Bukik Batabuah, Canduang, Agam
| Bukik Batabuah | |
|---|---|
| Nagara |  Indonesia |
| Provinsi | Sumatera Barat |
| Kabupaten | Agam |
| Kecamatan | Canduang |
| Laweh | - km² |
| Panduduak | 7,757 urang (2010) |
Bukik Batabuah marupoan salah satu nagari nan ado di kacamatan Canduang, Kabupaten Agam, Sumatera Barat, Indonesia.
Asa Usua Nagari Bukik Batabuah Nagari bukik batabuah salah satu bagian dari 648 Nagari nan ado di sumatera barat jo 82 nagari nan ado di agam. Manyingguang tantang nagari adolah administratif tarandah dalam pamarintahan. Latak geografis bukik batabuah bagian barat gunuang Marapi bajarak 5 km dari kota Bukit tinggi. Bukik Batabuah takanal jo hasia gulo sirah (saka) disampiang batani sawah, pagawai jo padagang. Nagari di pimpin dek wali nagari nan di piliah sacaro demokratis dek warga atau panduduak nagari untuak maso jabatan 6 taun kamuko, dalam struktur pamarintahan nagari di bantu dek Wali Jorong, KAN, BAMUS, parik paga nagari jo bundo kanduang.
Bateh wilayah Bukik Batabuah:
Timua babateh : Nagari Lasi Kacamatan Canduang. Salatan babateh : Nagari Sungai Pua Kacamatan Sungai Pua. Baraik babateh : Nagari Kubang Putiah Kacamatan Banuhampu. Utara babateh : Nagari Batu Taba Kacamatan Ampek Angkek.
Nagari Bukik Batabuah didirikan partamo kali dek Niniak Mamak Indu Nan Tangah Limo Puluah. Sadangkan nan manjadi Panitianyo adolah Angku Nan Tigo Baleh. Inyo mampunyoi susunan asli badasarkan hak asa usua nan basifaik istimewa. Susunan dimakasuik tadiri dari babarapo suku gadang sabagai barikuik:
1. Suku gadang Koto Padang Langgundi sabanyak 6 kaum.
2. Suku gadang koto surau sabanyak 6 kaum.
3. Suku gadang pisang di Lurah sabanyak 6 kaum.
4. Suku gadang pisang kandang laweh sabanyak 6 kaum.
5. Suku gadang tujuah buah paruik sabanyak 7 kaum.
6. Suku gadang tigo alua sabanyak 4 kaum.
7. Suku gadang sikumbang jantan sabanyak 5 kaum.
8. Suku gadang sikumbang silubuak sabanyak 5 kaum.
Namo Bukik Batabuah barasal dari namo duo wilayah yaitu wilayah Bukik nan dihuni dek Nan Sambilan Suku sadangkan wilayah nan cieknyo lai adolah Batabuah nan dihuni dek Nan Ampek Suku. Bagian wilayah di lua itu disabuik Kubu yaitu: Kubu Alam, Kubu Cumantiang, Bareco, Andaleh, Kubu Sarunai, Kubu Panjang, Kubu Nan Duo, Kubu Pudiang, Kubu Apa, Kubu Lado, Kubu Rakik, Kubu Baringin jo lain lainnyo.
Angku Nan Tigo Baleh adolah Niniak Mamak nan manjadi Panitia dalam proses alek batagak pangulu, malewakan gala, mambangkik batang tarandam, manyaruakkan baju Nan balipek di marawa Nan tagak, di tanduak Nan tabanam, di darah Nan talayau, dagiang Nan balapah. Panitia tasabuik disabuik juo jo Juaro nan tadiri dari:
1. Datuak Majo Indo dari Suku Koto Padang Langgundi di Nan Sambilan.
2. Datuak Mantari Labiah dari Suku Koto Padang Langgundi di Nan Ampek Suku.
3. Datuak Tumangguang Putiah dari Suku Koto Surau di Nan Sambilan.
4. Datuak Maka dari Suku Koto Surau di Nan Ampek Suku.
5. Datuak Barabanso dari Suku Pisang Kandang Laweh di Nan Sambilan.
6. Datuak Mantiko Basa dari Suku Pisang di Lurah di Nan Sambilan
7. Datuak Bagindo Kali dari Suku Guci di Nan Sambilan.
8. Datuak Tumbijo dari suku Pili di Nan Sambilan.
9. Datuak Tungganti dari Suku Sikumbang Jantan di Nan Ampek suku.
10. Datuak Simajo Putiah dari suku Sikumbang Silubuak di nan Ampek Suku.
11. Datuak Mangkudun Sati dari Suku Jambak di Nan Sambilan.
12. Datuak Batuah dari suku sikumbang di Nan Sambilan.
13. Datuak Pangeran dari Suku Selayan di Nan Sambilan.
Sumber: buku Adat Sarato Limbago sebagai perekat silaturahmi oleh D. St. Tumanggung (unsur Ninik Mamak Bamus Nagari Bukik Batabuah)
Pautan lua[suntiang | suntiang sumber]
- (Indonesia) Situs web resmi Kabupaten Agam
