Anas Navis

Anas Navis (lahia di Padang Panjang, Sumatera Barat, 9 Januari 1932 – maningga di Padang, Sumatera Barat, 18 April 2007 pado umua 75 taun) marupokan salah surang saniman jo budayawan Indonesia. Anas Navis marupokan adik kandung dari A.A Navis. Luluih sakola SMA di tahun 1952, pai marantau ka Jakarta jo niak malanjuik an sakola ka UGM di Jogjakarta.

Karano ibu baliau maningga mako indak jadi malanjuik an sakola ka UGM, sahinggo tahun 1955 baliak pulang. Di Padang baliau ko dikenal sabagai pangumpu literatu manganai Minangkabau jo Sumatera Barat ko. Kamudian baliau ko di tahun 1987 manjadi panggageh "Pusek Dokumentasi jo infomasi kabudayaan Minangkabau" nan bapusek di Rumah Adaik Minang ateh sokongan Kapalo Bulog Bustanil Arifin di Padang Panjang. Musium PDIKM ko dipimpin sarato dikelola dek Anas Navis sampai akhi hiduiknyo nan kini manjadi salah satu tampek tujuan panilitian jo wisata utamo di Sumatera Baraik ko.

Dibidang panulisan Anas Navis ko maninggakan warisan barupo saduran 10 naskah carito Rakyat Minagkabau nan ditabik an dek "Pusek pangkajian Islam jo Minangkabau". Kamudian baliau ko juo mangumpuan jo manulih buku "Paribahaso Minangkabau" ditahun 1997 sarato manjalani cetak ulang nan bakali-kali.