Lubang Japang

Janjang di dalam Lubang Japang nan tampek manurun curam.

Pintu masuak Lubang Japang di Ngarai Sianok, dakek Taman Panorama.

Lubang Japang marupoan salah satu obyek wisata sijarah nan ado dakek Kota Bukittinggi, Sumatera Barat, Indonesia. Lubang Japang sabananyo sabuah terowongan tampek balinduang (Inggirih: bunker) nan dibuek tantara panjajah Japang labiah-kurang taun 1942 untuak kapantiangan partahanan. Lubang Japang alah dikalola jadi obyek wisata sijarah mulai taun 1984 dek pamarintah Kota Bukittinggi. Babarapo pintu masuak ka Lubang Japang iko di antaranyo talatak di kawasan Ngarai Sianok, iyolah di Taman Panorama, di samping Istano Bung Hatta, jo ciek lai di Kebun Binatang Bukittinggi.

Sijarah

Lubang Japang dibuek untuak tampek panyimpanan perbekalan jo pakakeh parang tantara Japang, nan panjang trowongan nyo mancapai 1400 m sarato bakelok-kelok, trowongan ko punyo leba kiro-kiro 2 meter. Babarapo ruangan khusus tadapek di trowongan iko, di antaronyo adolah ruang pangintaian, ruang panyergapan, panjara, dapua jo gudang sanjato. Salain lokasinyo nan strategis di kota yang dahulunyo marupoan pusek pamarintahan Sumatra Tengah, tanah yang manjadi dindiang trowongan iko marupoan jinih tanah nan jiko bacampua air akan samakin kuek. Bahkan gampo nan mangguncang Sumatra Barat tahun 2009 lampau indak banyak marusak struktur trowongan. Dipakiroan puluhan sampai ratusan ribu tanago karajo paso atau romusha didatangan dari pulau Jawa, Sulawesi jo Kalimantan untuak manggali trowongan iko. Pamiliahan tanago karajo dari lua daerah ko marupoan strategi kolonial Japang untuak manjago karahasioan megaproyek iko, sadangkan tanago karajo nan dari Bukittinggi disuruah untuak mangarajoan trowongan patahanan di Bandung dan Pulau Biak.