Bunker Japang Taluak

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Bunker Japang Taluak atau Lubang Japang Taluak adolah salah satu paninggalan Zaman Pendudukan Jepang barupo bunker atau lubang nan kagunoanyo adolah sabagai tampek balinduang katiko dalam situasi baparang. Bunker iko manjadi paninggalan lainnyo sasudah Lubang Jpang Bukittinggi nan alah terkenal sacaro nasional. Bangunan iko alah ditatapkan sabagai salah satu situs cagar budayo nasional sajak 22 Juni 2010. Sasuai jo namonyo, bunker iko talatak di Jorong Taluak, Nagari Taluak IV Suku, Kecamatan Banuhampu, Kabupaten Agam, Sumatra Barat. Situs iko dikelola dek BPCB Batusangkar jo bantuan masyarakaik satampek.

Tampek[suntiang | suntiang sumber]

Persisnyo, bangunan iko talatak di tangah-tangah pamukiman dakek SDN No 39 Taluak, kurang labiah 25 m dari jalan rayo Bukittinggi – Jambu Air. Tampeknyo indak jauah dari Kantua Wali Nagari Taluak serato jo salah satu situs cagar budayo lainnyo yaitunyo Masjid Jamik Taluak. Jarak tampuah ka tampek iko bakisar 5,2 km dari Bukittinggi jo manggunoan kandaraan roda 4 jo roda 2.[1]

Sajarah[suntiang | suntiang sumber]

Pado maso panjajahan Japang (1942-1945) di daerah Sumatra Barat, khususnyo Bukittinggi dan sakitarnyo dianggap sabagai daerah nan sangaik strategis. Kota Bukittinggi tu kamudian dijadian sabagai markas gadang Angkatan Darat ka-25 Kekaisaran Japang nan manguasai Pulau Sumatra. Untuak mandukuang patahanan daerah nan dianggap strategis di sakitar Bukittinggi, mako dibangun babagai jenis bangunan patahanan jo mamanfaaikan tanago karajo pribumi (Romusha). Manuruik bantuak bangunannyo, tampek iko hanyo dijadian sabagai tampek palinduangan komando patahanan di sakita daerah Taluak, manuruik asumsinyo karano indak tadapek "spy hole" atau lubang manembak.[2] Sabagai salah satu markas gadang dek tantara ka 25 nan maliputi Pulau Sumatra, khusus di sakitar Kota Bukittinggi, banyak sakali dibangun lubang-lubang bawah tanah, bunker, serato jo pillbox. Salah satu bangunan basajarah manandoan panguasaan tantara Japang khususnyo di pinggiran Kota Bukittinggi adolah Bunker Japang Taluak. Bunker Japang Taluak marupoan salah satu Cagar Budaya nan manjadi saksi kabaradoan jo panguasaan tantara Japang khususnyo di Provinsi Sumatra Barat.[3]

Rupo bangunan[suntiang | suntiang sumber]

Bunker Japang Taluak sacaro administratif barado di Nagari Taluak IV Suku,Kecamatan Banuhampu, Kabupaten Agam, Provinsi Sumatra Barat. Namun manuruik latak geografisnyo, sacara umum bangunannyo barado di pinggie Kota Bukittinggi dan marupoan salah satu bagian dalam konteks patahanan Japang di Kota Bukittinggi. Diliek dari bantuak bangunannyo, bangunan nan sacaro kasaluruahan babahan beton/ semen iko babantuak gabuangan dari babarapo bantuak geometrik antaro lain bulek, satangah lingkaran, pasegi, dan bantuak indak baraturan (gabuangan dari babarapo bantuak nan manghasiakan sabuah bantuak baru nan unik). Ukuran dindiang bangunan dibuek taba nan baguno maradam atau tahan samo ledakan. Salain itu, ruangan inti bangunan iko dibuek jo posisi barado satangah dari pamukaan tanah. Manuruik analisis bantuak bangunan nan sarupo di daerah lainnan punyo struktur samo, bantuak atau gaya bangunan iko marupoan gaya umum nan dipakai dan dibuek khusus pado maso Parang Dunia II dek tantara Japang pado daerah-daerah strategis nan inyo kuasoi.[3]

Pado lokasi tasabuik tadapek 3 bunker paninggalan panjajah Japang nan dipakiroan sabagai tampek balinduang tantara Japang pado maso panjajahan di Nagari Taluak iko. Dindingnyo sangaiklah taba, yaitunyo dari 30 sentimeter sampai 1 meter nan mambuek bunker iko cukuik aman jiko tajadi sarangan. Dari 3 bangunan nan ado, duo diantaranyo babantuak samo, sadangkan nan ciek lai baukuran labiah ketek dan relatif sederhana bantuknyo.[3]

Katigo bunker itu bantuknyo manyurupoi tangki, 2 diantaranyo panjangnyo 7 meter, leba 3 meter jo tinggi 3 meter serato balokasi di dakek Kantua Wali Nagari Taluak IV Suku, di mano Bunker I talatak di balakang, samantaro Bunker II barado di sampiang kantua. Sadangkan ciek ;lai, bantuak bangunannyo labiah sederhana dan agak ketek nan balokasi di laman SD Nagari 21 Taluak dan marupoan Bunker III. Jiko dicaliak-caliak baliak bangunan iko babantuak layaknyo sabuah benteng malangkuang, mambantuak satangah lingkaran sampai ka bagian bawah nan panjangnyo sampai 7 meter nan dipadu jo bangunan babantuak pasegi dan data pado bagian atehnyo nan bafungsi sabagai pintu masuak.[3][4]

Rujuakan[suntiang | suntiang sumber]

  1. "Bunker Jepang Taluk Sumatera Barat" (dalam bahaso id-ID). 27 Pebruari 2018. https://situsbudaya.id/bunker-jepang-taluk-sumatera-barat/. Diakses pado 6 September 2019. 
  2. bpcbsumbar (2017-11-20). "Bunker Jepang Taluk" (dalam bahaso en-US). https://kebudayaan.kemdikbud.go.id/bpcbsumbar/bunker-jepang-taluk/. Diakses pado 6 September 2019. 
  3. a b c d bpcbsumbar (2018-07-17). "Bunker Jepang Taluk" (dalam bahaso en-US). https://kebudayaan.kemdikbud.go.id/bpcbsumbar/bunker-jepang-taluk-2/. Diakses pado 6 September 2019. 
  4. "Bungker Lobang Jepang di Banuhampu-Agam, Sumbar Masih Berdiri Kokoh" (dalam bahaso Indonesia). http://rri.co.id/post/berita/323983/daerah/bungker_lobang_jepang_di_banuhampuagam_sumbar_masih_berdiri_kokoh.html. Diakses pado 6 September 2019. 

Pranala Lua[suntiang | suntiang sumber]