Danau Retba

Pamandangan danau dari tapian Danau Retba

Lokasi	Samanajuang Cap Vert Senegal
Koordinat	14°50′18.02″N 17°14′41.36″W
Jinih danau	saline lake / Danau Garam
Aliran kalua utamo	Sungai Retba
Talatak di nagara	Senegal, Afrika Barat
Panjang maks.	3 Km
Laweh pamukoan	3 km2 (1 sq mi)
Kadalaman maks.	3 meters (9.8 ft)
Volume aia	240 km3 (58 cu mi)
Pamukiman	Dakar

Danau Retba adolah sabuah danau nan barado di negara Senegal, Afrika. Lokasi danau ko tapeknyo barado di subalah utara dari Samananjuang Cap Vert dan subalah timur lauik dari ibu kota negara Senegal, Dakar. Dalam bahaso asli panduduak Sinegal Danau Retba ko di sabuik juo jo Lac Rose. Danau ko marupoan salah ciek danau nan taunik nan barado di Afrika, sabab danau ko mampunyoi aia danau nan bawarna merah mudo. Karano kaunikan ko, danau ko manjadi salah ciek tampek tujuan objek wisata nan barado di negara Sinegal.

Lokasi

Danau Retba barado di samanjuang Cap Vert, Afrika bagian Baraik atau subalah timur lauik dari kota dakar, Ibu kota Sinegal. Jarak dari kota Dakar ka danau Retba bajarak 40 km atau kalau bajalan jo kenderaan maabihan wakatu salamo 40 minik atau sajam pajalanan. Danau Retba ko mampunyoi luweh sakitar 3 km pasegi. Panjang danau ko kiro-kiro sakitar 3 kilometer. Danau ko mampunyoi dalam sakitar 3 meter atau 9,8 kaki. Latak danau ko barado dakek jo samudera atlantik nan hanyo dipisahan dek bukik-bukik ketek nan barado di pinggia pantai dari samudera atlantik.

Kaunikan Danau

Bawarna merah jambu

Danau Retba ko mampunyoi aia danau nan bawaran merah mudo atau merah jambu. Namun baitu, indak salalu warna aia danau ko bawarna merah jambu. Di maso-maso tatantu warna aia danau ko barubah manjadi warna ungu mudo, kadang - kadang bawarna merah mudo, dan pado peridoe musim lainyo barubah manjadi bamerah pakek. Warna merah jambu atau muncua nyo warna-warna nan lain di aia danau ko disababkan dek adonyo bakteri nan banamo bakteri halofilik. Bakteri ko adolah bateri nan indak babahayo. Bakteri iko dapek iduik pado kondisi kadar aia garam nan tinggi. Salanjuiknyo, warna aia danau nan bawarna merah mudo tasabuik di produksi dek makhluk iduik atau organisme nan manyukoi garam nan banamo Dunaleilla Salina. Caro karajonyo, makhluk iduik tasabuik manyerap sarato jo manggunoan energi sinar mato ari untuak mangumpuan sabuah tanago nan labiah untuak manghasiakan pigmen nan bawarna merah sahinggo akhia nyo mambuek warna aia danau barubah manjadi warna merah mudo. Warna aia danau ko nampak jaleh katiko musim kariang antaro bulan November hinggo bulan Juni. Kamudian, Warna dari aia danau ko nampak kurang jaleh katiko sadang musim hujan di daerah sinegal.

Danau Garam

Saurang warga sadang manambang garam dari dalam Danau Retba.

Danau Retba ko disabuik juo sabagai danau garam karano tadapek kandungan garam nan cukuik tinggi di aia danau ko. Hal iko disabab kan dek lokasi antaro Danau Retba ko jo parairan Samudera Atlantik hanyo dipisahan dek babarapo bukik pasia nan sampit jo ketek. Karano lataknyo tasabuik indak jauh dari lauik atlantik mambuek aia lauik dari Samudera Atlantik bisa masuak ka dalam danau. Kajadian ikolah nan manjadi salah cieknyo panyabab aia danau manjadi taraso asin. Salain itu, panyabab tambahnyo iolah tajadinyo panguapan nan sangaik tinggi di daerah sinan disabakan dek udaro di kawasan tasabuik bahawo angek. Kanduangan garam nan ado di dalam aia danau retba ko tamasuak tinggi, kadar garam nyo mancapai hinggo 40% atau 400 g per kg air. Aratinyo, labiah dari 10 kali lipek dari tingkek ka asinan atau kadar garam pado aia lauik. Tingginyo kadar garam ko manyababkan dayo apuang aia danau sangaik kuek. Mukasuiknyo iolah siapopun nan masuak atau baranang ka dalam danau indak akan tabanam. Akibaik tingginyo kanduangan garam di dalam air danau ko, panduduak satempek mamanfaikannyo untuk mancari piti jo caro bakarajo manambang garam dari danau tasabuik. Masyarakik satempek bakarajo rato-rato 6 jam sampai 7 jam sahari untuak maambiak garam dari danau nan kamudian dijua kapado para pedagang atau toke garam. Garam nan alah diambiek di panduduak satampek ko kamudian diekspor ka babagai di daerah di Afrika dan lua Afrika. Danau ko dapek manghasiakan garam sakitar 60.000 ton satiok taunyo. Ado labiah kurang 3.000 buruh atau pakarajo tambang garam ko, indak hanyo urang Sinegal sajo tapi ado juo urang-urang dari negara-negara Afrika baraik laninyo. Pakarajo nan manambang garam ko indak hanyo laki-laki, padusi pun ikuik juo manambang garam ko. Karano masyarakaik tu bakarajo 6 sampai 7 jam sahari, para pakarajo tu punyo caro suruang untuak malinduangi kulik nyo jo ubek tradisional nan nyo sabuik beurre de Karite. Zat-zat nan dihasiakan dek ramuan ko dapek mambantu para pakarajo ko untuak macagah karusakan jaringan kulik dek kanai aia garam jo kanai sinar matoari. Salain itu, garam ko mampunyoi manfaaik nan lainyo dek masyarakaik Senegal, tarutamo dek para nalayan. Garam digunoan dek nalayan di Senegal untuak maawetkan ikan, sarato manjadi bagian dari bumbu resep masakan tradisional di negara Sinegal.

Binatang nan iduik di danau ko

Danau Retaba ko indak banyak mampunyoi makhluk iduik nan dapek di caliak. Pakaro tasabuik di karanoan aia danau ko nan manganduang kadar garam nan tinggi. Hanyo ado binatang sarupo ikan nan bisa baadaptasi jo kandisi danau nan damikian. Babarapo jinih ikan dapek manyasuaikan diri untuak batahan iduik di lingkungan aia danau tasabuik nan sangaik asin. Ikan - ikan nan dapek baradaptasi jo tingkek kaasinan aia danau tasabuik mampunyoi ukuran nan labiah ketek dibandiangkan jo ikan - ikan nan iduik di parairan normal sarupo di batang aia atau di danau aia tawa.

Poto - poto Danau Retba

• 
  Pamandangan danau retba. Babarapo pangunjuang danau sadang barang di dalam danau nan aia nyo bawarna merah jambu.
• 
  Kagiatan masyarakik nan sadang manambang garam di danau retba. Indak hanyo laki-laki nan manambang, ado pulo padusi nan ikuik pulo bakaarajo manjadi panambang garam di danau ko.
• 
  Garam nan takumpua dari hasia panambangan dari dalam Danau