Lompat ke isi

Batu basurek Pagaruyuang V

Wikipedia Minangkabau - Lubuak aka tapian ilimu
Batu basurek Pagaruyuang V
JinihBatu basurek
Bahan bakuBatu andesit
UkuranTinggi: 27 cm
Leba: 46 cm
Taba: 19,5 cm
Sistem panulisanAksara Pasca Pallawa
PeriodePado maso pamarentahan Raja Adityawarman
Tampek ditamuanNagari Pagaruyung, Kec.Tanjung Emas, Kab. Tanah Datar, Sumatera Barat
Lokasi kiniKompleks Prasasti Adityawarman
Koordinat0°27′35″S 100°36′28″E / 0.4597310°S 100.6077240°E / -0.4597310; 100.6077240
BahasoBahaso Jawa Kuno
KabudayaanBudaya Pagaruyuang
Batu basurek Pagaruyuang V di Sumatra
Pagaruyuang V
Pagaruyuang V
Batu basurek Pagaruyuang V (Sumatra)
2km
1.2miles
Pagaruyuang V
Paguruyuang V
Peta
Lokasi Paguruyuang V

Batu basurek Pagaruyuang V adolah salah satu batu basurek nan ditamuan di Sumatera Barat.[1] Batu basurek ko dipakiroan baasa dari maso kakuasoan Rajo Adityawarman, iyolah pado abaik ka-14.[1] Batu basurek ko ditulih dalam uruf jo bahaso Jawa Kuno.[1][2] Asanyo batu basurek ko ditamuan di Ponggongan, Nagari Pagaruyuang, Tanjung Emas, Tanah Data, Sumatera Barat.[3][4] kudian dibao ka Kompleks Prasasti Adityawarman.[3][5][6]

Isi batu basurek manjalehan pambuekan sabuah taman dek surang nan banamo si Satra, nan dilangkoki jo tampek duduak untuak Rajo Adityawarman. Hal ko mambuek batu basurek Pagaruyuang V unik, dek marupoan satu-satunyo batu basurek paninggalan Adityawarman nan mancataik tantang taman jo suasano kaidupan istano. Batu basurek ko manunjuakkan pulo adonyo pangaruah budayo Jao malalui pamakaian bahaso sarato panamoan tokoh nan disabuikkan di dalamnyo.[7][8]

Batu basurek ko alah tacataik sabagai bando Cagar Budaya Nasional sajak taun 2019, jo nomor inventaris 26/BCB-TB/SMB.[5][9]

Lata balakang

[suntiang | suntiang sumber]

Batu basurek Pagaruyuang V lah tacataik dalam laporan pamarentah Hindia Belanda, dalam Inventaris der Oudheden in de Padangsche Bovenlanden (Inventarisasi Purbakala di Dataran Tinggi Padang) nan disusun dek N.J. Krom. Laporan tasabuik ditulih badasa data lapangan nan dikumpuakan dek Asisten Residen L.C. Westenek di Fort de Kock, nan kini ko adolah Kota Bukittinggi.[10] Dalam laporan tasabuik, Krom mangalompokan batu basurek di daerah Kabupaten Tanah Datar sabagai bagian dari Adityawarman-inscripties atau batu basurek Adityawarman, iolah batu basurek nan langsuang manyabuikkan namo Rajo Adityawarman. Salain itu, tadapek juo kalompok nan mampagunoan aksara sarupo nan dikalompokan sabagai Adityawarman-schrift (aksara Adityawarman).[10]

Manuruik Krom, batu basurek tasabuik ditamuan di daerah Bukit Gombak, nan di maso kolonial tamasuak dalam wilayah Onderafdeeling Fort van der Capellen.[11] Salanjuiknyo, batu basurek tasabuik dipindahan ka lokasi nan kini manjadi Kompleks Prasasti Adityawarman.[12][13]

Batu basurek iko marupoan satu-satunyo batu basurek nan manjalehan tantang pambangunan taman, jo hal tasabuik indak lazim ditamuan dalam batu basurek pado maso pamarentahan Rajo Adityawarman.[14] Batu basurek Pagaruyuang V manjadi satu-satunyo pulo batu basurek nan maagiah gambaran tantang suasano kaidupan pado maso karajaan Adityawarman.[15]

Bantuak

[suntiang | suntiang sumber]

Batu basurek Pagaruyuang V tabuek dari batu andesit nan baukuaran tinggi 27 cm, leba 46 cm, jo taba 19,5 cm.[5] Batu basurek ko tadiri dari limo barih tulisan nan mampagunoan aksara Pasca Pallawa jo bahaso Jawa Kuno.[5][16] Kaadoan batu basurek Pagaruyuang V ko lah rusak bana sainggo anyo 50% dari tulisan nan ado dapek dibaco. Pado barih kalimo batu basurek ko, tatulih namo Adityawarman.[17]

Salain rusak, tadapek pacahan di bagian ateh jo bawah batu basurek ko. Samemangnyo, badasa asia kajian pado tulisan batu basurek, bagian ateh bukanlah marupoan kalimaik atau panulisan awa sabuah batu basurek. Baitu pulo jo bagian bawah nan indak manunjuakkan sabagai akia atau panutuik sabuah batu basurek.[16] Aratinyo, batu basurek ko marupoan fragmen (pacahan) dari batu basurek nan labiah gadang.[18]

Naskah jo tajamahan

[suntiang | suntiang sumber]

Batu basurek ko tadiri dari limo barih, namun marupoan bagian dari isi nan labiah panjang, nan patah pado bagian ateh jo bawahnyo.[2] Barikuik iko pambacoan naskah manuruik N.J. Krom:[1][3]

  1. tani sahata ---- ya smra ---- ita
  2. sddya matata si Satra ---- (ta)naya -- ra
  3. satuyasacaskaraga sapata ---- wana ma
  4. parama taratwa sahannira ma --- nara puspa
  5. ---- (a)sanam adityyawar(mman) ---- nata wa

Tajamahan naskah ko adolah sbb.:[2][3]

  1. tanah/patanian jo...
  2. (nan) basadio manato (adolah) si Satra... anak...
  3. bungo gunuang nan indah... sumpah...
  4. tarutamo (nan baderet-deret) jonyo... bungo...
  5. ... (tampek duduak) Adityyawarmman... nata...

Panapsiran

[suntiang | suntiang sumber]

Budi Istiawan (2006) bapandapaik baso isi batu basurek Pagaruyuang V ko alun dapek dipahami sacaro pasti.[19] Namun, badasa asia aliah aksara jo aliah bahaso nan alah inyo tajamahan, dapek disimpuakan dari potongan kato-kato di dalamnyo tantang pambuekan sabuah taman dek surang nan banamo si Satra.[20] Pamakaian sebutan 'si' sabalun namo Satra sacaro lansuang manandoan baso tokoh tasabuik barasa dari kalangan masarakaik biaso atau rakyaik jalata. Salain itu, pamiliahan namo Satra sarato pamakaian partikel 'si' mampakuek dugoan adonyo pangaruah budayo Jao, maingek pola panamoan tasabuik biaso ditamuan dalam naskah-naskah Jao Kuno.[19]

Batu basurek ko marupoan satu-satunyo pulo batu basurek paninggalan Rajo Adityawarman nan mancataik tantang pambuekan sabuah taman. Taman tasabuik digambakan baias bungo-bungo nan diambiak dari daerah pagunuangan, sarato dilangkoki pulo jo tampek duduak untuak Adityawarman. Mancaliak kanyatoan tasabuik, mako kamungkinan taman nan dibangun marupoan taman nan cukuik gadang jo rancak, sainggo pambangunannyo paralu ditulihan pado sabuah batu basurek.[20][19]

Batu basurek Pagaruyuang V mampakuek bukti pamakaian babagai bahaso dalam batu basurek paninggalan Rajo Adityawarman—Sanskerta, Melayu Kuno, jo Jao Kuno—nan kadang dipakai bacampua dalam satu batu basurek, kadang dipakai tapisah. Karagaman ko mancaminan lata balakang Adityawarman: pangaruah Jao dari Majapahit, Sanskerta sabagai bahaso kaum bangsawan jo brahmana, sarato Melayu sabagai bahaso lokal di Sumatra. Pamakaian bahaso Jao Kuno di batu basurek ko manunjuakkan baso unsua budayo Jao alah masuak ka lingkup kultural Melayu basamo kabaradoannyo sabagai panguaso, nan maubuangan tradisi Jao jo Sumatra.[21]

Upayo pamaliharoan

[suntiang | suntiang sumber]

Batu basurek Pagaruyuang V tamasuak salah satu paninggalan arkeologis pantiang dari maso pamarentahan Adityawarman di Karajaan Malayapura. Upayo pamaliharoan pado batu basurek ko dilakuan tarutamo dek Balai Pelestarian Kebudayaan (BPK) Wilayah III Sumatera Barat, Riau, jo Kepulauan Riau nan sacaro bakalo malakuan pandokumentasian, pamantauan kondisi pisik, sarato pancatatan tingkek palapuakan batu andesit nan manjadi bahan utamo batu basurek.[22] Batu basurek ko alah tacataik sabagai bando Cagar Budaya badasa kaputusan Menteri Pendidikan dan Kebudayaan Republik Indonesia Nomor SK 77/M/2019 tatangga 12 Maret 2019, sainggo mandapek palinduangan ukum dari nagara.[2]

Salain pamaliharoan pisik, lambago panalitian sarupo Balai Arkeologi Sumatera Barat (nan kini ko lah bagabuang ka dalam BRIN)[23] jo babarapo paguruan tinggi di daerah tasabuik malakuan pulo kagiatan panalitian epigrafi sarato pandokumentasian ulang naskah batu basurek untuak kapantiangan akademis jo publikasi ilimiah.[24] Sosialisasi manganai nilai sijarah batu basurek Pagaruyuang V taruih dilakuan dek Paguruan Tinggi, BPK, sarato Dinas Kebudayaan Kabupaten jo Provinsi supayo paninggalan ko tatap tajago sabagai sumber pangatauan bagi rang mudo.[15][25] Batu basurek ko alah dipagunoan sabagai alaik pandidiakan sijarah, budayo, mitos, jo carito rakyaik dek masarakaik satampek.[26]

Caliak pulo

[suntiang | suntiang sumber]
Search Wikimedia Commons Ado kategori tantang Batu basurek Pagaruyuang V di Wikimedia Commons

Rujuakan

[suntiang | suntiang sumber]
  1. 1 2 3 4 Utomo, Bambang Budi (2007). Prasasti-prasasti Sumatra. Pusat Penelitian dan Pengembangan Arkeologi Nasional, Badan Pengembangan Sumberdaya Kebudayaan dan Pariwisata, Departemen Kebudayaan dan Pariwisata. pp. 70. https://books.google.co.id/books?id=JthRAQAAMAAJ&q=tani+sahata&dq=tani+sahata&hl=id&sa=X&ved=0ahUKEwi809bd2sTWAhVCRY8KHdFIBU0Q6AEINTAC.
  2. 1 2 3 4 Kozok, Uli (2015). A 14th Century Malay Code of Laws: The Nitisarasamuccaya. Singapore: Institute of Southeast Asian Studies. pp. 37. ISBN 9789814459747. https://books.google.co.id/books?id=35lqBgAAQBAJ&pg=PA37&dq=Tumanggung+Kudawira&hl=id&sa=X&ved=0ahUKEwjb6pPc1cTWAhUDvI8KHYB_CvwQuwUILDAA#v=onepage&q=Tumanggung%20Kudawira&f=false.
  3. 1 2 3 4 "Prasasti Pagarruyung V". MelayuOnline.com. MelayuOnline.com. 05-12-2007. Diarsipkan dari versi asli tanggal 2017-06-25. Diakses tanggal 27-09-2017.
  4. ↑ Lembaga Kerapatan Adat Alam Minangkabau Sumatera Barat (2000). Bunga rampai pengetahuan adat Minangkabau. Yayasan Sako Batuah. pp. 169. https://books.google.co.id/books?id=YNNuAAAAMAAJ&q=ponggongan+prasasti&dq=ponggongan+prasasti&hl=id&sa=X&ved=0ahUKEwjSnbWj5cTWAhUET48KHftFCVoQ6AEIKTAB.
  5. 1 2 3 4 Kusumadewi 2012, hlm. 28.
  6. ↑ Kementerian Pendidikan Dasar dan Menengah. "Prasasti Pagarruyung V". Diakses tanggal 2025/10/26.
  7. ↑ Kusumadewi 2012, hlm. 53-59.
  8. ↑ Istiawan, Budi 2006, hlm. 16.
  9. ↑ Kementerian Pendidikan Dasar dan Menengah. "Prasasti Pagarruyung V". Diakses tanggal 2025/10/26.
  10. 1 2 Krom, N.J. 1912, hlm. 33.
  11. ↑ Krom, N.J. 1912, hlm. 41-42.
  12. ↑ Istiawan, Budi 2006, hlm. 3.
  13. ↑ Griffiths 2012, hlm. 198-199.
  14. ↑ Kurnia 2015, hlm. 42-43.
  15. 1 2 Media, Kompas Cyber (2023-01-03). "Prasasti Pagaruyung V". KOMPAS.com (dalam bahasa Indonesia). Diakses tanggal 2025-10-19.
  16. 1 2 Budi 2006, hlm. 15-16.
  17. ↑ Suhadi 1990, hlm. 218-232.
  18. ↑ Kozok 2015, hlm. 37.
  19. 1 2 3 Istiawan 2006, hlm. 16.
  20. 1 2 Kusumadewi 2012, hlm. 28-29.
  21. ↑ Istiawan 2006, hlm. 15-16.
  22. ↑ bpk3sumbar [@Instagram] (2025-09-04). "Observasi Keterawatan Prasasti di Kabupaten Tanah Datar" [Observation of Inscription Preservation in Tanah Datar Regency] (dalam bahasa Indonesia) – via Instagram.
  23. ↑ Alfarizi, M. Khory (5 Januari 2022 | 10.02 WIB). "Balai Arkeologi Melebur ke BRIN, Pegawai Honorer Diberhentikan". Tempo (dalam bahasa Indonesia). Diakses tanggal 2026-03-25.
  24. ↑ Rahmawati, Nadia; Retno Susanti, Lr; Hudaidah (2024). "Warisan Kerajaan Pagaruyung: Studi Historis-Antropologis". Banda Historia : Jurnal Pendidikan Sejarah dan Studi Budaya. 2 (2). doi:https://doi.org/10.62176/bastoria.v2i2.456 Periksa nilai |doi= (bantuan).
  25. ↑ Malinda, Des; Aisiah (2021). "Potensi Sumber-Sumber Sejarah Lokal Batusangkar Sebagai Sumber Belajar Di Sma". Kronologi: Masa Lalu Untuk Masa Kini. 3 (4). doi:https://doi.org/10.24036/jk.v3i4.93 Periksa nilai |doi= (bantuan).
  26. ↑ Kurnia 2015, hlm. 9-59.

Bacoan lanjuik

[suntiang | suntiang sumber]
Diambiak dari "https://min.wikipedia.org/w/index.php?title=Batu_basurek_Pagaruyuang_V&oldid=3349444"