Danau Batur

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Danau Batur
Danau Batur - Danau Batur di kaki gunung
Danau Batur di kaki gunung
Lokasi Kintamani, Kabupaten Bangli, Bali, Indonesia; Indonesia.
Koordinat 08°15′30″S 115°24′30″E / 8.25833°S 115.40833°E / -8.25833; 115.40833Koordinat: 08°15′30″S 115°24′30″E / 8.25833°S 115.40833°E / -8.25833; 115.40833
Jinih danau Polimiktik, danau kawah
Talatak di nagara Indonesia
Panjang maks. 2,5 km (1,6 mi)
Leba maks. 7,5 km (4,7 mi)
Laweh pamukoan 15,9 km2 (3900 ekar)
Kadalaman maks. 88 m (289 ft)[1]
Volume aia 0,82 km³
Panjang tapi danau1 52.68 km
Katinggian pamukoan 1031 m (3383 ft)
Pulau Bali
Pamukiman Kintamani
1 Panjang tapi danau indak baitu jaleh definisinyo.

Danau Batur adolah salah ciek danau nan gadang nan barado di Propinsi Bali. Labiah tapeknyo danau iko barado di Kecamatan Kintamani, Kabupaten Kareng Asem, Propinsi Bali.[2] Danau batur ko talatak di daerah pagunuangan atau dataran tinggi. Lataknyo tapek di kaki gunuang batur atau dapek disabuik juo di kaldera nyo gunuang batur. Gunuang batur ko marupon salah ciek gunuang api aktif nan baradi di pulau Bali. Barado di dataran tinggi mambuek udaro disakitaran danau batur ko manjadi sajuak sahinggo manjadikanyo sabagai tujuan wisata dek para wisatawan nan ka mancaliak rancaknyo pamandangan danau batur ko.[3]

Awa tabantuak[suntiang | suntiang sumber]

Tabantuaknyo danau batur ko bamulo dari malatuhnyo gunuang api purba batur tuo. Sabalum malatuih gunuang api purba ko mampunyoi katinggian sakitar 3000 meter diateh pamukaan aia lauik. Gunuang api batur purba ko di pakiroan malatuih gadang pado 29.300 tahun nan lalu. Akibaik dek malatuih gadang tasabuik, mambuek hancua badan bagian ka ateh dari gunuang api batur purba. Kamudian, dek malatuih gadang itu pulo mambuek dasa gunuang tasabuik manjadi runtuah atau maaram kabawah. Ukuran lawehnya dasa gunuang nan runtuah tu kiro-kiro baukuran 13,8 kali 10 km2 nan mambantuak lingkaran jo panjang diameternyo 7,5 KM sarato mambantuak dindiang terjal sadalam kiro-kiro 400 meter. Kajadian ko marupoan paristiwa tabantuaknyo kaldera partamo dari gunuang batur purba.[4] Sasudah latuihan partamo, kamudian tajadi pulo latuihan nan kaduo. Latiuhan nan kaduo ko tajadi kiro-kiro 20.150 tahun nan lalu. Latuihan ko kamudian mambantuak kaldera nan baru. Kaldera nan baru ko manjadi gunuang api batur kini. Dasa gunuang nan runtuak dek latuihan partamo kamudian batambah runtuah dek latuihan nan kaduo. Runtuahnyo dasa gunuang ko batambah manjadi 200 meter dari runtuhan nan paratamo. Dalamnyo runtuahan dasa gunuang api purba nan malatuihko mambuek dasa tasabuik taisi dek aia taruih manaruih sahinggo manjadi sabuah danau nan disabuik jo danau batur. Sasudah malatuih gadang ko katinggian puncak gunuang batur ko kini adolah 1717 meter di ateh pamukaan aia lauik atau sakitar 686 meter kalau di ukua dari ateh pamukaan aia danau batur.[4][5]

Kaadaan danau[suntiang | suntiang sumber]

Danau batur nan tabantuak dek latuihan gunuang batur purbo ko di sabuik jo jo danau kaldera. Lueh danau batur ko kiro-kiro 16 km pasegi. Aia nan barado di danau ko barasa dari aia hujan jo aia nan mangalia dari pagunuang-pagunuangn nan barado di sakiran danau. Danau batur ko di kaliliangi dek duo bantangan alam nan babeda, Di subalah baraik danau ko tadapek dataran nan randah hinggo ka gunuang batur. kamudian di subalah utara, timua, jo salatan dari danau ko tadapek dataran nan tinggi nan di isi dek bukik-bukik nan terjal nan panjangnyo hinggo mancapai ka gunuang abang.[6]

Danau batur nan barado di daerah pagunuangan mambuek udaro di sakitar danau ko sajuak, Kaadaan suhu udaro di danau batur ko bakisar antaro 22 derajat selsius hinggo 26 derajat selsius. Kondisi cuaca di danau batur ko dipangaruhi juo dek pagerakan angin muson, jikok angin muson bahambuih dari arah baraik mako akan tajadi musim hujan di daerah danau ko. Salanjuiknyo, jikok angin muson bahambuih dari arah timua gunung mako musim paneh akan tajadi di daerah dananu ko.[6]

masyarakaik satampek mamanfaiakan danau batur ko untuak kaparluan sahari-hari sarupo mandi jo mancuci. Salain itu, danau ko dijadian pulo sabagai ladang mato pancaharian panduduak jo cara mambuek karamba ikan. Banyak masyarakaik nan manjadi patani ikan. Karamba ikan atau labiah tasabuik jo namo karamba jariang apuang ko manjadi potensi perekonomian masyarakaik satempek. masyarakaik nan mamaliharo ikan di danau tasabuik dapek manjua ikan hasil panennyo.[7] Dibaliak adonyo potensi ekonomi dari taranak ikan di karamba ko tadapek adonyo masalah pancemaran lingkuangan aia danau. Aia danau manjadi rusak atau indak elok lai karano tacamar dek limbah makanan ikan barupo pelet ikan. Pado tahun 2019 kondisi lingkuangan danau sempat tercemar parah dan pamarintah katiko tu barupayo untuak mampaelokannyo baliak.[8][9] Kaadaan danau nan marupoan danau vulkanik aktif ko dapek pulo mambuek ikan-ikan nan dipaliharo dek masyarakaik tasabuik manjadi mati nan disababan dek balereang. Balerang nan tibo dari bawah danau ko biasonyo tibo-tibo sajo nan langsuang mambuek ikan mati jo barakibaik kapado patani nan marugi.[10]

Wisata[suntiang | suntiang sumber]

Danau batur ko marupoan salah ciek tujuan wisata nan barado di pulau Bali. Pado tanggl 20 September 2012, Danau Batur ko resmi masuak ka dalam jariangan geopark dunia UNESCO (Global Geopark Network). Danau nan rancak nan dikalialiangi dek bukik jo gunuang batur ko manjadi tampek nan rancak bapoto dek wisatawan. Kagiatan nan dapek dilakuan di danau ko tantunyo iolah manaiki parahu. Masyarakaik satempek ado nan manyeoan parahu untuak para turis nan nantinyo diajak bakuliliang sakitaran danau. Salain mancaliak danau jo mamandang gunuang batur, disakitaran kawasan danau batur ko tadapek pulo babarapo objek wisata pandukuang lainyo.[11] Tampek-tampek nan dapek dikunjuangi dek wisatawan disakitaran danau batur diantaronyo iolah Penelokan, Museum Geopark, Treking ka gunuang batur, jo hambatan batu vulkanik atau mancaliak abu vulkanik, salain itu tadapek pulo pamandian aia angek di sakitaran danau ko.[12] Sabagai pandukuang jo panunjang tampek wisata danau batur ko tadapek pulo fasilitas-fasilitas barupo panginapan jo hotel. Ado pulo masyarakaik satampek nan manyewoan rumah atau kamarnyo untuak di jadian panginpan dek wisatawan nan bakunjuang. Salain itu panunjang pariwisata di danau batur iko iolah adonyo oleh-oleh khas nan dapek di bawok pulang dek wisatawan. Oleh-oleh nan dapek dibawo pulang tasabuik iolah barupo hasia patanian masyarakaik satampek sarupo buah jeruk, sayua-sayua, kopi khas kintamani, sarato jo bungo-bungo, dan nan labiah istimewanyo iolah anjiang kintamani, ras anjing nan ado dibali nan dijuo pulo sabagai oleh-oleh dek masyarakaik satampek.[13][14]

Rujuakan[suntiang | suntiang sumber]

  1. "World Lakes - Batur Lake". LakeNet. April 30, 2005. Diakses tanggal December 21, 2017. 
  2. "Data Danau Batur". sda.pu.go.id. Diakses tanggal 2020-06-05. 
  3. Times, I. D. N.; Trisandy, Andry. "Info Wisata Danau Batur Bali: Rute, Harga Tiket, dan Tipsnya". IDN Times (dalam bahasa Indonesia). Diakses tanggal 2020-06-05. 
  4. a b Media, Kompas Cyber. "Evolusi Batur Belum Berakhir Halaman all". KOMPAS.com (dalam bahasa Indonesia). Diakses tanggal 2020-06-05. 
  5. "Letusan Gunung Batur Melukis Alam Bali". Tutur Visual (dalam bahasa Inggris). 2020-05-01. Diakses tanggal 2020-06-05. 
  6. a b info@baturglobalgeopark.com. "Batur Global Geopark Official Website". Batur Global Geopark (dalam bahasa Inggris). Diakses tanggal 2020-06-06. 
  7. dkk, Samuel (2011). Karakteristik Lingkungan, Biologi Ikan dan Potensi Pengembangan Perikanan di Danau Batur Bali. Pusat Penilitian Pengelolaan Perikanan dan Konservasi sumber Daya Ikan Kementerian Kelautan dan perikanan. 
  8. Media, Kompas Cyber. "Tercemar, Air Danau Batur Bali Tidak Layak Dikonsumsi Langsung Halaman all". KOMPAS.com (dalam bahasa Indonesia). Diakses tanggal 2020-06-06. 
  9. Post, Redaksi Portal Bali (2019-08-24). "Tekan Pencemaran Danau Batur, KJA Ramah Lingkungan Dikembangkan". BALIPOST.com (dalam bahasa Indonesia). Diakses tanggal 2020-06-06. 
  10. Post, Redaksi Portal Bali (2019-07-21). "Danau Batur Mulai Normal, Petani Ikan Belum Berani Beraktivitas di KJA". BALIPOST.com (dalam bahasa Indonesia). Diakses tanggal 2020-06-06. 
  11. "Spot Wisata Menarik di Sekitar Danau Batur yang Wajib Dikunjungi". Tribun Bali (dalam bahasa Indonesia). Diakses tanggal 2020-06-06. 
  12. Media, Kompas Cyber. "Menguak Pesona Kintamani, 4 Pilihan Wisata Seputar Danau Batur Halaman all". KOMPAS.com (dalam bahasa Indonesia). Diakses tanggal 2020-06-06. 
  13. "Festival Danau Batur 2012, Dari Budaya Sampai Lomba Anjing Kintamani!". detikTravel (dalam bahasa Indonesia). Diakses tanggal 2020-06-06. 
  14. "Menikmati Kopi Berlatar Keindahan Kintamani". kumparan (dalam bahasa Indonesia). Diakses tanggal 2020-06-06.