Djauharah (majalah)

Wikipedia Minangkabau - Lubuak aka tapian ilimu
Sampul majalah Djauharah. Tulisan mamanjang di antaro duo kotak sagitigo artinyo "dihiasi jo pangatahuan agamo tertib sopan penghidupan".

Djauharah adolah majalah Islam bulanan baaksara Arab-Melayu nan tabik di Fort de Kock (kini ko Kota Bukittinggi), Sumatra Barat dari 1923 hinggo 1924. Majalah iko didirian dek Shadiyah Shakūrah, putri Abdul Latif Syakur, saurang ulama Minangkabau. Maunsuang motto "oentoek bangsa perempoean”, Djauharah bakambang manjadi media bagi pelajar perempuan sikolah di Agam.

Sijarah[suntiang | suntiang sumber]

Majalah Djauharah didirikan oleh Shadiyah Shakūrah, dibantu dek Abdul Latif Syakur nan marupoan ayahnyo. Di antaro kontributor majalah iko, salain Shadiyah, adolah Khodijah jo Rosmin.[1]

Kamunculan Djauharah didugo tainspirasi dari penerbitan Soenting Melajoe, majalah perempuan nan didirian dek Rohana Kudus. Hal iko tacamin dari pandangan Abdul Latif Syakur, saurang ulama nan sacara aktif mandorong perempuan bakiprah di bidang pandidikan, tamasuak maagiah contoh jo manyakolahkan putrinyo di madrasah bakonsep modern nan inyo dirikan, Al-Tarbiyatul Ḥasanah di Balai Gurah, IV Angkek, Agam. Dalam autografnyo bajudul Al-Mu’ashārah, Abdul Latif Syakur manyatoan dukuangannyo taadok upayo Rohana Kudus manabikan Soenting Melajoe.

Majalah Djauharah dikaluaan di Fort de Kock jo ukuran karateh 20 cm x 12 cm.[1]

Isi[suntiang | suntiang sumber]

Majalah Djauharah ditulis manggunoan aksara Arab dalam bahaso Melayu. Djauharah adolah kato dalam bahasa Arab nan bararti permata. Majalah iko tabik sakali dalam sabulan jo manggunoan pananggalan Hijriyah.[2] Satiok edisinyo bajumlah 16 halaman. Urutan halaman dimulai dari sabalah kanan. Pamuatan iklan di dalam majalah dilatakkan pado halaman patama jo tarakhia.[3]

Di halaman sampul, tadapek katarangan tantang majalah: "Dihiasi jo pangatahuan agamo tertib sopan panghidupan". Tulisan tasabuik ditulih mamanjang di antaro duo garih ateh bawah, jo lataknyo indak wajar nan ma majalah nan lain yakni, di tangah halaman muko, mambalah sampul muko majalah nan babantuak persegi panjang, sahinggo halaman muko tu nampak manjadi duo sagitiga siku-siku.[2]

Sacaro umum, Djauharah mambahas tantang agamo Islam, tautamo hubuangannyo jo perempuan. Tulisan bakanaan topik iko dimuek di rubrik bajudul "Diniyah", "Al-Islam", jo "Ilmu al-Adab". Kabanyakan tulisan salalu diawali jo manunjuakkan hadis ataupun ayat Alquran sasuai tema tulisan dan diikuti tajemahannyo.[1] Redaksi manarimo karangan dari para perempuan. Walaupun demikian, tadapek tulisan-tulisan nan dimuek basumber dari surek kaba lain.[3]

Rubrik lainnyo yakni "Kata Tukang Syair", "Balehan", "Ucapan", jo "I'lam". Rubrik "Ucapan" diisi dek redaksi Djauharah untuak maucapkan tarimo kasih atas kiriman babarapo majalah saparti Pewarta Islam, Al-Munir, dan Al-Itqan. Masing-masing majalah diagiah katarangan singkek baik tantang  majalah, huruf, jo bahaso majalah, wakatu tabik, harago balangganan jo garih gadang isi majalah. Redaksi mamuek ajakan agar kaum perempuan mambaco majalah-majalah tasabuik bahkan alangkah baiaknyo katiko mamiliah balangganan. Adapun rubrik "I'lam", nan bararti pangumuman dalam bahaso Arab, mamuek daftar palanggan palanggan nan alah mambayia ongkos langganan, samacam transparansi pitih masuak dari palanggan.[4]

Respons jo baranti tabik[suntiang | suntiang sumber]

Djauharah bakambang manjadi media bagi para perempuan, tautamao pelajar di madrasah Abdul Latif Syakur, untuak manyuaroan pandapaik jo pamikirannyo dalam wilayah nan labiah lueh.

Panabikan Djauharah hanyo batahan hinggo 1924. Dalam rubrik "I'lam", Djauharah jo bamacam caro maminta palanggan untuak mambayia pitih langganannyo: "Kalau Djauharah indak diagiah pitih jo pakaian, tantulah inyo indak bagak mangaluakan perkataan, jo indak inyo dapek tibo ka haribaan pambaco."[4]

Rujuakan[suntiang | suntiang sumber]