Djamaluddin Tamin

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Djamaluddin Tamin
Lahia 18 Desember 1900
Bendera Balando Koto Gadang, Agam, Hindia Balando
Kabangsaan Bendera Indonesia Indonesia
Karajo Politisi
Dikana dek Pajuang kamardekaan Indonesia
Agamo Islam

Djamaluddin Tamin (laia di Koto Gadang, Agam, Sumatera Barat, Hindia Balando, 18 Desember 1900) adolah surang pajuang kamardekaan Indonesia. Baliau mandapek-an pandidikan Inlandsche School, lalu kudian malanjuik-an ka sakola agamo Sumatera Thawalib, Padang Panjang. Satamaik sakola, baliau maaja disinan, lalu bakanalan jo aliran Kominih pado taun 1922.[1] Djamaluddin kudian manjadi salah surang panggiat kida (kiri) nan rajin manulih, sarato acok kalua masuak panjaro.

Pado bulan Desember 1923, baliau manulih di koran Pemandangan Islam karano panangkok-an para pajuang kamardekaan Indonesia. Karano tulisan tu, anam bulan kudian baliau dijatuahi hukuman, lalu masuak panjaro Cipinang salamo limo baleh bulan. Pado tanggal 2 Juni 1927 basamo jo Tan Malaka sarato Subakat, baliau mandirian Partai Republik Indonesia (PARI) di Bangkok, Thailand. Partai ko batujuan untuak mambantuak jaringan proletar sa-Asia Tenggara jo Australia. Tamin batangguang jawab ateh kagiatan PARI di Hindia-Balando, Malaysia, jo Singapura. Karano dianggap manantang pamarentahan Inggirih, tanggal 13 September 1932 baliau ditahan di Singapura, lalu kudian dibao ka Batavia untuak disarahan ka pamarentah Hindia-Balando. Disiko baliau dipanjaro babarapo bulan, sabalun akhianyo dibuang ka Boven Digul.[2] Sasudah Japang mandarat di Indonesia, Tamin basamo jo tahanan Digul lainnyo dipindahan ka Brisbane, Australia. Disiko pado tanggal 21 September 1945, mareka mambentuak Komite Indonesia Merdeka (KIM), lalu Tamin manjabat sabagai katuanyo.[3]

Rujuak-an[suntiang | suntiang sumber]

  1. Mestika Zed; Kepialangan, Politik, dan Revolusi: Palembang, 1900-1950; 2003
  2. Audrey R. Kahin, Dari Pemberontakan ke Integrasi: Sumatra Barat dan Politik Indonesia, 1926-1998; Yayasan Obor Indonesia, 2005
  3. Molly Bondan, Spanning A Revolution, Yayasan Obor Indonesia