Akuntansi

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Sala ciek bantuak pancatatan akuntansi di tahun 1928

Akuntansi adolah sabuah ilimu nan dipagunoan untuak mampalajari saluruah aktivitas pamasukan jo pangaluaran kauangan. Kato akuntansi diambiak dari bahaso asiang, yakninyo accounting nan dalam bahaso indonesia diartikan sabagai manghituang atau mampatangguangjawabkan. Akuntansi biasonyo disabuik juo sabagai bahaso bisnis.[1] Akuntansi tamasuak juo kadalam suatu proses mancataik, mangalompokkan, maringkas, mangolah sarato manyajikan data, transaksi tamasuak kasado aktivitas kauangan sahinggo depek digunoan sabagai acuan dalam pangambilan kaputusan ekonomi jo tujuan lainnyo.[2]

Sacaro umum akuntansi marupoan suatu aktivitas jaso nan baguno untuak manyadioan informasi kuantitatif tentang kondisi kauangan jo hasia operasi parusahaan nan diharapkan bamanfaaik dalam maambiak kaputusan ekonomis. Pangertian iko manakankan pado paranan akuntansi, yaitunyo untuak maagia sabuah informasi demi kapantiangan para pamakai daftar kauangan sabagai bahan patimbangan dalam pangambilan kaputusan.[3]

Sijarah[suntiang | suntiang sumber]

Praktek sistem akuntasi ko alah ado samanjak jaman mesir kuno pada 3200 tahun sabalum masehi. Kamudian, Kamudian, catatan mirip akuntansi ditamuan pulo di raruntuahan tembok bangunan dari paradaban kuno Babilonia nan dipakiroan ditulih pado tahun 4000 SM. Catatan akuntansi dalam bantuak saderhana ditamuan pulo pado siso-siso paninggalam paradaban Yunani Kuno jo Roma Kuno. Namun, akuntansi pado maso ratuihan abadik silam tasabuik masih basipaik pancatatan dan alum dapek disabuik sabagai ilmu akuntansi. Barulah kamudian pado tahun 1494 sistem pancatatan akuntansi nan labiah sistematis dipakenalkan dek Luca Paciolo, saurang ahli matematika bakabangsaan Italia. Namo lengkapnyo Fra Luca Bartolomeo de Pacioli, atau acok pulo disabuik jo Luca Pacioli.[4]

Pakambangan akuntansi samakin pesat sasudah tajadi revolusi industri di Eropa. Tumbuahnyo industri mambuek kabutuahan akan informasi biaya produksi samakin tinggi. Pado abaik ka 19 pakambangan akuntanasi samakin tanamo di tangah-tangah masyarakaik di dunia Baraik. Mamasuki abaik 20, akuntansi nan dipratikkan di Inggris jo Amerika Serikat bakambang manjadi duo cabang, yakninyo financial accounting jo cost accounting. Cabang tarakhia pado kanyataannyo bapangaruah gadang pado kaputusan para manejer.[4]

Laporan akuntansi[suntiang | suntiang sumber]

Akuntansi disabuik sabagai bahaso bisnis karano marupoan suatu alaik untuak manyampaian informasi kauangan kapado pihak-pihak nan mambutuahkannyo. Samakin baiak caro mangarati bahaso tasabuik, mako samakin baiak pulo kaputusan nan dapek diambiak, sarato samakin baiak pulo di dalam mangalola kauangan.[5] Untuak manyampaikan informasi-informasi tasabuik, mako digunoanlah laporan akuntansi atau nan disabuik sabagai laporan kauangan. Laporan kauangan suatu parusahaan biasonyo tadiri ateh ampek jinih laporan, yaitunyo Laporan Posisi Kauangan, Laporan Labo Rugi Komprehensif, Laporan Parubahan Ekuitas, Laporan Arus Kas jo Catatan Ateh Laporan Kauangan.[6]

  • Laporan Posisi Kauangan, adolah suatu daftar sistematis nan mamuek informasi manganai aset, utang jo modal suatu parusahaan pado akhia pariode tatantu. Disabuik juo sabagai daftar nan sistematis, karano laporan disusun badasakan urutan tatantu. Dalam neraca dapek dikatahui barapo jumlah kakayoan parusahaan, kamampuan parusahaan mambayia kawajiban sarato kamampuan parusahaan mamparoleh tambahan pinjaman dari pihak lua. Salain itu dapek pulo diparoleh informasi tentang jumlah utang parusahaan kapado kreditur jo jumlah investasi pamiliak nan ado di dalam parusahaan tasabuik.[6]
  • Laporan Labo Rugi Komprehensif, adolah ikhtisar manganai pandapatan jo beban suatu parusahaan untuak pariode tatantu, sahinggo dapek dikatahui labo nan diparoleh jo rugi nan didapek.[6]
  • Laporan Parubahan Ekuitas, adolah laporan nan manunjuakan parubahan modal untuak pariode tatantu, mungkin dalam sabulan atau satahun. Malalui laporan parubahan modal dapek dikatahui sabab-sabab parubahan modal salamo pariode tatantu.[6]
  • Laporan Arus Kas, dengan adonyo laporan iko pamakai laporan kauangan dapek mangevaluasi parubahan aktiva barasiah parusahaan, struktur kauangan (termasuk likuiditas jo solvabilitas) sarato kamampuan parusahaan di dalam manghasilkan kas dimaso mandatang.[6]
  • Catatan ateh laporan kauangan, marupoan daftar rincian sacaro jaleh nan ado di dalam laporan kauangan nan bafungsi sabagai panjalehan manganai rincian sabuah akun dalam laporan kauangan sacaro detail.[6]

Manfaaik akuntansi[suntiang | suntiang sumber]

Sabagai sarana informasi kauangan[suntiang | suntiang sumber]

Sabuah proses akuntansi akan maagia informasi kauangan kapdo pihak-pihak nan mambutuahannyo, baiak itu pihak internal maupun dari pihak eksternal. Informasi kauangan tasabuik dapek dijadian dasa dalam maambiak kaputusan managerial.[7]

Sabagai bahan evaluasi kauangan[suntiang | suntiang sumber]

Tasadionyo informasi kauangan malalui akuntansi, mako sasaurang atau parusahaan dapek mangatahui apo nan paralu dilakuan di maso mandatang. Misalnyo, sasudah malakuan pancatatan kauangan, sasaurang mangatahui kauangannyo mangalami masalah karano talalu boros dalam mambali kuota internet.[7]

Sabagai alaik kontrol jo bukti kauangan[suntiang | suntiang sumber]

Pancatatan kauangan nan dilakuan dengan baiak akan mambantu sasaurang atau parusahaan dalam mampatangguangjawabkan kauangan tanpa manebak-nebak pangaluaran. Akuntansi dapek juo manjadi alaik kontrol untuak mangandalian kauangan. Jadi karano itu, sasaurang atau parusahaan mampuyoi dasa dalam mangalokasian sumber dayo nan dipunyoi.[7]

Sabagai alaik untuak mangalola kauangan[suntiang | suntiang sumber]

Pencatatan kauangan akan sangaik mambantu satiok pihak dalam mangalola kauangannyo. Dengan akuntansi mako parusahaan dapek mampahituangkan babagai kaparluan sahari-hari sahinggo pangaluaran indak mambangkak.[7]

Rujuakan[suntiang | suntiang sumber]

  1. Meigs, Walter B. and Robert F. Meigs. Financial Accounting, 4th ed. McGraw-Hill, 1970, p.1. ISBN 0-07-041534-X (old edition)
  2. "Ilmu Akuntansi | Universitas Alma Ata". almaata.ac.id. Diakses tanggal 2021-04-15. 
  3. HUTAGAOL, RENALDO MARTIN NOVIANTO (Maret 2012). "PENERAPAN AKUNTANSI PADA USAHA KECIL MENENGAH". JURNAL ILMIAH MAHASISWA AKUNTANSI. VOL. 1, NO. 2: 4. 
  4. a b "Sejarah Akuntansi di Dunia dan Indonesia serta Perkembangannya". tirto.id (dalam bahasa Indonesia). Diakses tanggal 2021-04-15. 
  5. Horngren, dkk. Akuntansi, jilid 1. edisi 6. Indeks, Jakarta:2006. ISBN 979-683-757-9
  6. a b c d e f Sugiarto. Pengantar Akuntansi, Pusat Penerbitan Universitas Terbuka, Jakarta:2002 ISBN 979-689-057-7
  7. a b c d "Tujuan Akuntansi serta Manfaat dan Fungsinya, Menambah Wawasan Halaman 3". merdeka.com (dalam bahasa Inggris). 2020-09-22. Diakses tanggal 2021-04-16.