Kue Pinukuik
Pinukuik adolah salah satu kue nan barasal dari Kabupaten Pasisia Salatan[1], Kecamatan Batang Kapeh[2], usaho kue pinukuik nan paliang terkenal ado di Jl. Raya Pasar Kuok. Karano hanyo ado di Batang Kapeh, urang banyak manyabuiknyo Pinukuik Batang Kapeh. Bahan-bahan nan digunokan untuak mambuek kue pinukuk antaronyo tapuang bareh, bahan pangambang kue, karambia mudo nan alah dikukuah, gulo, saketek garam jo minyak goreng.
Caro mambueknyo nan partamo masuakkan tapuang bareh ka dalam tampek nan alah di sadiokan, tambah duo sendok pangambang kue jo saketek aia sampai adonan mangental. Diamkan salamo tigo jam, tutuik manggunokan kain basah, adonan nan alah mangambang ditambahkan karambiah nan alah dikukuah, gulo jo garam lalu aduak sampai marato.
Bilo kasado bahan alah tacampua, mako adonan lah siap untuak dimasak. Angekkan cetakkan nan alah dioleskan minyak supayo adonan indak malakek, lalu tuangkan sasendok adonan ka dalam cetak, kalau kasado cetak alah tarisi, tutuik adonan. Tunggu salamo 7-10 menit, kalau pinukuik alah masak, angkek lalu hidangkan.
Pinukuik ko bantuaknyo bulek, mirip bantuak kue sarabi, hanyo rasonyo nan mambedakan. Pinukuik ko manihnyo karano gulo jo karambiah, samantaro sarabi manihnyo dari karambiah jo gulo saka nan alah tacampua dan dijadikan kuah. Urang Batang Kapeh mamasak pinukuik manggnokan kayu jo sabuik supayo rasonyo gurih dan harum. Pinukuik labiah lamak kalau dimakan sadang angek-angek apolagi ditambah saketek susu di atehnyo.