Kabupaten Belitung Timur

Wikipedia Minangkabau - Lubuak aka tapian ilimu
(Dialiahkan dari Belitung Timur)

Koordinat: 2°54′ LS 108°3′ BT

Kabupaten Belitung Timur
Kabupaten di Bangka Belitung
Transkripsi Lain
 • Jawiبليتوڠ تيمور
Lambang rasmi Kabupaten Belitung Timur
Lambang
Semboyan: Satu Hati Bangun Negeri
Lokasi di Kepulauan Bangka Belitung
Lokasi di Kepulauan Bangka Belitung
NagaraIndonesia
ProvinsiKepulauan Bangka Belitung
Dasar HukumUU No. 5 Tahun 2003
Ari Jadi25 Februari 2003
IbukotaManggar
Pambagian administratif7 kecamatan
39 desa
Pamarintahan
 • BupatiBurhanuddin
 • Wakil BupatiKhairil Anwar
 • DAURp438.706.118 (2017)[1]
Laweh
 • Total2,506,91 km2 (967,92 sq mi)
Titiak tarandah0 m (0,0 ft)
Panduduak (2020)
 • Total127.018
 • Kapadatan51/km2 (130/sq mi)
 [2]
Demografi
 • BahasoMalayu Belitung, Hakka, Indonesia
Zona wakatuWIB (UTC+7)
Kodepos335xx
Kode wilayah0719
Plat kandaraanBN
Situs webbelitungtimurkab.go.id

Kabupaten Belitung Timur adolah salah satu kabupaten di Provinsi Kapulauan Bangka Belitung, Indonesia. Kabupaten iko marupokan hasia pamekaran dari Kabupaten Belitung dan baribu kota Manggar. Kabupaten Belitung Timur panah manjadi lokasi patambangan timah sajak maso kolonial Ulando inggo maso Orde Baru. Samanjak kamardekaan, usaho patambangan dijalankan dek PN Timah.[3]

Kabupaten Belitung Timur iko samakin tanamo dek marupokan tampek "Laskar Pelangi" nan ditulih Andrea Hirata. Salain itu, kabupaten ko tanamo dek mampunyoi banyak waruang kopi inggo mandapek penghargaan dari Museum Rekor Dunia Indonesia (MURI). Dek itulah, kabupaten iko disabuik juo sabagai Kota 1001 Warung Kopi.[4]

Geografis[suntiang | suntiang sumber]

Bateh Wilayah[suntiang | suntiang sumber]

Utara Lauik Natuna
Selatan Lauik Jawa
Barat Sijuk, Badau dan Membalong
Timur Selat Karimata

Sijarah[suntiang | suntiang sumber]

Maso karajaan[suntiang | suntiang sumber]

Pulau Belitung dipakirokan alah tanamo samanjak abaik ka-7 basamo jo Pulau Bangka nan ado dalam kuaso Karajaan Sriwijaya. Dipakirokan pado abaik ka-14, Belitung alah dikuasoi Majopaik. Manuruik catatan Fei Hsin (1436) dari Cino, disabuikkan baso pado taun 1293 Armada Kapa Cino nan dipimpin dek Jendral Kau Hsing jo Shi Pi larek di pulau iko (disabuik sabagi Kolan/Kaulan) dek takanai langkisau. Dek pulau mampunyoi banyak sumber dayo, tabueklah 100 kapa baru untuak malanjuikkan palayaran. Dari armada tasabuik, ado 100 urang nan indak bisa malanjuikkan palayaran dek sakik. Akhianyo kasaratuih urang tasabuik manjadi koloni Cino partamo nan tingga di Belitung.[3]

Pado abaik ka-16, badiri karajaan partamo di Belitung nan banamo Karajaan Badau nan bapusek di barat Belitung dan mambantang inggo Buding, Manggar, jo Gantung di timur Belitung. Karajaan iko didirikan dek Datuk Mayang Gresik pado taun 1520. Inyo juo talibaik dalam panyebaran agamo Islam di Belitung. Pado abaik ka-17, tibo utusan dari Mataram nan banamo Ki Gede Yakub (bagala Depati Cakraningrat). Inyo tibo di Balok untuak manyebakan agamo Islam dan kudian manikahi puti Datuk Mayang Gresik. Salapeh itu, inyo juo mandirikan karajaan baru nan banamo Karajaan Balok.[5][6][7] Karajaan Balok wakatu itu alah manambang logam, maolah, sarato maniagokannyo ka daerah lua Belitung, tamasuak Batavia nan alah labiah dulu dikuasoi Ulando.[8][3]

Pado maso pamarintahan Kiai Agus Gending Gelar Sultan Cakraningrat III (1696-1700), Karajaan Balok sarato Pulau Bangka masuak dalam palinduangan Kasultanan Palembang. Karajaan Balok musti mambayia ameh manah ka Palembang. Pado maso itu juo, sistem pamarintahan Balok diatua inggo mampunyoi sistem paamrintahan Ngabehi (satingkek jo kecamatan). Ado ampek ngabehi, antaro lain: Ngabehi Badau, Ngabehi Sijuk, Ngabehi Belantu, jo Ngabehi Buding.[3]

Maso kolonial asiang[suntiang | suntiang sumber]

Pado taun 1812, Kasultanan Palembang kalah dari Inggirih sainggo Bangka jo Belitung masuak dalam kakuasoan Inggirih. Untuak mamarintah di Belitung, Inggirih manunjuak Rajo Akil dari Siak untuak mamimpin Belitung. Tapi, hal iko ditantang Kiai Agus Mohammad Hatam bagala Depati Cakraningrat VII nan marupokan pawarih Karajaan Balok inggo tajadi patikaian jo Rajo Akil.[3]

Panambang-panambang timah di Manggar.

Pado taun 1814, Ulando jo Inggirih manandotangani traktat di London nan banamo Anglo-Dutch Treaty. Di antaro isi traktat tasabik adolah manuka Bangka Belitung (nan dipunyoi Inggirih) jo Cochin, India (nan dipunyoi Ulando). Belitung dek Ulando disabuik jo Biliton. Belitung basamo jo Bangka disatukan dalam ciek residensi nan banamo Residentie Banka en Ouderhoregheden. Belitung manjadi salah satu Onderafdeling nan dikapaloi dek controleur jo pangkek asisten residen. Pado taun 1852, satahun sasudah ditamukannyo timah di Belitung, Belitung dipisahkan dari Bangka nan kudian dibagi manjadi duo distrik, yaitu Distrik Belitung Barat jo Distrik Belitung Timur nan dikapaloi dek demang.[3]

Pado 10 April 1942, Pulau Belitung dikuasoi Japang. Pajabat-pajabat pamarintahan diganti jo urang Japang sarato urang satampek. Karesidenan Bangka Belitung diparintah dek Bangka Biliton Gunseikanbu.[3]

Maso kamardekaan[suntiang | suntiang sumber]

Kantua Camat Manggar

Kaba Kamardekaan Indonesia baru sampai ka Belitung pado September 1945. Samantaro pangibaran bandera merah putih partamo klai pado 12 Oktober 1945 di Lipat Kajang, Kampung Baru, Manggar. Pado 16 Oktober 1945 dibantuaklah Komite Nasional Indonesia (KNI) Belitung Timur sabagai wakia pamarintah RI di Belitung dan dilanjuikkan jo pambantukan badan-badan rang mudo jo pajuang di Manggar, Mengkubang, Gantung, dan sakitarnyo.[3]

Belitung dikuasoi baliak dek Ulando pado 23 Oktober 1945. Pado 1946, Belitung sarato Bangka dijadikan daerah otonom jo lembaga pamarintah tatingginyo dinamoi Dewan Bangka Samantaro (Voollopige Bangka Raad) jo ketuanyo Masyarif Datuak Bandaharo Lelo. Kudian barubah namo manjadi Dewan Bangka pado 1947.[3]

Pado 1948, dibantuaklah Federasi Bangka Belitung dan Riau (BABERI) malalui Keputusan Gubernur Jenderal Hindia Belanda tanggal 23 Januari 1948 No. 4. Federasi iko manjadi bagian dari Republik Indonesia Serikat. RIS kudian bubar pado taun 1950 dan sistem pamarintahan Bangka Belitung maikuik ka UU no. 22 Tahun 1948.[3]

Pado 22 April 1950, pamarintahan Bangka Belitung disarahkan RIS ka RI dan digabuangkan jo Provinsi Sumatera Selatan. Samantaro Dewan Bangka dibubarkan dan disarahkan kapado R. Soemardjo sabagai Residen Bangka Belitung nan bakadudukan di Pangkal Pinang.[3]

Pado taun 2000, Bangka Belitung bapisah dari Sumatera Selatan dan manjadi provinsi surang manuruik Undang-Undang No. 27 Tahun 2000. Pado maso iko, Belitung Timur masih ciek kabupaten jo Belitung Barat nan banamo Kabupaten Belitung. Pado 2003, manuruik Undang-Undang No. 23 Tahun 2003, Kabupaten Belitung dimekarkan manjadi duo kabupaten, yaituk Kabupaten Belitung jo Kabupaten Belitung Timur.[3]

Pamarintahan[suntiang | suntiang sumber]

Daftar Bupati[suntiang | suntiang sumber]

No Foto Namo Mulai Jabatan Akhia Jabatan Prd. Katarangan Wakil Bupati
Asri Matsum
(Penjabat)
24 Mei 2003 6 Januari 2005 [ket. 1]
Usman Saleh
(Penjabat)
6 Januari 2005 3 Agustus 2005 [ket. 2]
1 Basuki Tjahaja Purnama 3 Agustus 2005 22 Desember 2006 1 [ket. 3]
[9]
Khairul Efendi
AMB. Suwargo 22 Desember 2006 30 Januari 2007
2 Khairul Efendi 30 Januari 2007 6 September 2010
3 Basuri Tjahaja Purnama 6 September 2010 6 September 2015 2 [10] Zarkani
Hardi
(Penjabat)
8 September 2015 17 Februari 2016 [ket. 4]
4 Yuslih Ihza Mahendra 17 Februari 2016 26 Februari 2021 3 Burhanudin
5 Burhanuddin (politikus) 26 Februari 2021 Petahana 4


Dewan Perwakilan[suntiang | suntiang sumber]

Barikuik iko adolah komposisi anggota DPRD Kabupaten Belitung Timur dalam duo periode tarakhia.[11][12]

Partai Politik Jumlah Kursi dalam Periode
2014-2019 2019-2024
Gerindra 2 3
PDI Perjuangan 4 Steady 4
Golkar 2 Steady 2
NasDem 3 Steady 3
PKS 3 Steady 3
Perindo (baru) 2
PPP 2 0
PAN 3 1
Hanura 3 Steady 3
Demokrat 0 1
PBB 3 Steady 3
Jumlah Anggota 25 Steady 25
Jumlah Partai 9 10

Kecamatan[suntiang | suntiang sumber]

Kabupaten Belitung Timur tadiri dari 7 kecamatan jo 39 desa. Pado taun 2017, jumlah panduduaknyo mancapai 119.807 jiwa jo laweh wilayah 2.506,91 km² dan sebaran panduduak 48 jiwa/km².[13][14]

Daftar kecamatan jo kelurahan di Kabupaten Belitung Timur, adolah sabagai barikuik:

Kode
Kemendagri
Kecamatan Jumlah
Desa
Daftar
Desa
19.06.05 Damar 5
19.06.03 Dendang 4
19.06.02 Gantung 7
19.06.04 Kelapa Kampit 6
19.06.01 Manggar 9
19.06.07 Simpang Pesak 4
19.06.06 Simpang Renggiang 4
TOTAL 39

Panduduak[suntiang | suntiang sumber]

Panduduak Belitung Timur manuruik Sensus Panduduak 2020 mancapai 127.018 jiwa. Kok dibandiangkan jo Sensus Panduduak 2010, ado patumbuahan panduduak sabanyak 18,68%. Samantaro kapadatan panduduaknyo mancapai 51 jiwa/km2 jo daerahnyo nan paliang padek yaitu Kecamatan Manggar nan mancapai 171 jiwa/km2 sarato daerahnyo nan paliang langang yaitu Kecamatan Simpang Renggiang nan mancapai 30 jiwa/km2.[15]

Agamo[suntiang | suntiang sumber]

Musajik di Lalang taun 1930.

Agamo nan banyak dianuik urang Belitung Timur adolah agamo Islam. Agamo Islam partamo kali disebarkan dek Ki Gede Yakub nan marupokan pandiri Karajaan Balok, santano agak tasandek dek panduduaknyo maso itu masih banyak nan animisme. Tokoh lainnyo nan manyebarkan agamo Islam adolah Syekh Abdul Jabbar Syamsuddin jo Syekh Abubakar Abdullah (bagala Datuk Gunung Tajam) nan barasa dari Pasai.[3]

Etnis[suntiang | suntiang sumber]

Orang Darat di dangau ladangnyo.

Panduduak asali nan mauni Kabupaten Belitung Timur adolah urang Malayu Belitung. Manuruik pamukimannyo, urang Malayu Belitung tabagi duo kalompok, yaitu urang darek (Orang Darat) jo urang pasisia (Orang Laut/Sikka/Sawang). Samantaro pandatang nan rami di Belitung Timur adolah urang Cino.[3]

Warisan budaya[suntiang | suntiang sumber]

Sepen Penyok[suntiang | suntiang sumber]

Sepen Penyok marupokan tarian mudo mudi nan dibaok ka Belitung katiko panyebaran agamo Islam. Mulonyo dibaok dek Datuk Muhammad Saman nan kudian dilanjuikkan dek Datuk Ali Husin. Tarian ko mulo ditarikan di Desa Buding, Kecamatan Kelapa Kampit. Tarian iko dipakai juo sabagai tarian salamaik datang manyambuik tamu nan ditarikan dek laki-laki sajo. Kini, tarian iko ditarikan pulo dek siapo sajo.

Gangan[suntiang | suntiang sumber]

Gangan marupokan kuliner bakuah kuniang khas Pulau Belitung nan babahan utamo dagiang jawi, kambiang, atau ayam. Kuliner iko mamakai bumbu utamo lado, kamiri, jo kunik. Ado duo jinih kuah nan dipakai. Kuah pakek hasia dari pamasakan basamo ubi kayu marupokan gangan nan dibuek Orang Darat, disabuik juo Gangan Darat. Samantaro urang pasisia labiah sanang jo gangan bakuah campuran naneh. Gangan marupokan kuliner harian urang Belitung sarato tamasuak makanan adat cando acara Makan Bedulang dalam alek urang Belitung.

Hadrah Gendang Empat Belitong[suntiang | suntiang sumber]

Hadrah Gendang Empat Belitong atau disabuik juo Hadrah Gedungguk atau Gedunggut, marupokan kesenian hadrah nan marupokan adaptasi dari baragam hadrah nan ado di Indonesia. Kasenian hadrah ko dicirikan jo pamakaian ampek gandang. Dalam pamainannyo, ado ampek jinih lagu nan dihasiakan dari irama pukulan, antaro lain bujor satu, bujor dua, kincat, jo maradek.

Pariwisata[suntiang | suntiang sumber]

Pantai[suntiang | suntiang sumber]

  • Pantai Nyiur Melambai
  • Pantai Serdang
  • Pantai Burong Mandi
  • Pantai Bukit Batu
  • Pantai Punai
  • Pantai Batu Pulas
  • Pantai Sengaran
  • Pantai Mudong
  • Pantai Selindang
  • Pantai Pangkalan Ba'un
  • Pantai Batu Lalang
  • Pantai Gusong Cine

Catatan kaki[suntiang | suntiang sumber]

  1. Pelaksana Tugas Bupati Belitung Timur ke-1
  2. Pelaksana Tugas Bupati Belitung Timur ke-2
  3. Mengundurkan diri sehubungan dengan pencalonan sebagai kandidat Gubernur Kepulauan Bangka Belitung pada pilkada pertama provinsi tersebut, 2007
  4. Menggantikan bupati sebelumnya, Basuri Tjahaja Purnama. Hardi sebelumnya menjabat sebagai kepala Dinas Pemuda dan Olahraga Provinsi Bangka Belitung

Rujuakan[suntiang | suntiang sumber]

  1. "RINCIAN ALOKASI DANA ALOKASI UMUM MENURUT PROVINSI/KABUPATEN/KOTA TAHUN ANGGARAN 2017" (PDF). Diarsipkan dari versi asli (PDF) tanggal 2018-08-26. Diakses tanggal 2019-01-15. 
  2. "Badan Pusat Statistik Kabupaten Belitung Timur". belitungtimurkab.bps.go.id. Diakses tanggal 2021-08-20. 
  3. a b c d e f g h i j k l m n Citra Kabupaten Belitung Timur dalam arsip. Jakarta Selatan: Arsip Nasional Republik Indonesia. 5 Maret 2017. ISBN 978-602-6503-05-3. https://www.anri.go.id/download/naskah-sumber-arsip-citra-daerah-kabupaten-beltung-timur-dalam-arsip-1586395568. 
  4. "Menengok Budaya Ngopi Pagi di Negeri Laskar Pelangi". merdeka.com (dalam bahasa Inggris). 2018-11-13. Diakses tanggal 2021-09-06. 
  5. "Menggali Sejarah Kerajaan Balok, Jejak Jalur Rempah di Belitung Timur". Jalur Rempah (dalam bahasa Indonesia). 2021-02-06. Diarsipkan dari versi asli tanggal 2021-08-18. Diakses tanggal 2021-08-18. 
  6. "Menguak Jejak Kerajaan Balok di Belitung Timur". kumparan (dalam bahasa Indonesia). Diakses tanggal 2021-08-18. 
  7. "Wisata Sejarah Kerajaan Balok | Pemerintah Kabupaten Belitung Timur" (dalam bahasa Indonesia). Diakses tanggal 2021-08-18. [pranala nonaktif permanen]
  8. "Menguak Fakta Tersembunyi Sejarah Kerajaan Balok, Kerajaan Berbasis Industri di Indonesia". Pos Belitung (dalam bahasa Indonesia). Diakses tanggal 2021-08-18. 
  9. Rahma (15 Mei 2006). "Ir Basuki T Purnama MM, Bupati Belitung Timur, Bupati Etnis Tionghoa Pertama". Gemari. Diarsipkan dari versi asli tanggal 17 November 2015. Diakses tanggal 13 November 2015. [pautan nonaktif salamonyo]
  10. Wicaksono, Bayu Adi (9 September 2015). "Adik Kandung Ahok Lepas Jabatan Bupati Belitung Timur". Viva. Diakses tanggal 13 November 2015. 
  11. "Perolehan Kursi DPRD Belitung Timur 2014-2019". Diarsipkan dari versi asli tanggal 2022-09-12. Diakses tanggal 2021-07-27. 
  12. Perolehan Kursi DPRD Belitung Timur 2019-2024
  13. "Peraturan Menteri Dalam Negeri Nomor 137 Tahun 2017 tentang Kode dan Data Wilayah Administrasi Pemerintahan". Kementerian Dalam Negeri Republik Indonesia. Diarsipkan dari versi asli tanggal 29 Desember 2018. Diakses tanggal 3 Oktober 2019. 
  14. "Peraturan Menteri Dalam Negeri Nomor 72 Tahun 2019 tentang Perubahan atas Permendagri nomor 137 Tahun 2017 tentang Kode dan Data Wilayah Administrasi Pemerintahan". Kementerian Dalam Negeri Republik Indonesia. Diarsipkan dari versi asli (PDF) tanggal 25 Oktober 2019. Diakses tanggal 15 Januari 2020. 
  15. "Badan Pusat Statistik Kabupaten Belitung Timur". belitungtimurkab.bps.go.id. Diakses tanggal 2021-08-20. 

Pautan lua[suntiang | suntiang sumber]