Danau Biru Sawahlunto

Danau Biru Sawahlunto adolah tampek wisata nan baru-baru ko manjadi tampek nan acok di datangi oleh kaum mudo untuak pai bafoto. Talatak di Parambahan, Kecamatan Talawi, Sawahlunto nan dahulunyo adolah tampek tambang. Ado banyak bakeh galian tambang batu baro. Lubang bakeh galian ko manjadi bantuak kuali gadang nan kamudian tarisi aia. Lamo-lamo manjadi bantuak ganangan jo manjadi sabuah danau. Aianyo nan bawarna biru marupokan hasia pantulan cahayo matohari ka dasar danau, sahinggo manciptakan efek nan manawan. Siso-siso tambang di lokasi ko masih talihek jaleh dari gunuang batu nan mangalilingi danau. Batu-batu jo batang kayu nan ado di sakitar danau maagih pesona surang bagi mato nan mancaliak. Masyarakek satampek manyabuik namo Danau Biru ko dengan namo Danau Bacan atau Danau Tomosu. Kota Sawahlunto sajak dululah tasabuik sabagai panghasil batu baro nan agak banyak.

Danau Biru Sawahlunto

Lokasi ko bajarak sakitar 13 kilometer dari tangah kota Sawahlunto. Manuju jalan kasiko sangaik payah, mangko di saranan untuak pakai sepeda motor, karano jalannyo yang alun di aspal jo ba batu-batu. Danau Biru Sawahlunto ko masih tagolong cukuik baru jo alun banyak urang nan tau kabaradoannyo. Mulo dari banyaknyo nan tau karano ado saurang nan bafoto jo manyabaannyo di sosial media. Satolah tu banyak wisatawan nan tatariak untuak mangunjungi Danau Biru ko sampai kini. Karano di lokasi ko memang mampunyoi pamandangan nan rancak untuak bafoto. Latar balakang Danau Biru ko manghasilkan foto nan unik jo rancak untuak di jadian momen nan baharago.

Karano pangunjuang nan datang tarui batambah sahinggo Kapalo Dinas Pariwisata jo Kebudayaan Kota Sawahlunto bajanji untuak mampaelokan sarano jo prasarano supayo para wisatawan dapek liburan dengan tanang. Disampiang tu masyarakaik satampek juo ikuik mambantu supayo pangambangan Danau Biru ko untuak kamukonyo bajalan labiah elok.

Rujuakan

Net, Wisata Sumbar (13 February 2016). ""Danau Biru" Danau Tersembunyi di Sawahlunto". 

Nektar, Bams (FEB 7, 2019). "PERJALANAN MENIKMATI DANAU BIRU, MUTIARA TERSEMBUNYI DI SAWAHLUNTO". Diarsipkan dari versi asli tanggal November 5, 2019. 

Alena Seruni, Sylvia (17/04/2017). "Danau Biru Sawahlunto. Destinasi Wisata yang 'Tak Sengaja' Terbentuk".