Gulai pangek masin
 Pangek Masin | |
| Asa | |
|---|---|
| Namo lain | Gulai ikan masin |
| Nagara | Indonesia |
| Daerah | Sumatera Barat |
| Detail | |
| Jinih idangan | Utamo |
| Panyajian | Angek atau suhu ruangan |
| Bahan utamo | Lauak, santan, lado, bumbu |
Gulai pangek masin atau gulai masin ikan adolah makanan tradisional dari Minangkabau, Sumatera Barat, Indonesia, nan barupo gulai bakuah kuniang karano mamakai kunyik. Pangek masin biasonyo tabuek dari lauak tongkol nan dipaduan jo bumbu-bumbu khas daerah Padang. Di gulai pangek masin ado pulo nan mamasuakan kapalo lauak. Rasonyo nan asin jo gurih dari santan mambuek lamak mamakanyo katiko angek-angek jo nasi angek. Gulai pangek masin biasonyo di masak di hari biaso, atau di acara-acara baralek.[1]
Gulai pangek masin indak hanyo lauak nan ado didalamnyo, di sampiang tu dapek juo dicampua pakai tahu, taruang, tempe, toge, asam tunjuak (asam balimbiang), jo lado hijau bulek. Asam tunjuak batujuan untuak manambah raso lamak. Rasonyo nan asam, asin, saketek manih dari lauaknyo sarato guriah dari santannyo manjadikan daya tarik urang-urang untuak mancubonyo.[2]
Resep
[suntiang | suntiang sumber]
Bahan-bahan untuak mambuek pangek masin tadiri dari lauak, 6 buah bawang sirah, 4 siung bawang putiah, 700 ml santan pakek, 10 buah lado kutu, asam kandih, daun limau, aia asam kapeh, asam balimbiang (asam tunjuak), tomaik, daun ruku-ruku, daun salam, batang sarai, daun kunyik, minyak manih jo garam. Untuak bumbu aluihnyo tadiri dari 9 buah bawang sirah, 6 siuang bawang putiah, 10 buah lado sirah, 4 buah dama, 5 kunyik, 3 buah sipadeh, sasendok teh lado bubuak, duo sendok teh garam, jo duo satangah sendok teh gulo.[3]
Mulonyo basuah barasiah-barasiah lauak tongkol, sasudah tu galimangan aia asam kapeh jo garam di ikan tu. Anokan agak sabanta, sudah tu basuah baliak. Angekan minyak di kuali sampai manggalagak, sudah tu tumih lado sirah jo bawang-bawang nan alah diirih tadi sampai harum. Salanjuiknyo masuakan bumbu-bumbu nan alah di aluihan tadi sarato daun salam, daun limau, daun kunyik jo daun sarai sambia diaduak marato. Sasudah bumbu masak, masuakan santan kadalamnyo. Masak sampai manggalagak, jan lupo aduak taruih bia santanyo indak pacah. Sasudah manggalagak, masuakan lauak sarato asam kandih kadalamnyo. Masak sampai santan pakek jo lauaknyo ampuak. Masuakan tomat samo asam tunjuak (asam balimbiang) sampai tomaik jo asam manjadi layua. Jikok alah masak, bangkik dari kompor, matian kompor.[1]
Kabaradoan
[suntiang | suntiang sumber]Salain dapek dibuek di rumah-rumah, gulai pangek masin dapek pulo kito jumpai di rumah makan (lapau nasi) Padang. Salain ado di rumah-rumah makan padang, gulai pangek masin ado pulo pas acara-acara panikahan (baralek, mandoa).[2]
Rujuakan
[suntiang | suntiang sumber]- ↑ a b Rahmawati, Andi Annisa Dwi. "Gulai Masin, Olahan Ikan dengan Racikan Bumbu Khas Minang yang Lengkap". detikfood. Diakses tanggal 2021-06-15.
- ↑ a b Okezone (2013-08-19). "Gulai Masin : Okezone Lifestyle". Diakses tanggal 2021-06-15.
- ↑ "Pangek Masin » Budaya Indonesia". budaya-indonesia.org. Diakses tanggal 2021-06-15.