Datuk Jannaton

Datuk Jannaton, atau Datuk Jenaton, adolah saurang parantauan Minang nan manaruko tampek bamukim di Batu Uban, Pulau Pinang, Malaya pado awal abad ka-18. Katurunannyo bakambang saindaknyo 5000 urang, tamasuak Yusuf bin Ishak, presiden patamo Singapua.

Hiduik Awal

Jannaton, banamo ketek Jenan basuku Piliang Sani nan bamukim di Kampung Dalam, Gudam, Pagaruyuang, iolah anak dari Rajo Labu, turunan dari Rajo Bakilap Alam Tuanku Bagewang, salah saurang rajo alam Pagaruyuang, sadang bundonyo iolah Puti Sari Alam Rajo Lembang Alam. Sabalun marantau ka Penang, inyo bakawan jo Datuk Setia di Payakumbuah dan manikahi saudarinyo Tuan Gadih Ambun Suri. basamo Datuk Setia, Ismail dan Muhammad Saleh, Jenan barangkek manuju Batu Bara, pasisia timur Sumatera. Di situ inyo manikah baliak jo Puang Gadis Sinaga, anak dari saurang datuk Batu Bara, dan baranak Cik Ulung Intan jo Datuk Ongah Beramban. Oleh mintuonyo itu, Jenan diagiah lahan laweh di tampek banamo Tanah Datar, masih di daerah Batu Bara pulo.

Marantau ka Pinang

Dari Batu Bara, Jenan sarato 80 urang anak buahnyo barangkek ka Kedah pado 1730-an. Inyo mandarek di Tanjong, lalu ka Batu Uban. Wilayah itu barado dalam kuaso Rajo Kedah, nan maso itu iolah Muhammad Jiwa.