Anwar Sutan Saidi

Anwar Sutan Saidi
Lahia	19 April 1910 Sungai Puar, Agam, Sumatera Barat, Hindia Balando
Maningga	1 Juni 1976 (umua 66) Padang, Sumatera Barat
Kabangsaan	Indonesia
Karojo	Pangusaha, pajuang kamardekaan

Anwar Sutan Saidi (lahia di Sungai Puar, Agam, Sumatera Barat, 19 April 1910 – maningga di Padang, 1 Juni 1976 pado umua 66 taun) adolah pangusaha sarato pajuang pagarakan kamardekaan Indonesia. Baliau adolah salah surang dari saketek konglomerat Indonesia sabalun maso kemerdekaan Indonesia.

Usaho

Anwar cuma manampuah janjang pandidikan Sakola Dasar 5 taun di Payokumbuah. Indak sempat malanjuik-an pandidikannyo, Anwar tajun ka dunia usaho pado umua 16 taun. Pado mulonyo baliau karajo jo pamannyo, kudian baliau taruih mangambangan usahonyo surang. Diantaro usahonyo adolah mangumpuaan hasil karajinan tangan masyarakaik Agam Tuo (Oud Agam). Pado taun 1930, baliau mandirian Bank Tabungan Saudagar di Bukittinggi. Bank iko kudian barubah namo manjadi Bank Nasional Abuan Saudagar, nan pado akhianyo manjadi Bank Nasional. Taun 1938 baliau mamprakarsai badirinyo ampek parusahaan, iyolah PT Inkorba, PT Bumi Putera, PT Andalas, dan PT Fort de Kock. Di Bukittinggi, baliau-pun mandirian parusahaan panabik-an NV Nusantara. Parusahaan ko banyak manabik-an buku-buku sastra nan manjadi bacoan wajib anak-anak sakola. Basamo putranyo Rustam Anwar, baliau mangalola panabik-an ko sampai manjadi salah satu nan paliang gadang di Sumatera. Anwar-pun mambangun Hotel Minang di Bukittinggi sarato Danau Maninjau. Pado taun 1964 baliau maaktifan baliak pabrik Tanun Padang Asli nan alah lamo ditutuik.

Sasudah Anwar wafaik, parusahaan-parusahaannyo banyak nan mundur. Pado akhia 1990-an, gubernur Sumatera Barat, Hasan Basri Durin manjua aset Bank Nasional kapado Grup Bakrie jo Aminuzal Amin. Kalompok itu kudian maubah namo Bank Nasional manjadi Bank Nusa Bakri.

Pagarakan

Masuaknyo Anwar Sutan Saidi ka dalam dunia pagarakan disabab-an dek kakaknyo Djamaluddin Ibrahim, nan manjadi guru Sumatera Thawalib sakaligus panggiat Partai PARI. Anwar adolah panggiat pagarakan nan anti-Japang. Baliau indak sapaham jo Muhammad Sjafei sarato Chatib Sulaiman, nan mandirian Gyugun (Laskar Rakyat) untuak mambantu Japang. Namun sasudah Gyugun diubah manjadi Tentara Keamanan Rakyat (TKR), Anwar giat mambarian dukungan dana kapado organisasi tantara tu. Di maso kamardekaan, Anwar duduak sabagai Dewan Eksekutif Komite Nasional Indonesia (KNI) Sumatera Barat, mandampingi Sutan Mohammad Rasjid jo Dr. Djamil. Taun 1960 Anwar ditunjuak manjadi angota Depernas (Dewan Perancang Nasional) sabagai tanago ahli, lalu kudian diangkek pulo manjadi anggota MPRS.

Karya

• Tugu Pemuda Sumatera : (Di Lapangan Dipo - Padang) Perintis Jalannya Sejarah Menuju Indonesia Raya, 1967
• Bank Desa di Sumatera Barat, 1969