Basi tuang

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Basi tuang atau basi cor (bahaso Inggirih: cast iron) adolah paduan basi-karbon jo kanduangan karbon labiah dari 2%.[1] Paduan basi jo kandungan karbon kurang dari 2% disabuik sabagai baja. Unsua paduan utamo nan mambantuak karakter basi tuang adolah karbon (C) antaro 3-3,5% jo silikon (Si) antaro 1,8-2,4%. Pabedaan kadar C jo Si manyababkan titiak labua basi tuang labiah randah dari baja, yakni sakitar 1.150 sampai 1.200° C. Unsua paduan nan takanduang didalamnyo mampangaruahi warna patahannyo; basi tuang putiah manganduang unsua karbida sadangkan basi tuang kelabu manganduang serpihan grafit.

Basi tuang candaruang rapuah, kacuali basi tuang mampu tempa (malleable cast iron). Jo titiak leleh relatif randah, fluiditas nan baik, mampu tempa, mampu mesin nan sangat baik, katahanan taadok deformasi jo ketahanan aus, basi tuang alah manjadi bahan rekayasa jo babagai aplikasi jo juo digunoan dalam pipa, masin jo suku cadang industri otomotif, saparti kapalo silinder, blok silinder jo gearbox.

Artefak basi tuang nan paliang tuo nan ditamukan arkeolog adolah dari abad ka-5 SM di Jiangsu, Tiongkok. Di maso Tiongkok kuno, basi tuang digunoan untuak pakakeh parang, pertanian jo arsitektur.[2] Salamo abad ka-15, basi tuang digunoan untuak mambuek artileri di Burgundy, Parancih jo di Inggirih salamo maso Reformasi. Jambatan basi tuang patamo dibangun pado taun 1770-an dek Abraham Darby III nan dikana sabagai Iron Bridge. Basi tuang banyak jo digunoan dalam konstruksi bangunan.[3]

Fabrikasi[suntiang | suntiang sumber]

Basi tuang dibuek jo maleburkan baliak basi kasa (pig iron) hasil tanur tinggi dari bijih basi, jo ditambah jo basi tuo, baja tuo, batu kapua untuak mambantu pambantuakan terak (slag) nan dapek mangikek kotoran sahinggo mamisahannyo dari basi cair, jo karbon (kokas) sabagai bahan baka. Peleburan basi tuang biasonyo dilakukan dalam tanur tinggi jinih khusus nan acok disabuik kupola, tatapi dewasa iko banyak pabrik pangecoran manggunoan tanur listrik jinih tanur induksi jo tanur busur listrik untuak manggantian kupola. Logam cair nan kalua dari kupola diangkuik manggunoan ladel.[3]

Jinih - jinih[suntiang | suntiang sumber]

Basi tuang kelabu[suntiang | suntiang sumber]

Besi tuang kelabu (gray cast iron) manganduang grafit babantuak serpihan-serpihan tipih nan tabagi marato dalam saluruah strukturnyo, sahinggo manyababkan bidang patahannyo bawarna kelabu. Basi tuang jenih iko acok banyak dipakai karano biayonyo nan murah jo mudah diituang dalam jumlah gadang. Komposisi kimia basi tuang jinih iko adolah 2,5-4% karbon jo 1-3% silikon. Pado kadar karbon nan tinggi, basi tuang juo mampunyoi kadar silikon nan tinggi, jo presentase sulfur nan mangan nan randah.Dek sebab itu, pambantuakan karbon bebas maningkek jo satalah didinginan basi tuang kelabu manganduang grafit. Basi tuang kelabu mamiliki kakuatan tarik jo katangguhan nan labiah randah dari baja, tatapi kakuatan takanannyo samo jo baja karbon randah atau sadang. Sifek mekanis tersebut dipangaruahi dek bantuak, ukuran jo distribusi serpihan grafit nan tadapek dalam struktur mikro.[4]

Basi tuang putiah[suntiang | suntiang sumber]

Basi tuang putiah (white cast iron) mamiliki bidang patahan nan bawarna putiah karano manganduang banyak sementit nan mamiliki kanduangan karbon labiah dari 1,7%. Jo kanduangan silikon nan randah jo laju pandinginan nan capek, satalah didinginan akan tabantuak fasa metastabil sementit, Fe3C. Karano sementit basifek kareh sarato getas, basi tuang putiah mamiliki kekerasan jo katahanan aus nan tinggi tapi masin jo kakuatan tariknyo randah. Basi tuang putih iko marupoan bahan baku untuak pambuatan basi tuang mampu tempa.[3]

Basi tuang mampu tempa[suntiang | suntiang sumber]

Basi tuang mampu tempa (malleable cast iron) marupoan basi tuang putiah nan diagiah perlakuan panas sampai kurang labiah 900 °C. Perlakuan panas nan diterapkan pado basi tuang putiah umumnyo adolah anil nan batujuan untuak mamisahan karbida basi Fe3C manjadi basi jo grafit. Sacaro umum, basi tuang ko mamiliki sifek nan samo saroman baja ringan. Basi tuang jinih ko mamiliki mampu tempa nan ancak sarato katahanan terhadap baban kajuik nan mampu masin nan baik sahinggo banyak digunoan pado industri kareta api, otomotif, sambungan pipa jo industri pertanian.[3]

Basi tuang nodular[suntiang | suntiang sumber]

Basi tuang nodular (nodular cast iron) mamiliki bantuak grafit nan bulek. Panambahan magnesium jo cerium (paduan Fe-Si-Mg) pado katiko basi tuang dalam kaadaan cair manyababkan grafit manjadi bulek (nodularisasi). Basi tuang nodular mampunyoi kakuatan, kauletan jo katangguhan nan labiah baik dibandiangan basi tuang kelabu, karano bantuak grafitnyo nan bulek mako konsentrasi regangannyo manjadi labiah ketek.[3]

Rujuakan[suntiang | suntiang sumber]

  1. Campbell, F.C. (2008). Elements of Metallurgy and Engineering Alloys. Materials Park, Ohio: ASM International. p. 453. ISBN 978-0-87170-867-0. https://archive.org/details/elementsmetallur00fcam. 
  2. Donald B. Wagner (1993). Iron and Steel in Ancient China. BRILL. pp. 335–340. ISBN 978-90-04-09632-5. 
  3. a b c d e Keith Krause (Agustus 1995). Arms and the State: Patterns of Military Production and Trade. Cambridge University Press. p. 40. ISBN 978-0-521-55866-2. 
  4. Committee, A04. "Test Method for Evaluating the Microstructure of Graphite in Iron Castings". doi:10.1520/a0247-10.