Indang

Indang (Jawi: ايندڠ) adolah alat kasenian tradisional tapuak nan barasal dari daerah Sumatra Barat. Alaik kasenian Indang iko disabuik pulo jo Ripai, Bantuaknyo samo jo rebana, tapi ukurannyo labiah ketek, garih tangahnyo sakitar 18 sampai 25 cm sarato tingginyo 4,5 cm. Sarupo jo rebana, alatik kasenian Indang ko barasa dari Arab, kasenian nan dimainan mamakai Indang ko adolah kasenian Islam.

Asa mulo

Pado zaman dahulu pado satiok nagari di Pariaman punyo grup Indang surang. Manuruik kayakinan nan ado, satiok kalompok Indang iko mampunyoi apo nan disabuik Sipatuang Sirah marupokan kalompok urang tuo nan mampunyoi kakuatan gaib untuak menjago kasalamaik an grupnyo dari kakuekan lua nan dapek mahancuakan kalompok lain.

Dalam pamiliahan wakatu, pamainan Indang ko terkenal pulo jo istilah Indang naiak jo Indang turun. Istilah Indang naiak jo Indang turun ko alaa memasyarakaik di Pariaman, bilo parmainan Indang mamasuki hari partamo, mako mulainyo pamainan dilmulai pado tangah malam antaro jam 11 atau 12 malam. Tapi bilo pamainan mamasuki hari kadua, mako mulainyo adolah sanjo hari sahabih sumbayang Magharik.

Kasenian Indang ko lahia sarato bakambang disurau-surau nan dimainan sasudah mangaji. Isi dari nyanyian nan dilakukan adolah tantang pangajaran agama, karano itu sifaiknyo adolah dakwah , pamainnyo adolah pamuda-pamuda nan manuntuik pangatahuan agamo. Tapi dalam parkambangan barikuiknyo pusek aktivitas pamainan Indang barubah dari surau ka surau dimano tampek sasaran disabuik laga-laga, sajenis pentas nan indak diagiah dindiang sahinggo panonton dapek maliek dari sagalo panjuru.

Pamainan

Pamainan Indang biasoonyo duduak basabalahan, baderet-deret antaro 9 sampai 25 urang, di mano jumlah pamainnyo ganjia. Masiang-masiang pamain mamegang jo mamainan Indang atau Ripai sarato mangiriang garakannyo jo lagu-lagu sacaro basamo-samo jo sarompak. Indang dimainan dek tangan samo jalan manokok-nokok jo manjantiakan jari ka Indang . Dalam pamainan Indang tasabuik, garak tubuah ikuik pulo manonjol,samo garak maliuak-liuakan tubuah sacaro sarompak sarato balawanan arah antaro pamain nan ciek jo pamain nan lainnyo.

Kalau nan ciek maliuakan badan ka kanan agak ka muko, mako pamain barikuiknyo meliuakan badan kaarah kiri kabalakang. Adolo urang-urang pantiang dalam pamainan Indang ko disampiang pamain nan banyak adolah:

Tukang Dzikira nan bafungsi sabagai panyanyi tungga nan kamudian diikuikan dek kasado pamain. Tukang Dzikia ko biasonyo duduak di balakang di lua deretan pamain nan lain.
Tukang Aliah nan bafungsi untuak maubah (mangaliah) garak nan ciek ka garak nan lain jo mangaliah caro pukua Indang nan dipegang pamain.

Daerah palastarian Indang

Jikok nio mancaliak Pamainan Indang atau Ripai di Sumatra Barat lokasi nan paliang popular adolah di daerah Kabupaten Padang Pariaman nan dikenal jo pamainan Indang Pariaman atau Indang Piaman. Nan manjadi ciri khas dari Indang Pariaman adolah dimainan pado malam hari, biasonyo dalam acara baralek nagari saripo batogak kudo-kudo, pasa malam nan jarang bana ditampilkn dalam acara baralek.

Dalam panampilan Indang Piaman ko biasonya dibaok dek 3 grup nan datang dari 3 jorong nan babeda, atau ciek grup tuan rumah, duo grup pandatang (tamu). Katigo grup tasabuik duduak dalam posisi sagitigo, sarato kotiga grup tasabuik bamain Indang mampunyai ciek tema atau masalah nan didiskusian sabalum pamainan dimulai sarato manantuan grup mano nan ka bamain partamo. Biasonyo nan mamulai bamain tu adolah grup tuan rumah atau grup nan ditunjuak sabagai tuan rumah. Kalau dinagari iu indak ado grup Indang, mako grup partamo sabagai tuan rumah mamulai pamainan. Di mano grup ko alah siap mengarang nyanyian atau kata-kata nan labiah baisi pado hal-hal atau masalah nan tajadi dipihak tuan rumah, sarupo namo bukik, sungai, hasia alam, kagiatan panduduak jo lain-lain. Salanjuiknyo pamainan Indang ko balangsuang sacaro bagantian dari masiang-masiang grup jo tema nan alah dipiliah.

Liek pulo

Tari indang

Baco lanjuikan

(Indonesia) Ediwar (2007). Indang Pariaman: dari tradisi surau ke seni pertunjukan rakyat. Deni Hermawan. Universitas Pendidikan Indonesia. ISBN 979-1179-07-7.

Pranala lua

(Indonesia) Indahnya Alunan Indang Pariaman^{[pranala nonaktif permanen]}; 17 April 2011, Harian Haluan; diakses 05 Maret 2013.
(Indonesia) Tari Indang Archived 2012-09-16 di Wayback Machine.; Situs rasmi pemkab Pariaman; diakses 05 Maret 2013.