Ayam burgo

Ayam burgo adolah ras ayam kampuang Indonesia nan tasebar di Pulau Sumatra, khususnyo di Bengkulu. Ayam iko dibiakkan sabagai ayam paliharaan jo ayam hias.

Sejarah

Ayam burgo marupoan hasil parsilangan antaro ayam hutan merah jantan jo ayam kampuang batino. Kabaradaannyo tasebar di Sumatra, tarutamo di Bengkulu. Ayam iko banyak basarobok di Kabupaten Rejang Lebong, Kabupaten Bengkulu Utara, Kabupaten Kepahiang, Kabupaten Bengkulu Selatan, jo Kabupaten Bengkulu Tengah. Sabagai ayam hasil parsilangan, pasebaran ayam burgo tagantuang dari kabaradaan ayam hutan sirah. Namun, populasi ayam burgo dilaporan masuak dalam kategori tarancam basamo samakin bakurangnyo jumlah ayam hutan sirah.

Badasarkan wilayah geografi asanyo, ayam burgo kamungkinan diduga mampunyo hubuangan dunsanak nan dakek jo ayam asli Indonesia lain nan barasa dari Pulau Sumatra takah ayam sumatra, ayam leher gundul, ayam walik, sarato ayam kukuak balenggek.

Karakteristik

Sacaro khusus, ciri-ciri ayam iko ditandoi jo kabaradaan cuping talingo laba bawarna putiah babantuak lingkaran. Cuping pado jantan diameternyo labiah gadang bila dibandiangan jo cuping nan batino. Kabaradoan cuping bawarna putiah manjadi panando kaaslian dari ayam burgo. Kok cuping talingonyo idnak lai bawarna putih, tatapi bantuak tubuahnya masih mirip jo ayam burgo, mako disabuik ayam rejang.

Postur tubuh ayam iko labiah ketek dibandiangan jo ayam kampung pado umumnyo, tatapi labiah gadang dibandiangan ayam hutan sirah. Warna bulu ayam burgo jantan didominasi dek warna sirah kaamehan jo hijau galok, sadangkan warna bulu ayam burgo batino didominasi warna kuniang kacokelatan jo ekor kaitaman. Ayam burgo jantan mampunyoi tipe jengger tunggal bagerigi limo nan lebar, tagak, jo bajumlah duo pado sisi kiri jo kanan. Adapun ayam burgo batino hanyo mampunyoi jengger ketek jo tipis. Selain parbedaan jengger, ayam burgo batino indak mampunyoi taji.

Batino burgo mampu mahasilkan 30 butir telur baukuran ketek dalam tempo 60 hari. Namun, untuak maasilkan ayam burgo, dibutuahan jaso "tukang pikat" nan bertugas manangkok ayam hutan sirah di hutan. Ayam hutan liar sifatnyo sangaik agresif, sarato akan malarian diri kok basarobok jo manusia.

Ayam hias

Ayam burgo banyak dipaliharo sabagai ayam hias dek mampunyoi tampilan bulu memikat jo suara kokok nan merdu. Nilai jualnyo jauah labiah tinggi dibandiangan jo harago jua ayam buras lainnyo. Di barbagai ajang kontes, harga ayam burgo jantan nan saring mamanangan babarapo parlombaan mancapai labiah dari Rp2,5 juta. Tingginyo nilai jua ayam burgo jantan maagiah paluang masyarakaik untuak malakuan usaho ayam burgo hias. Paluang nan tun manyebabkan paningkekan minaik masyarakaik penggemar ayam hias untuak mamaliharo ayam burgo jantan.

Pamarintah Bengkulu barancano mamonetisasi ayam burgo untuak tujuan pariwisata, takah manjadiannyo suvenir.