Lompat ke isi

Joesoef Sou'yb

Wikipedia Minangkabau - Lubuak aka tapian ilimu
Joesoef Sou’yb
Lahia14 Juli 1916
Lhamie, Pidie, Aceh, Hindia Belanda
Maningga7 Januari 1993 (umua 76)
KabangsaanIndonesia
KarojoSejarawan, wartawan, penulis, pengajar
Dikana dekIntelektual Muslim

Prof. H. M. Joesoef Sou'yb (lahia di Lhamie, Pidie, Aceh, Hindia Balando, 14 Juli 1916 – maningga di Medan, Sumatera Utara, 7 Januari 1993 pado umua 76 taun) adolah saurang intelektual Muslim Indonesia. Salamo hiduiknyo, inyo dikenal sabagai wartawan, panulis, guru jo sejarawan. Dek prestasi, dedikasi jo dedikasi inyo, inyo diundang dek nagara Inggirih pado taun 1955.

Kehidupan pribadi

[suntiang | suntiang sumber]

Joesoef Sou'yb lahia di Lhamie, Meulaboh, Aceh Barat pado 14 Juli 1916. Leksikon P. Eneste dan K.L. Rampan manyabuik inyo lahia di Bayur, Maninjau, tapi nan lahia di sinan adolah adiaknyo, Mukhtar Sou'yb. Bundonyo, Shafiah, barasa dari suku Malayu Sikumbang, patamo manikah jo Maharini dan marantau ka Aceh, nan pado maso itu disabuik "marantau ka Gayo jauah". Kaduonyo dianugerahi anak padusi banamo Sauyah. Sasudah Maharini maningga, adiaknyo nan banamo Syu'aib manikah jo Shafiah, suatu adaik nan disabuik manyalihan lapiak. Dari Shafiah dan Syu'aib iko lahialah Joesoef dan adiaknyo Mukhtar. Syu'aib mampunyai bini pulo di kampuangnyo Bayur, Maninjau, banamo Baniamin, dan baranak Baihaki jo Nuruki.[1]

Pandidikan dan karir

[suntiang | suntiang sumber]

Maso ketek, Joesoef baraja di Volksschool, sasudah itu lanjuik ka Sumatra Thawalib di Padang Panjang sajak 1928 hinggo 1930, lalu Tarbiyah Islamiyah Candung sampai taun 1936. Di sela-sela barajanyo, inyo mangasah kamampuan manulih, ditambah tasadionyo buku bacaan dan majalah-majalah aktual pado maso itu. Bahermansyah, kawannyo satu pendidikan, banyak mangirim tulisan ka pabagai media massa di Padang jo Batavia, sarato mandapek honorarium dari tulisannyo itu. Hal itu malacuik samangaik Joesoef untuak manulih. Salain itu, gurunyo Muhammad Yunus banyak mambari kasan, nan mambaok carito basambuang satiok malam Jumaik masonyo baraja.[1]

Mulailah inyo manulih untuak surek kaba nan tabik di Jawo. Sasudah itu manuih opini. Inyo diagiah kolom khusus, tajuk rencana, nan biaso diagiahkan untuak pimpinan redaksi harian Berita, pado awal 1930-an. Salain itu, inyo banyak manulih untuak Pandji Pustaka, mingguan Penindjauan pimpinan D.F. Dahler, Daulat Rakyat nan dibina Mohammad Hatta jo Sutan Syahrir, hinggo Semangat Pemuda pimpinan Mohammad Diem Yatim.[2] Pado maso ko bakambanglah roman picisan. Roman picisan ditulih oleh urang pribumi dan ditabikkan oleh pers swasta nan indak sagadang Balai Pustaka. Salaikn carito kekerasan dan cabul, roman-roman iko banyak pulo barisi nilai-nilai ideologis nan indak mungkin tabik di Balai Pustaka sabagai corong Hindia Balando dalam mamberlakukan Politik Etis. Di dunia roman picisan ikolah Joesoef mangambangan kamampuan sastranyo dan produktif bana dalam manulih.[1][3] Sajak taun 1939 inyo manjadi kapalo redaksi Dunia Pengalaman, sabuah surek kaba di Medan, sasudah itu pindah ka Lukisan Pujangga.[2][3]

Pado bulan Maret 1942 Japang manduduki Medan, dan Joesoef diculik dek balatentara Japang. Ruponyo namonyo alah ditandai pihak Japang dek inyo manulih Ngaung Sirine di Singapura jo Pengorbanan di Medan Perang nan banada anti Japang. Kempetai indak mambari tahu di ma inyo disambunyian, sahinggo tasiar desas-desus baso inyo alah dipancuang di Kabanjahe, sahinggo kaluargonyo putus asa dan manyalanggarakan tahlil kamatiannyo. Jacoub Siregar, saurang tokoh PNI sakaligus sahabatnyo, bahasia manemukan Joesoef dan mambebaskan inyo. Namun, kondisinyo mamprihatinkan, sahinggo inyo indak bisa manulih hingga Revolusi Indonesia pacah pado taun 1945. Sasudah cegak, inyo manulih untuak Mimbar Oemoem nan baru tabik. Katiko Balando manguasai Medan, inyo pindah ka Bukittinggi dan mamimpin redaksi Penuntun Perdjuangan, Senapati, dan Aksi. Surek-surek kaba itu manjadi corong pamarentah RI sabagai media perjuangan.[2]

Sasudah maso kamerdekaan Indonesia, Joesoef Sou'yb dikenal juo sabagai guru jo manjadi dosen jurnalistik jo filsafat di babarapo kuliah di kota Medan, di antaronyo IAIN, Universitas Islam Sumatera Utara jo Universitas Muhammadiyah Sumatera Selatan. Salain aktif di babagai bidang tasabuik, inyo juo dikana sabagai sejarawan, utamo tantang sajarah Islam. Pado 1951 Joesoef menjalani pendidikan baliak di Fakultas Hukum jo Ilmu Masyarakat Universitas Islam Sumatra Utara (UISU) Medan, Sumatera Selatan, sampai taun 1954. Inyo manjadi dosen pulo di Universitas Muhammadiyah Medan.[2]

Banyak karya nan dihasiakan oleh Joesoef. Katiko roman picisan laku kareh di pasaran, inyo banyak pulo manulih roman dengan tema detektif, sarupo dalam carito basambuang Elang Emas nan ditulih hinggo salapan carito.[1] Inyo pun manulih carito nan dibumbui unsur nasionalisme, sarupo Rimba Soematera, alam gaib sarupo novel Roeh Bertjerita, politik sarupo carito basambuang Korban Kejakinan, sarato Kisah Seribu Satu Malam sarupo Ratu Kembang. Sasudah kamardekaan Indonesia, inyo masuak pulo ka ranah tajamahan dengan manajamahkan banyak karya panulih luar negeri, sarupo A. Conan Doyle, George Orwell, W. Somerset Maugham, Ernest Hemingway, Guy de Maupassant, dan lain-lain.[4]

Sabagai sejarawan jo panulih buku, Joesoef Sou'yb alah mambuek indak kurang dari 50 judul buku tantang Islam, sajarah, jo filsafat. Babarapo buku karya Joesoef Sou'yb diantaronyo:

  • Sejarah Daulat Umayyah 1: Di Damaskus (Penerbit Bulan Bintang, 1977)
  • Sejarah Daulat Umayyah 2: di Cordova (Penerbit Bulan Bintang, 1977)
  • Sejarah Daulat Abbasiyah 1 (Penerbit Bulan Bintang, 1977)
  • Sejarah Daulat Abbasiyah 2 (Penerbit Bulan Bintang, 1977)
  • Sejarah Daulat Abbasiyah 3 (Penerbit Bulan Bintang, 1977)
  • Agama-Agama Besar Di Dunia (Penerbit Pustaka Al-Husna, 1983)
  • Logika Hukum Berpikir Tepat (Penerbit Pustaka Al-Husna, 1983)
  • Sejarah Daulat Khulafaur-Rasyidin (Penerbit Bulan Bintang, 1979)

Kahidupan Pribadi

[suntiang | suntiang sumber]

Joesoef manikah jo Yahyaniyah. Kaduonyo indak bakaturunan dan mangangkek anak banamo Muhammad Yusdi, nan maningga mudo. Yahyaniyah maningga pado 27 Agustus 1992, sadang limo bulan kudian Joesoef manyusua (5 Januari 1993). Inyo jo bininyo dimakamkan di kota kadiamannyo, Medan.[1]

  1. a b c d e Atisah, Maini Trisna Jayawati, dan Erlis Nur Mujiningsih. 2010. Joesoef Sou'yb dan Roman Medan. Jakarta: Pusat Bahasa, Pendidikan Nasional, 2010. ISBN: 9789790690400
  2. a b c d Hasril Chaniago (editor). 2023. Ensiklopedia Tokoh 1001 Orang Minang. Padang: UMSB Press. ISBN: 978-623-8416-00-4
  3. a b "Minang saisuak #319: Joesoef Sou’yb: pengarang prolifik roman Medan (1916-1993)", https://niadilova.wordpress.com/2017/10/23/minang-saisuak-132-joesoef-souyb-pengarang-prolifik-roman-medan-1916-1993/ diakses tanggal 18 Januari 2024
  4. "Joesoef Sou'yb",https://ensiklopedia.kemdikbud.go.id/sastra/artikel/Joesoef_Sou%27yb diakses tanggal 20 Januari 2024