih Sepit, atau Kuih Kapit.[6][3]

Caro mambuek[suntiang | suntiang sumber]

Bahan :[suntiang | suntiang sumber]

  • Talua 3 buah
  • Gulo pasia 150 gram
  • Santan 450 ml
  • Margarin untuak lumuran
  • Tapuang bareh 250 gram
  • Garam sacukuiknyo
  • Kayu manih sacukuiknyo

Caro mambuek[suntiang | suntiang sumber]

1. Kocok talua sampai tacampua marato. Campuan gulo pasia, tapuang bareh, jo garam. Masuakan talua nan alah dikocok, dikacau sampai rato.

2. Agiah santan saketek-saketek, samantaro dikacau jo pangaduak kawek sampai adonannyo licin. Tambahan kayu manih, diaduak-aduak.

3. Angekan cetakan kue sapik nan alah dilumuri margarin. Tuang adonan kadalamnyo sajumlah 3 sdm.

4. Panggang sampai masak sambia sakali-sakali dibaliakan.

5. Sasudah dipanggang, adonan sagiro dilipek atau diguluang sabalun mangariang.

Rujuakan[suntiang | suntiang sumber]

  1. Oleh-Oleh dari Padang. Tempo.co
  2. "Kuih kapit menu penyeri". Diarsipkan dari versi asli tanggal 2015-02-22. Diakses tanggal 2019-01-07. 
  3. a b Ak. Jefferi Pg. Durahman (27 October 2014). "Kekalkan Warisan Kuih Tradisi Brunei" (dalam bahasa Malay). Pelita Brunei. Diarsipkan dari versi asli tanggal 17 November 2016. Diakses tanggal 11 May 2016. 
  4. "Kriuk..Kriuk.. Semprong Wijen". food.detik.com. Diakses tanggal 19 November 2014. 
  5. "Kue Semprong Rasa Keju Tabur Wijen". Diarsipkan dari versi asli tanggal 2016-06-02. Diakses tanggal 2019-01-07. 
  6. "Kuih kapit menu penyeri". Diarsipkan dari versi asli tanggal 2015-02-22. Diakses tanggal 2019-01-07.