Muhammad

Dari Wikipedia baso Minang, ensiklopedia bebas
Lompek ka: navigasi, cari

Muḥammad (Arab: terjemahan: Muḥammad;[1] lafal [mʊˈħæmmæd]  ( dengar)[2][3][4], salangkoknyo Muḥammad bin Abdullah bin Abdul Mutthalib bin Hasyim (lahia di Makah, 20 April 570 – maningga di Madinah, 8 Juni 632 pado umua 62 taun) adolah nabi dan rasul nan pangabisan sarupo tasabuik dalam Al-Qur'an surah Al-Ahzab:33/40 untuak umaik Muslim. Nabi Muhammad mamulai panyebaran ajaran Islam untuak saluruah umaik manusia jo mawariskan pamarentahan tunggal Islam. Walaupun non-Muslim umumnyo manganggap Muhammad sabagai pandiri Islam, dalam pandangan Muslim, Muhammad samo-samo managakkan ajaran tauhid untuk mangasokan Allah sabagaimano nan dibao dek nabi jo rasul sabalunnyo sajak dari Nabi Nuh. Umaik Muslim manyabuik Muhammad jo salam panghormatan "Shalallaahu 'Alayhi Wasallam" jo mangiringi jo shalawat Nabi satiok nama Muhammad disabuik.

Lahia pado tahun 570 di Makah, Muhammad malewati maso kaciak sabagai yatim piatu; digadangan di bawah asuahan mamaknyo Abu Thalib. Baranjak remaja, Muhammad bakarajo sabagai padagang. Baliau kadang-kadang mangasiangan diri ka gua sabuah bukik sampai bamalam-malam untuak maranuang jo badoa; diriwayaikkan dalam umua ka-40, Muhammad didatangi dek Malaikaik Jibril jo manarimo wahyu partamo dari Allah. Baliau manyatoan diri sabagai utusan Allah, sabagaimano nabi-nabi yang alah Allah utus sabalunnyo. Tigo tahun sasudah wahyu partamo, Muhammad mulai badakwah sacaro tarang-tarangan, manyatokan kaasoan Allah dalam bantuak panyarahan diri malalui Islam sabagai agama nan bana. Muhammad manarimo wahyu barangsua-angsua sampai kamatiannyo. Praktek atau amalan Muhammad diriwayaikan dalam hadits, dirujuak dek umaik Islam sabagai sumber hukum Islam basamo Al-Qur'an.

Muhammad basamo pangikuik awal mandapek babagai bantuak palawanan jo panyiksoan dari baberapo suku Makah. Sairiang panganiayoan nan taruih balanjuik, Muhammad mambuliahan babarapo pangikuiknyo hijrah ka Habsyah, sabalun Muhammad mamulai misi hijrah ka Madinah pado tahun 622. Paristiwa hijrah manandoi awal pananggalan Kalender Hijriah dalam Islam. Di Madinah, Muhammad manyatuan suku-suku di bawah Piagam Madinah. Sasudah salapan tahun batahan dek sarangan suku-suku Makah, Muhammad mangumpuan 10.000 Muslim untuak mangapuang Mekkah. Sarangan indak mandapek palawanan nan bararti jo Muhammad mangambiak aliah kota jo saketek patumpahan darah. Baliau manghancuan patuang-patuang. Pado tahun 632, babarapo bulan sasudah baliak ka Madinah sasudah manjalani Haji Wada, Muhammad jatuah sakik dan wafat. Muhammad maninggaan Samananjuang Arab nan alah basatu dalam pamarentahan tunggal Islam jo sabagian gadang alah manarimo Islam.

Etimologi[suntiang | suntiang sumber]

"Muhammad" (Arab: محمد بن عبد اللهterjemahan: Muḥammad;[5] lafal [mʊħɑmmæd]  ( dengar))[6][7][8] sacaro bahaso barasa dari aka kato semitik 'H-M-D' nan dalam bahaso Arab bararti "inyo nan tapuji". Salain itu, dalam salah satu ayat Al-Qur'an,[9] Muhammad diimbau jo namo "Ahmad" (أحمد), nan dalam bahaso Arab bararti "tapuji" juo.

Sabalun maso kanabian, Muhammad mandapekan duo gala dari suku Quraisy (suku tagadang di Makah nan suku dari Muhammad juo) yaitu Al-Amiin nan aratinyo "urang nan dapaek dipicayo" jo As-Saadiq nan aratinyo "nan bana". Sasudah maso kanabian para sahabaiknyo mangimbaunyo jo gala Rasul Allāh (رسول الله), sudah tu manambahan kalimaik Shalallaahu 'Alayhi Wasallam (صلى الله عليه و سلم, nan bararti "mudah-mudahan Allah maagiah kasanangan jo kasalamatan kapadonyo"; acok disingkek "S.A.W" atau "SAW") sasudah namonyo.

Muhammad juo mandapekan julukan Abu al-Qasim[10] nan bararti "Apak Qasim", karano Muhammad pernah punyo anak bujang nan banamo Qasim, tapi inyo maningga dunia sabalun mancapai umua dewasa.

Genealogi[suntiang | suntiang sumber]

Ranji Muhammad dari kaduo urang tuonya baliak ka Kilab bin Murrah bin Ka'b bin Lu'ay bin Ghalib bin Fihr (Quraish) bin Malik bin an-Nadr (Qais) bin Kinanah bin Khuzaimah bin Mudrikah (Amir) bin Ilyas bin Mudhar bin Nizar bin Ma`ad bin Adnan.[11] Adnan marupokan katurunan bujang ka tujuah dari Ismail bin Ibrahim, yaitu katurunan Sam bin Nuh.

Labiah langkok ranji dari Muhammad sampai Adam adolah Muhammad bin Abdullah bin Abdul Mutthalib bin Hasyim bin Abdul Manaf bin Qushay bin Kilab bin Murrah bin Ka’ab bin Luay bin Ghalib bin Fihr (Quraisy) bin Malik bin Nadhr bin Kinanah bin Khuzayma bin Mudrikah bin Ilyas bin Mudhar bin Nizar bin Ma'ad bin Adnan bin Udad bin al-Muqawwam bin Nahur bin Tayrah bin Ya'rub bin Yasyjub bin Nabit bin Ismail bin Ibrahim bin Tarih (Azar) bin Nahur bin Saru’ bin Ra’u bin Falikh bin Aybir bin Syalikh bin Arfakhsyad bin Sam bin Nuh bin Lamikh bin Mutusyalikh bin Akhnukh bin Yarda bin Mahlil bin Qinan bin Yanish bin Syits bin Adam.

Nasab ko disabuikan dek Muhammad bin Ishak bin Yasar al-Madani di salah satu riwayaiknyo. Nasab Rasulullah sampai Adnan disapakati dek para ulama, sadangkan sasudah Adnan tajadi pabedaan pandapaik. Mukasuik dari Quraisy adolah anak bujang dari Fihr bin Malik atau an-Nadhr bin Kinanah.

Riwayat[suntiang | suntiang sumber]

Kelahiran[suntiang | suntiang sumber]

Para ulama dan panuliih sirah sapandapek baso hari kalahiran Muhammad jatuah pado bulan Rabiul Awal.[12] Muhammad lahia di Makah, kota bagian salatan Jazirah Arab, labiah-kurang tahun 570, badakekan jo Taun Gajah nan marupoan taun kagagalan panyarangan Mekkah dek pasukan bagajah di bawah pimpinan Abrahah.[13][14] Pandapek paling mashua marujuak tangga 12 Rabiul Awal sabagai hari kalahiran Muhammad. Manuruik teks hadits, Muhammad manyebuik hari Senin sabagai hari kalahirannyo. Panulih sirah Sulaiman Al-Manshurfuri jo ahli astronomi Mahmud Basya dalam panalitiannyo malacak hari Senin nan dimukasuik batepekan jo tangga 9 Rabiul Awal.

Muhammad barasa dari salah satu klan suku Quraisy yakni Bani Hasyim nan mawarisi ranji tahormat di Makah, sakalipun indak tamashua karano kakayoannyo.[15] Ayahnyo, Abdullah maningga saat Muhammad masih dalam kanduangan, anam bulan sabalun kalahiran.[16] Muhammad bayi dibao tingga basamo kaluarga dusun di padalaman, mangikuik tradisi pakotaan maso itu untuak manguekan badan jo manjauahan anak dari panyakik pakotaan.[17] Baliau diasuah jo disusui dek Halimah binti Abi Dhuayb di kampuang Bani Saad salamo duo taun.[18] Sasudah itu, Muhammad kaciak dibaliakan untuak diasuah kapado budak Ummu Aiman. Pado umua ka-6, Muhammad kahilangan amaknyo, Aminah karano sakik.[18][19] Salamo duo taun sasudahnyo, kabutuahan Muhammad ditangguang jo dicukuikan dek inyiaknyo dari keluarga ayah, 'Abd al-Muththalib. Katiko barumua salapan tahun, inyiaknyo maningga jo Muhammad sasudahnyo diasuah dek mamaknyo Abu Thalib nan tampia sabagai pamuko Bani Hasyim sapaningga Abdul Muththalib.[18][20]

Rujuakan[suntiang | suntiang sumber]

  1. ^ Unicode has a special "Muhammad" ligature at U+FDF4
  2. ^ About this sound klik di siko untuak lafal Arab.
  3. ^ Variant transcriptions of Muhammad's name, besides those used above, include — (English and multiple European languages:) "Mahomet"; (French:) "Mahomet, Mohamed, Mouhammed, Mahon, Mahomés, Mahun, Mahum, Mahumet, Mahound (medieval French), Mohand (for Berber speakers), Mouhammadou and Mamadou (in Sub-Saharan Africa)"; (Latin:) "Machometus, Mahumetus, Mahometus, Macometus, Mahometes"; (Spanish:) "Mahoma"; (Italian:) "Maometto"; (Portuguese:) "Maomé"; (Greek:) "Μωάμεθ, Μουχάμμαντ, Μοχάμαντ, Μοχάμεντ, Μουχάμεντ, Μουχάμμαιντ"; (Turkish:) "Mehmet"; (Kurdish:) "Mihemed". See also Encyclopedia of Islam: (German:) "Machmet" (pre-20th century).
  4. ^ The sources frequently say that, in his youth, he was called by the nickname "Al-Amin" meaning "Honest, Truthful" cf. Ernst (2004), p. 85.
  5. ^ Unicode has a special "Muhammad" ligature at U+FDF4
  6. ^ About this sound click here for the Pengucapan Arab.
  7. ^ babagai namo Muhammad dalam bahaso Parancih: "Mahon, Mahomés, Mahun, Mahum, Mahumet"; dalam bahaso Jerman: "Machmet"; jo dalam bahaso Islandia kuno: "Maúmet" cf Muhammad, Encyclopedia of Islam
  8. ^ The sources frequently say that, in his youth, he was called by the nickname "Al-Amin" meaning "Honest, Truthful" cf. Ernst (2004), p. 85.
  9. ^ Surah As-Saff (QS 61:6)
  10. ^ Dari Anas bin Malik, inyo mangecekan, "Saurang mangimbau kawannyo di pakubuan Baqi' sambia maimbau, 'Wahai Abul Qasim!' Rasulullah SAW manoleh kapadonyo. Inyo mangecekan, 'Wahai Rasulullah, indak engkau nan ambo mukasuik, tapi ambo mangimbau si fulan.' Mako Rasulullah SAW basabda, 'Pakailah namo ambo tapi jan pakai kuniyah ambo'," (Hadits riwayaik Bukhari no. 3537 jo Muslim no. 2131).
  11. ^ Lings, Martin. Muhammad: Kisah Hidup Nabi berdasarkan Sumber Klasik. Jakarta: Penerbit Serambi, 2002. ISBN 979-3335-16-5
  12. ^ Esposito, John L. (ed.) (2003). The Oxford Dictionary of Islam. p. 198. ISBN 978-0-19-512558-0. http://books.google.com/?id=E324pQEEQQcC&pg=PA198&dq=muhammad+birthday+Rabi%27+al-awwal#v=onepage&q=muhammad%20birthday%20Rabi%27%20al-awwal&f=false. Diakses pado 19 Juni 2012. 
  13. ^
  14. ^ Encyclopedia of World History (1998), p. 452
  15. ^ Buhl, F.; Welch, A. T. (1993). "Muḥammad". Encyclopaedia of Islam. 7 (edisi ke-2nd). Brill Academic Publishers. pp. 360–376. ISBN 90-04-09419-9. 
  16. ^ Meri, Josef W. (2004), Medieval Islamic civilization, 1, Routledge, hlm. 525, ISBN 978-0-415-96690-0, http://books.google.com/books?id=H-k9oc9xsuAC, diakses pado 3 Januari 2013 
  17. ^ Watt, "Halimah bint Abi Dhuayb", Encyclopaedia of Islam.
  18. ^ a b c An Introduction to the Quran (1895), p. 182
  19. ^ Watt, Amina, Encyclopaedia of Islam
  20. ^ Watt (1974), p. 7.